Tsaypitanami Greciaman^a chaykur 3 kimsa killa tsaycho tarqan. Tsaypita Siriaman büquiwan kutikunanpäna kaykarmi mayarqan Israel runakuna payta wanutsiyänanpä willanakuyanqanta. Tsaymi büquiwan aywananpa trokinqa chakillapana Macedonia provinciapa päsarqan. 4 Payta wallkirmi aywayarqan Pirrupa tsurin Sópater, Aristarco, Segundu, Gayo, Timoteo, Tíquico y Trófimupis. Sópaterqa Berea markapitami karqan. Aristarcuwan Segunduqa Tesalónica markapitami kayarqan. Gayuqa Derbe markapitami karqan. Timoteo, Tíquico y Trófimunami Asia provinciapita kayarqan. 5 Paykuna puntarmi Troas markacho shuyäyämarqan.^b 6 Levadüraynaq Tanta Mikuna fiesta päsaskiptinmi Filipuspita büquiwan yarquyarqä. Pitsqa junaqta Troasman chaykurmi puntaqkunata taripaskir juk semäna tsaycho kayarqä.

7 Domingu junaqmi Santa Cënata mikuyänäpä wawqikunawan y panikunawan qorikäyarqä. Waraynin tuta aywakunan kaptinmi pullan paqasyaq Pablo yachatsirqan. 8 Yachatsinqan cuartuchömi atska lamparinkunata tsaritsiyarqan. 9 Tsay cuartuqa kimsa kaq pïsuchömi karqan. Ventänanchömi juk chölu Eutico jutiyuq jamaraykarqan. Atska höra Pablo yachatsiptinmi jamaraykanqancho punukaskir ventänapita jeqarpurqan. Tsaymi wanushqatana joqarkuyarqan. 10 Pablo yarpuskirmi tsay chöluta makallakurkur wawqikunata y panikunata nirqan: “¡Ama mantsakäyaytsu! ¡Kawaykanmi!”

11 Qorikäyanqan cuartuman kutirnami Santa Cënata mikuyarqan. Patsa waranqanyaq yachaskatsirmi Pablo aywakurqan. 12 Tsay chölutanami kawaykaqtana wayinman pushayarqan. Kawarimunqanta rikaykurmi llapanpis kushikuyarqan.

13 Troas markapita Asón markayaq chakillapami Pablo aywarqan. Noqakunanami büquiwan puntäyarqä Asóncho Pabluta qoriyänäpä. 14 Asóncho qorikaskirnami llapäkuna büquiwan Mitilene markaman aywayarqä. 15 Mitilenipita aywakurnami waraynin junaq Quío niyanqan isla ñöpanpa päsayarqä. Tsaypita waraynin junaqnami Samos islaman chäyarqä. Tsaypita [Trogilio markacho jamapaskirmi] juk junaqtarä Mileto markaman chäyarqä. 16 Pentecostés fiestapä Jerusalénman imaykanöpapis chayta munarmi Asia provinciacho qoyayta Pablo munarqantsu. Tsaymi Éfesuman mana chayllapana aywakuyarqä.

17 Mileto markaman chaykurnami Éfesucho taq mayor wawqikunata Pablo qayatsirqan. 18 Chaykuyaptinnami nirqan: “Qamkuna musyayankimi kay Asia provinciaman chämunqä junaqpita imanö kawanqätapis. 19 Israel runakuna conträ shäriyaptin ñakarpis waqarpis llapan shonqüwanmi Señor Jesucristuta sirvishqä. 20 Tayta Dios munanqannö kawayänaykipä kaqtaqa runakunapa ñöpanchöpis y wayikikunachöpis llapantami yachatsishqä. 21 Israel runakunata y mana Israel runakunatapis tantiyatsishqämi jutsankunata kacharir Señornintsik Jesucristuman criyikuyänanpä.

22 “Kananqa Espíritu Santu pushamaptinmi Jerusalénman aywaykä. Itsanqa tsayman chaptï ima päsamänanpä kaqtapis manami musyätsu. 23 May markaman aywaptïpis Espíritu Santumi musyatsiman carcelman wichqayämänanpä y ñakatsiyämänanpä kanqanta. 24 Tsayta musyarpis manami llakikütsu. Noqaqa wanunqäyaqmi Señor Jesucristo nimanqannö [kushishqa] willakushä Tayta Dios kuyapäkuq kanqanta.

25 “Qamkuna kaqcho kaykar Tayta Diospa mandakuyninpä willakunqäta wiyamaqkuna, kananpitaqa manami mayqaykipis rikayämankinatsu. 26-27 Tayta Diospa willakuyninta llapantami qamkunata willashqä. Tsaymi mayqaykitapis Tayta Dios juzgar condenayäshuptiki jutsayuqtsu kashä. 28 Tsaynö kaykaptinqa paqtä jutsata rurayankiman. Mayor wawqikuna kayänaykipä Espíritu Santu churaykäyäshuptikiqa mitsikuq runa üshankunata alli mitsinqannö Tayta Diospa iglesianta^† shumaq rikayanki. Paymi iglesianta rantinanpä kikinpa yawarninta jicharqan.

29 “Noqa musyämi aywakuptï llutan yachatsikuqkuna mallaqashqa löbunö shayämunanpä kanqanta. Paykunaqa llutankunata yachatsirmi Tayta Diosman yärakuqkunata pantakätsiyanqa. 30 Tsaynöllami qamkunapitapis llutan yachatsikuqkuna yurir discïpulukunata^c criyitsiyta munayanqa. 31 Tsaynö kananpä kaykaptinqa shumaq cuidakuyay. Yarpäyay kimsa watantin paqaspapis junaqpapis jukniki juknikita waqapaypa yachatsinqäta. 32 [Wawqikuna,] kananqa kuyapäkuq Tayta Diospa munayninmanmi qamkunata kachaykü. Paypa willakuyninmi munayyuq kaykan shumaq tantiyatsiyäshunaykipä. Tsaynöpami llapan salvashqa kaqkunawan juntu herenciata^† chaskiyanki.

33 “Noqa manami pipa qellaynintapis, qorintapis ni latsapantapis munapashqätsu. 34 Musyayanqaykinöpis ministinqäkunapä y noqawan puriqkuna ministiyanqankunapäpis kikïmi arushqä. 35 Tsaynöpami qamkunata yachatsishqä noqanö arur ministiqkunata yanapayänaykipä. Señor Jesucristumi nirqan: ‘Imatapis chaskir kushikunqantsikpitapis mas kushikuypämi kaykan pitapis yanapanqantsik’ ”.

36 Pablo tsaynö yachaskatsirmi paykunawan qonqurikuykur Tayta Diosta mañakurqan. 37 Mañakuyta ushaskiptinmi llapanpis waqarnin payta makallakurkur mutsayarqan. 38 “Mananami rikayämankinatsu” niptinmi pasaypa llakikuyarqan. Tsaypitanami aywakunanpäna büqui kaykanqanyaq pushayarqan.