Melquisedec pï kanqanta tantiyatsinqan
7
Melquisedec karqan Salem markapa mandaqnin rey y poderyuq Tayta Diosta sirviq sacerdötimi. Guërracho reykunata vincinqanpita Abraham kutiykämuptinmi Melquisedec taripaykur Abrahamta bendisar Tayta Diosta mañakurqan. 2 Abrahamnami guërracho vincir llapan qorimunqankunapita Melquisedecta diezmuta qararqan.† Melquisedec ninanqa “allillata ruraq rey” ninanmi. Salem ninanqa “alli kaway” ninanmi. Tsaymi Melquisedecqa alli kawayta taritsiq rey karqan.3 Manami musyakantsu Melquisedec mayqan casta kanqan ni maman ni taytan pï kanqanpis. Tsaynöpis manami musyakantsu imay yurinqan ni imay wanunqanpis. Tsaymi Diospa Tsurinnö imayyaqpis sacerdöti kaykan.
Abrahampita Melquisedec mas munayyuq kanqan
4 Melquisedecman diezmuta taytantsik Abraham entregaptinmi tantiyantsik Abrahampitapis Melquisedec mas munayyuq kanqanta. 5 Leví trïbu sacerdötikunaqa Moisés qellqanqan leykunacho ninqannömi Israel mayinkunapita diezmuta chaskiyan. Tsaynö chaskiyan Israel mayinkuna paykunanölla Abrahampita aywaraq kaptinmi.† 6 Melquisedecmi itsanqa Leví trïbu mana kaykarpis Abraham entreganqan diezmuta chaskirqan. Diezmuta chaskiskirmi Abrahamta bendisar Tayta Diosta mañakurqan. Tayta Dios awninqanta Abraham chaskishqa kaptinpis Melquisedec bendisaptinmi Abrahampita mas munayyuq kanqanta musyantsik. 7 Musyanqantsiknöpis bendisaq kaqmi bendicionta chaskiqpitapis mas munayyuq.
Leví trïbu sacerdötikunapita Melquisedec mas munayyuq kanqan
8 Tsaynöpis Tayta Diospa palabrancho manami imaypis nintsu Melquisedec wanunqanta. Diezmuta chaskiq sacerdötikunami itsanqa wanuqlla kayan. Tsaynö kaptinmi Leví trïbu sacerdötikunapitapis Melquisedec mas munayyuq kanqanta tantiyantsik.
9 Melquisedecta diezmuta Abraham entregaptinmi Leví trïbu sacerdötikunapis Melquisedecta diezmuta entregaqnö kayarqan. 10 Leví trïbu sacerdötikuna Abrahampita aywaraq karmi manarä yurirpis Melquisedecta entregaqnö kayarqan. Tsaymi Melquisedecta diezmuta Abraham entregaptin Leví trïbu sacerdötikunapitapis Melquisedec mas munayyuq kanqanta tantiyantsik.
Melquisedecnö Jesucristo mandaq sacerdöti kanqan
11 Moisés qellqanqan leykunacho ninqannölla sacrificiuta sacerdötikuna rupatsiyanqanpita salvación kaptinqa sacerdöti kananpä Jesucristuta Tayta Dios manami churanmantsu karqan. Sacerdöti kananpä churaptinmi Jesucristuqa Aarónnötsu sacerdöti kaykan, sinöqa Melquisedecnömi.a
12 Sacerdöti kayta Tayta Dios tsaynö trukatsirmi Moisés qellqanqan leykunatapis trukatsirqan. 13 Sacerdöti kananpäqa Jesucristo manami Leví trïbupitatsu karqan, tsaypa trokinqa juk trïbupitami. Paypa trïbunpitaqa manami pipis altarcho sirvinanpä sacerdöti karqantsu. 14 Señor Jesucristuqa Judá trïbupitami yurishqa. Tsay trïbupita sacerdöti kananpä kaqtaqa Moisés qellqanqan leykunacho manami imatapis nintsu.
15 Moisés qellqanqan leykunata Tayta Dios trukatsinqanta musyantsik Melquisedec sacerdöti kanqannö Jesucristupis sacerdöti kananpä shamushqa kaptinmi. 16 Leví trïbupita mana kaptinpis sacerdöti kananpä payta Tayta Dios churarqan imayyaqpis kawaq kaptinmi. 17 Paypämi Tayta Diospa palabrancho nin: “Qammi imayyaqpis Melquisedecnö sacerdöti kanki”.†
18 Mandaq sacerdöti kananpä Jesucristuta churarmi leycho sacerdötikunapä ninqankunata Tayta Dios trukatsirqan. Tsay leykuna niyanqannö Leví trïbu sacerdötikuna cumpliyaptinpis manami tsaynötsu runakuna perdonta tariyan. 19 Tsay leykunaqa manami pitapis salvantsu. Jesucristumi itsanqa salvamarnintsik Tayta Diospa ñöpanman chätsimantsik.
Jesucristo imayyaqpis sacerdöti kananpä Tayta Dios juranqan
20 Jesucristuta imayyaqpis sacerdöti kananpä churarmi Tayta Dios jurar awnirqan. Leví trïbu sacerdötikunata churarqa manami jurartsu awnirqan. 21 Jesucristutami itsanqa awnir nirqan:
“Tayta Diosmi jurarnin awnishurqayki:
‘Qammi imayyaqpis [Melquisedecnö] sacerdöti kanki’.
Tsaynö awnishunqaykita cumplinanpämi jurarqan.
Awninqantaqa manami qonqanqatsu”.†
22 Tsaynö nir juraptinmi mushuq pactuta Tayta Dios cumplinanpä Jesús garantiantsik kaykan. Mushuq pactuqa mas allimi kaykan Israel runakunawan punta kaq ruranqan pactupitapis.
23 Punta kaq pactuchöqa mandaq sacerdöti wanuptin juknami trokin yaykuq. 24 Jesucristumi itsanqa mana ushakaq kar imayyaqpis mandaq sacerdöti kaykan. 25 Tsaymi payman yärakuqkunata imaypis salvan Tayta Diospa ñöpanman chäyänanpä. Tsaynöpis salvashqa kaqkunapämi Tayta Diosta imaypis mañakuykan.
26 Jesucristo mandaq sacerdöti kaptinmi kushikuntsik. Paymi jutsaynaq santu kar Tayta Dios munanqannö kawarqan. Jutsa ruraq runakunawan purirpis manami imaypis jutsata rurarqantsu. Ciëluchöpis llapanpita mas respitashqami kaykan.
27 Kay patsacho mandaq sacerdötikunaqa kikinkunapa y wakin runakunapa jutsankuna perdonashqa kananpämi† qoyay qoyay uywata pishtaskir altarcho rupatsiyan. Jesucristumi itsanqa jutsantsikpita perdonashqa kanantsikpä juk kutilla kikin wanurqan.
28 Ñöpataqa Moisés qellqanqan leykunacho ninqannö ushakaq y jutsayuq runakunallami mandaq sacerdötikuna kayarqan. Tsaypitanami Tayta Dios jurar kikinpa Tsurinta mandaq sacerdöti kananpä churarqan. Payqa manami ushakaqtsu ni jutsayuqtsu, tsaypa trokinqa imayyaqpis kawaq y jutsaynaq mandaq sacerdötimi.