Noqa Pablumi, Jesucristupa willakuyninta willakunqäpita carcelcho kaykar Timoteuwan kay cartata cartakaykämü. 2 Panintsik Apiata, willakuq mayintsik Arquiputa^† y wayikicho qorikaykur Tayta Diosta alabaq wawqikunata panikunata winchikuynï qoykullay. 3 Yayantsik Tayta Dios y Señor Jesucristo kuyapäyäshurniki alli kawayänaykipä yanapaykuyälläshuy.

4 Wawqi Filemón, imaypis mañakunqä hörami qampä Tayta Diosta agradëcikü. 5 Señor Jesucristuman yärakuykanqaykita y yärakuq mayintsikkunawan kuyanakur kawaykanqaykitami willayämashqa. 6 Tsaymi mañakuykä Jesucristuman yärakunaykipä y noqantsik raykuq wanunqanpita alli kaqkunata ruranaykipä.

7 Wawqi Filemón, kuyakuq kar yärakuq mayintsikkunata shumaq shakyaykätsinqaykita musyarmi noqapis pasaypa kushikü.

8-10 Wawqi Filemón, Jesucristupa willakuyninta willakunqäpitami carcelcho wichqaraykä. Noqaqa awkinnami kaykä. Prësu kaykanqäman wätayniki Onésimo^† chämuptin alli willakuyta willaptïmi Jesucristuman criyikushqa. Tsaymi kananqa tsurïnöna kaykan.

Tsaymi qamta rugä Onésimuta kachamuptï alli chaskinaykipä. Jesucristupa apostolnin karmi qamta obliganäpä munaynï kan. Tsaynö kaptinpis manami obligaynikita munätsu, tsaypa trokinqa kuyakuq kaptikimi Onésimuta alli chaskinaykipä rugaykü.

11 Wätayniki karpis ñöpata manami shumaqtsu yanapashurqayki. Kananmi itsanqa Jesucristuman criyikushqana kar ishkantsiktana yanapamäshun. 12 Pasaypa llakirpis yapaymi Onésimuta kutiykätsimü. [Payta kikïtanö chaskiykullay.] 13 Alli willakuyta willakunqäpita prësu wichqaranqäyaq trokiki yanapamänanpä quëdatsimuptïpis allimi kanman karqan. 14 Tsaynö kaptinpis wätaynikitaqa manami tsararäkümantsu, tsaypa trokinqa kikikirämi yanapamänanpä o mana yanapamänanpäpis ninayki.

15 Capazchi Tayta Dios kamakätsishqa Onésimo juk tiempulla qampita yarqamunanpä. Kananqa Jesucristuman criyirmi imayyaqpis wawqikina kaykan. 16 Kananpita mananami wätaynikinatsu kanqa, tsaypa trokinqa kuyay wawqintsiknami. Tsaynö kaykaptinqa noqa kuyanqänölla makikiman kutimuptin qampis kuyay. 17 Yärakuq mayï kaptikimi rugä noqata chaskimanqaykinö paytapis chaskinaykipä.

18 Wätayniki Onésimo imaykitapis suwakushqa o jaqayki kaptinqa päganäpä willamay. 19 Päganäpä kaqtaqa kikïmi qellqaykämü. Itsanqa ama qonqaytsu Jesucristupa alli willakuyninta willanqäpita qampis jaqä kanqaykita. 20 Wawqi Filemón, yärakuq mayï kaptikimi rugakü kay ninqäta ruranaykipä. Rugakunqäta ruraptikiqa kushikushämi.

21 Kay cartata cartakayämü ninqänö ruranaykipä kanqanta musyarmi. Ninqäpita mastarä ruranaykipä kanqantapis musyämi. 22 Tayta Diosta mañakunqaykinö carcelpita yarqamurqa watukaqniki shamushämi. Chämuptï patsatsimänaykipä kamarikuykällay.

23 Epafrasmi^† winchikushunki. Paypis Jesucristupa alli willakuyninta willakunqanpitami noqawan juntu prësu wichqaraykan. 24 Tsaynöllami wawqintsik Marcos,^† Aristarco,^† Demas^† y Lucaspis^† winchikayämushunki. Paykunami llapanchöpis yanapaykäyäman.

25 Señornintsik Jesucristo kuyapäyäshurniki imaypis yanapaykuyälläshuy. [Amén.]