Corintucho Pablo willakunqan
18
Tsaypitanami Atenaspita aywakur Corinto markaman Pablo charqan. 2 Tsaychömi Aquila jutiyuq Israel runawan reqinakuyarqan. Aquilaqa Ponto provinciacho yuriqmi karqan. Warminpa jutinmi karqan Priscila. Paykuna tsayrämi Italiapita Corintuman chäyashqa kayarqan. Corintumanmi aywakuyarqan Claudio César llapan Israel runakunata Romapita qarquptin. Reqinakuskirmi 3 paykunawan tolduta rurar Pablo tarqan. Pablunöllami Priscilawan Aquilapis toldu rurayta yachayarqan.4 Cada jamay junaq sinagögaman aywarmi Israel runakunata y mana Israel runakunatapis Jesucristupita Pablo yachatsirqan. 5 Macedonia provinciapita Silaswan Timoteo chäyaptinnami aruyninta Pablo jaqiskir qoyay qoyay Tayta Diospa willakuyninta willakurqan. Willakurmi Israel mayinkunata tantiyatsirqan Jesús salvamaqnintsik Cristo kanqanta. 6 Tsaynö willakuptinmi Israel runakuna Pablupa contran shärir imaykata ashlliyarqan. Tsaymi latsapanta tapsikuskirnin Pablo nirqan: “Tayta Dios castigayäshunaykipä kikikikunami jutsayuq kaykäyanki. Noqaqa Tayta Diospa willakuyninta willashqänami. Kananpitaqa mana Israel runakunatanami willashä”.
7 Tsaynö nirmi tsay sinagögacho yachatsinanpa trokinqa Ticio Justupa wayinchöna yachatsirqan. Justuqa mana Israel runa kaykarpis Tayta Diosta cäsukuqmi karqan. Paypa wayinqa sinagöga ñöpanchömi karqan. 8 Tsaycho yachatsiptinmi sinagögacho mandaq runa y tsay runapa wayincho taqkunapis Señor Jesucristuman yärakuyarqan. Tsay runapa jutinmi Crispo karqan. Tsaynöllami Corintucho taq wakin runakunapis Pablo willakunqanta wiyar Jesúsman yärakurnin bautizakuyarqan.
9 Juk paqasmi Pabluta revelacioncho yuripaykur Jesucristo nirqan: “Mana mantsariypa y mana upällakuypa willakuynïta willakuy. 10 Kay markacho salvanäpä kaq runakunaqa atskaqmi kayan. Tsaymi willakuptiki pipis mana yatashunaykipä qamwan kaykäshä”.
11 Tsaynö niptinmi Tayta Diospa willakuyninta yachatsir juk wata y soqta killa Corinto markacho Pablo tarqan.
12 Galión jutiyuq runa Acaya provinciapaa mandaqnin kanqan witsanmi Pablupa contran Israel runakuna shäriyarqan. Tsaymi Pabluta Galiónpa despächunman apaykur 13 niyarqan: “Kay runaqa Tayta Diospa leyninkunata mana cäsukurmi llutanta yachaykätsin”.
14 Pablo parlananpä kaykaptinnami Galión nirqan: “Israel runakuna, kay runa suwakushqa o pitapis wanutsishqa kaptinqa qamkunata atiendïmanmi. 15 Leynikikunapita rimanakuyanqaykitaqa manami musyayta munätsu. Tsaytaqa kikikikuna imanöpis arreglayay”.
16 Tsaynö nirmi despächunpita qarqurqan. 17 Tsaypitanami sinagögacho mandaq Sóstenesta despächu punkucho tsariskir pasaypa maqayarqan. Maqayaptinpis Galióntaqa manami imapis qokurqantsu.
Antioquíaman Pablo kutinqan
18 Tsaypita atska killarämi Corinto markacho Pablo tarqan. Nirkurnami wawqikunapita y panikunapita despidikuskir Cencrea markaman aywarqan. Tsaychönami Tayta Diosta awninqanta cumplir aqtsanta rutukurqan.† Nirkurnami Siria provinciaman Priscilawan y Aquilawan büquiman witsarkur aywakuyarqan.
19 Éfeso markaman chaykurmi Priscilawan Aquila tsaycho quëdakuyarqan. Pablunami Éfesupita manarä päsar sinagögaman yaykuykur Israel runakunata Jesúspita willakurqan. 20 Sinagögacho kaq runakuna paykunawan quëdananpä rugakuyaptinpis Pablo manami munarqantsu. 21 Tsaypa trokinqa paykunapita despidikuskirmi nirqan: “[Pascuapämi Jerusalénman imaykanöpapis chayta munä.] Tayta Dios munaptinqa yapaymi kutimushä”.
Tsaynö nirmi büquiman witsarkur Éfesupita aywakurqan.
22 Cesarea markaman chaykurnami büquipita yarquskir Jerusalénman aywarqan wawqikunata y panikunata watukaq. Tsaypitanami Antioquíaman kutirqan. 23 Tsaycho tarkurnami Galacia y Frigia provinciakunapa yapay kutir markan markan aywar discïpulukunatab shakyätsirqan.
Éfesucho Apolos willakunqan
24 Tsay witsanmi shumaq parlayta yachaq Apolos jutiyuq Israel runa Éfeso markaman charqan. Payqa Alejandría markapitami karqan. Tsaynöpis Tayta Diospa palabranta allimi yacharqan. 25 Tayta Diospa willakuyninta alli yacharpis bautismupä Juan yachatsinqallantami yacharqan. Tsaynö karpis Señor Jesucristupita llapan shonqunwanmi kushishqa yachatsirqan. 26 Sinagögacho pitapis mana mantsariypa willakuykaqta wiyaykurmi Priscilawan Aquila jukläman pushaykur Tayta Diospa willakuyninta masta tantiyatsiyarqan.
27 Acaya provinciaman Apolos aywayta munaptinmi wawqikuna panikuna shakyätsiyarqan. Tsaymi Acayacho kaq wawqikunaman y panikunaman cartakuyarqan chaptin payta chaskiyänanpä. Tsay yärakuqkuna yärakuyänanpämi Tayta Dios kuyapar tantiyatsirqan. Acayaman Apolos chanqanmi Jesucristuman yärakuqkunapä pasaypa alli karqan. 28 Paymi Israel runakunata Tayta Diospa palabranta shumaq yachatsir Jesús salvamaqnintsik Cristo kanqanta tantiyatsirqan.