Mana ajayaypa Jesucristuman yärakunantsikpä ninqan
12
Tsay unay runakunaqa yupaytapis mana atipaypämi jiruruparaykämantsik. Tsaynö kaykaptinqa cörriq runa cörrinanpä imantapis jaqinqannö llapan jutsantsikta kacharishun. Llallinakuqkuna chäyänanpä kaqman cörriyanqannö noqantsikpis Tayta Dios munanqannö wanunqantsikyaq kawashun. 2 Salvamaqnintsik y tantiyatsimaqnintsik Jesucristo imanö kawanqantapis tantiyakushun. Paymi runakunata salvar kushikunanpä kanqanta musyar mana penqakuypa cruzcho wanurqan. Tsaymi kananqa Tayta Diospa trönun derëchancho jamaraykan.†3 Tayta Diosman yärakuynikikunata mana kachariyänaykipä Jesucristo imanö ñakanqantapis tantiyakuyay. Payqa jutsasapa runakuna contran shäriyaptinpis Tayta Dios munanqannömi imaypis kawarqan. 4 Qamkunapa contrayki shärirpis manami mayqaykitapis wanutsiyäshunkirätsu. 5 ¿Qonqaskiyashqaykiku wamrankunapä Tayta Dios palabrancho ninqanta? Tsaychömi nin:
“Hïju, Tayta Dios corrigishuptiki ama qallayaytsu.
Qallayänaykipa trokinqa chaskikuy.
6 Kuyanqan kaqtami Tayta Dios corrigin.
Wamran kananpä qorinqan kaqtaqa yachakunanpämi castigan”.†
7 Pï runapis wamrantaqa corriginmi. Tsaynöllami wamran kayaptiki Tayta Diospis corrigiyäshunki. Tsaymi Tayta Dios corrigiyäshuptiki cäsukuyänayki. 8 Tayta Diospis wamran kaqtaqa llapantami corrigin. Mana corrigiyäshuptikiqa manami wamrankunatsu kayanki.
9 Taytantsikpis mana cäsukuq kashqami corrigimashqantsik. Corrigimashqapis qallayänantsikpa trokinmi cäsukushqantsik. Tsaynö kaykaptinqa Tayta Dios corrigimashqa masrä cäsukushun. Cäsukurqa mana ushakaq kawaytami tarishun.
10 Taytantsikpis makincho kanqantsikyaqllami munanqannö kawanantsikpä corrigimantsik. Tayta Diosmi itsanqa corrigimantsik pay jutsaynaq kanqannö jutsaynaq kanantsikpä. 11 Corrigimanqantsik höra pasaypa llakikurpis cäsukurqa Tayta Dios munanqannömi kawashun.†
12 Tsaynö kaykaptinqa makiki waqikashqanö kaptinpis y alaywan qonqurniki watakashqanö kaptinpis kallpata tsariyay.† 13 Nänipita mana yaqaypa aywaqnö imaypis allillata rurayay.† Tsaynöpami weqru runa ishkiqnö kayankinatsu, tsaypa trokinqa alliyashqa runanönami kayanki.
Tayta Diosta cäsukunantsikpä ninqan
14 Pïmaywanpis kuyanakur alli kawayay. Tsaynöpis jutsata mana rurar Tayta Dios munanqannö kawayay. Jutsa ruraqkunaqa Tayta Diospa ñöpanman manami chäyanqatsu. 15 Shumaq tantiyakuyay. Mayqaykipis jutsa rurayta mana kacharirqa manami salvakuyankitsu. Qallayashqa ama puriyaytsu. Qallayashqa purirqa venënuyuq iwjiq jachanö karmi wakinkunatapis qallayätsiyanki.†
16 Mayqaykipis fornicación jutsata ama rurayankitsu. Tsaynöpis Esaúnö Tayta Diosta mana cäsukuq ama kayankitsu. Esaúqa mayor kay derëchunta juk plätu mikuyllapämi wawqinta rantikurqan.† 17 Musyayanqaykinöpis tsay bendicionta taytanpita chaskiyta munar pasaypa waqarpis manami chaskirqannatsu.a †
18 Qamkunaqa manami Sinaí jirkamanb chaqnötsu kaykäyanki. Tsay jirkachöqa ninapis, tsakaypis y shukukuy wayrapis karqanmi. 19 Cornëta waqamuqta y Tayta Dios mantsariypä parlamunqanta wiyarmi pasaypa mantsarir manana parlamunanpä rugakuyarqan.† 20 Tsaynöpis pasaypami mantsariyarqan Tayta Dios niptin: “Runatapis uywatapis jirkaman witsaq kaqtaqa saqmaypa [o flëchaypa] wanutsiyanki”.†
21 Pasaypa mantsariypä kaptinmi Moiséspis nirqan: “Pasaypa mantsarirmi tsuktsukyaykä”.†
22 Qamkunaqa Sión jirkanmanc y ciëlucho kaykaq Jerusalénman chashqanönami kaykäyanki. Tsay markaqa imayyaqpis kawaq Tayta Diospa markanmi. Tsaychömi yupaytapis mana atipaypä atska angelkuna Tayta Diosta kushishqa alabaykäyan. 23 Tayta Diosman llapan yärakuqkunawan qorikashqanömi kaykäyanki. Mayor wamra herenciata chaskiqnö kayaptikimi jutikikunapis ciëlucho qellqaraykanna. Tsaynöpis pïmayta juzgaq Tayta Diospa ñöpanman y ciëlucho kaykaq llapan salvashqakunapa ñöpanman chashqanönami kaykäyanki.
24 Tsaynöllami Jesucristupa ñöpancho kaykaqnöna kaykäyanki. Paymi wanurqan Tayta Dios mushuq pactuta rurar salvamänantsikpä. Jesucristo yawarninta jichanqan manami Abel yawarninta jichanqannötsu kaykan.† Abel yawarninta jichar wanunqanqa wanutsiq runa castigashqa kananpämi karqan. Jesucristo yawarninta jichar wanunqanmi itsanqa perdonashqa kanantsikpä kaykan.
25 Tsaynö kaykaptinqa Tayta Dios niyäshunqaykita ama yupaytupäyaytsu. Tsunyaq jirkacho Moisés ninqanta mana cäsukuqkunata Tayta Dios castigaykarqa ciëlupita patsa nimanqantsikta mana cäsukushqa peormi castigamäshun.
26 Sinaí jirkacho Tayta Dios parlamuptin tsay jirkapis pasaypami tsuktsukyarqan. Kananpis Tayta Diosmi nin: “Yapaymi kay patsata tsuktsukyätsishä. Manami kay patsallatatsu tsuktsukyätsishä, sinöqa ciëlutapis tsuktsukyätsishämi”.†
27 “Yapaymi kay patsata tsuktsukyätsishä” nirqa llapan kamanqankunata tsuktsukyätsir ushakätsinanpä kanqantami musyatsimantsik. Tsaynö ruraptinmi mana ushakaqkunallana quëdayanqa.