Éfesucho Pablo willakunqan
19
Corintucho Apolos kaykaptinmi Pabluqa markan markan aywar Éfesuman charqan. Tsaycho discïpulukunata tariskirmi 2 tapurqan: “¿Qamkunaqa Jesucristuman yärakurnin Espíritu Santuta chaskiyashqaykiku?”Tsaymi niyarqan: “Espíritu Santu kanqanta manami imaypis mayayashqätsu”.
3 Tsaymi Pablo yapay nirqan: “Tsaynö kaptinqa ¿pipa yachatsikuyninta cäsukurtä bautizakuyashqayki?”
Niptinmi niyarqan: “Juanpa yachatsikuyninta cäsukurmi bautizakuyashqä”.
4 Pablunami nirqan: “Juanqa runakunata bautizarqan jutsankunata kacharir Tayta Dios munanqannö kawayänanpämi. Tsaynöpis yachatsirqan Jesucristo shamuptin payman yärakuyänanpämi”.†
5 Tsaynö niptinmi Señor Jesucristupa jutincho bautizakuyarqan. 6 Paykunapa umankunata yataykur Tayta Diosta Pablo mañakuptinmi Espíritu Santu paykunaman shamurqan. Tsaymi juk idiömakunata parlar Tayta Dios tantiyatsinqankunata parlayarqan. 7 Tsay runakunaqa chunka ishkaynömi kayarqan.
8 Éfesucho tarmi sinagögaman aywar Tayta Diospa mandakuyninpä kimsa killantin Pablo mana mantsariypa yachatsirqan. 9 Tsaynö yachatsiptinpis wakin runakuna Jesúsman yärakuyta mana munarmi llapanpa ñöpancho Diospa Nänintaa manakaqman churayarqan. Tsaymi Jesúsman yärakuqkunawan sinagögapita yarquskir Tiranno jutiyuq runapa yachatsikuna wayinchöna qoyay qoyay Pablo yachatsirqan. 10 Ishkay watana tsaynö yachatsiptinmi entëru Asia provinciacho Israel runakunapis y mana Israel runakunapis Señor Jesucristupa willakuyninta wiyayarqan.
11 Tsaychömi Tayta Diospa munayninwan milagrukunata Pablo rurarqan. 12 Tsaymi Pablo yatanqan päñukunata y mandilkunatapis qeshyaykaqkunaman apayarqan. Tsaykunata töpatsiyaptinmi qeshyaykaqkuna alliyäyaq y supaykunapis runakunapita yarquyaq.
13 Tsay witsanmi wakin Israel runakunapis puriyarqan runakunapita supaykunata qarqur. Paykunapis Jesúspa jutincho supaykunata qarquyta munarmi niyarqan: “Pablo willakunqan Jesúspa jutinchömi qamta qarqü”.
14 Tsaynö rurayarqan mandaq sacerdöti Escevapa qanchis tsurinkunami. 15 Qarquyta munayaptinmi supay nirqan: “Noqa reqïmi Jesústa. Pablo pï kanqantapis musyämi. Qamkuna ¡pitä kayanki noqata qarqayämänaykipä!”
16 Tsaynö nirmi supay ñakatsinqan runa löcuyar paykunata maqar usharqan. Tsaymi pasaypa yawarllana tsay wayipita qallapächu qeshpir aywakuyarqan. 17 Tsaynö päsanqanta musyaykurmi Éfesucho taq Israel runakuna y mana Israel runakunapis pasaypa mantsakäyarqan. Tsaymi maytsaychöpis runakuna musyayarqan Señor Jesucristo munayyuq kanqanta.
18 Jutsata rurayanqanta tantiyarmi Jesucristuman wakin yärakuqkunapis jutsankunata confesakuyarqan. 19 Tsaynöllami brujyakuyänan mágica librunkunatapis qoriskir llapanpa ñöpancho rupatsiyarqan. Tsay librukunapa chaninta jipiyaptinmi pitsqa chunka waranqa (50,000) jornalpa chanin karqan. 20 Tsaynöpami Tayta Diospa willakuynin munayyuq kanqanta tantiyakur atskaq runakuna criyikuyarqan.
21 Tsaypitanami Pablo yarparqan Jerusalénpa aywananpäqa Macedonia provinciacho y Acaya provinciacho wawqikunata y panikunatarä watukaq aywananpä. Tsaynöllami yarparqan Jerusalénpita Romapa aywananpä. 22 Tsaynö yarparmi Macedonia provinciaman ñöpäyänanpä Timoteuta y Erastuta kacharqan. Paymi itsanqa Asia provinciacho quëdakurqanrä.
Éfesucho Pablupa contran shäriyanqan
23 Tsay witsanmi Diospa Näninpäb willakuyaptin Éfesucho runakuna pasaypa ajanäyarqan. 24 Tsaynö ajanäyarqan Demetrio jutiyuq runa shimita jatipaptinmi. Paymi Artemisac niyanqan diösapa taksha templunkunata qellaypita ruraq. Tsaykunata rantikurmi Demetriuqa aruq mayinkunawan atska qellayta gänayaq. 25 Aruq mayinkunata y paykunanö oficiuyuq runakunatapis qayaskatsirmi nirqan: “Qamkuna musyayankimi kay aruynintsikwan alli gänanqantsikta. 26 Rikayanqaykinöpis y wiyayanqaykinöpis Pablo yachatsirmi nin: ‘Runa ruranqan ïdulukunaqa manami rasunpaypa Diostsu’. Tsaynö yachatsir atskaq runakunatami kay Éfesucho y entëru Asia provinciachöpis criyiykätsin. 27 Tsaynö criyitsiptinqa arunqantsikkunata y diosnintsik Artemisapa templuntapis manakaqmanmi churayanqa. Artemisata entëru Asiacho taqkuna y entëru munduchöpis manami respitayanqanatsu”.
28 Demetrio tsaynö niptinmi aruq mayinkuna pasaypa ajar kutin kutin niyarqan: “¡Diosnintsik Artemisa alabashqa katsun!”
29 Tsaynö niyanqanta wiyarmi tsay markacho taq wakin runakunapis büllata rurayarqan. Pasaypa ajanarmi Gayuta y Aristarcuta coliseuman prësu apayarqan. Gayo y Aristarcuqa Macedoniapitami Pabluta yanapar shayämushqa kayarqan. 30 Runakunata tantiyatsinanpä Pablupis coliseuman aywayta munaptinmi wawqikuna panikuna michäyarqan. 31 Tsay provinciapa wakin autoridäninkunapis Pabluwan reqinakurmi willakatsiyarqan coliseuman mana aywananpä.
32 Coliseucho runakuna juknö juknö parlar büllata rurayaptinmi wakin runakuna imapä tsayman qorikäyanqantapis musyayarqantsu. 33 Tsaycho kaykaq Israel runakunanami Alejandro jutiyuq runata parlamunanpä yaykatsiyarqan. Tsaymi runakunapa puntanman Alejandro yaykuskir upällakuyänanpä makinwan sëñasta rurarqan. 34 Alejandro Israel runa kanqanta musyarmi tsay runakuna ishkay höranö qayaräyarqan: “¡Diosnintsik Artemisa alabashqa katsun!” nir.
35 Tsaynö niyaptinmi markapa mas mandaqnin autoridä upällakuyänanpä sëñasta rurar nirqan: “¡Éfeso runakuna! Maytsaychöpis runakuna musyayanmi Artemisapa templun kay markacho kanqanta. Tsaynöpis musyayanmi ciëlupita ishkimuq Artemisa niraq rumitapis tsararanqantsikta. 36 Tsaytaqa manami pipis ñëgantsu. Llutalla qayaykachar paqtä llutanta rurayankiman. 37 Prësu apayämunqayki runakuna manami templuntsikpita imatapis apayashqatsu ni diosnintsik Artemisatapis manakaqman churayashqatsu. 38 Tsaynö kaykaptinqa Demetrio y aruq mayinkuna kay runakunata demandayta munarqa autoridäkunaman demandayätsun. 39 Imapis willanakunantsikpä kaptinqa llapan autoridäkunata qoriskir sesionta rurashun. 40 Kaynö büllata rurayaptikiqa Roma autoridäkuna contran shäriykanqantsiktami yarpäyanqa. Tsaypita juzgamashqaqa manami ima niytapis kamäpakushuntsu”.
41 Tsaynö niskirmi llapan runakuna aywakuyänanpä nirqan.