Tesalónicacho Pablupa y Silaspa contran shäriyanqan
17
Tsaypita Anfípolis y Apolonia markakunapa päsarmi Pabluwan Silas Tesalónica markaman chäyarqan. Tsaycho sinagöga kaptinmi 2 imaypis aywanqannö tsay sinagögaman Pablo aywarqan. Tsaychömi Tayta Diospa palabranta kimsa jamay junaq yachatsirqan. 3 Tsaynö yachatsirmi salvamaqnintsik Cristo wanunqanta y kawarimunqanta tantiyatsirqan. Tsaynöpis nirqan: “Jesúsmi salvamaqnintsik Cristo”.4 Tsaynö niptinmi wakin Israel runakuna Jesucristuman yärakur Pabluwan y Silaswan qorikäyarqan. Tsaynöllami Tayta Diosta cäsukuq mana Israel runakunapis y reqishqa warmikunapis Jesucristuman atskaq yärakuyarqan. 5 Jesúsman mana yärakuq Israel runakunami itsanqa Pabluta chikir mana alli runakunata niyarqan: “Pablupa y Silaspa contran shäriyänanpä runakunata willapäyay”.
Tsaynö willapäyaptinmi Pablutawan Silasta ashirnin atskaq runakuna Jasónpa wayinman ajashqa yaykuyarqan.
6 Tsaycho mana tariykurnami Jasóntawan wakin wawqikunatana autoridäkunaman apaykur niyarqan: “¡Kay runakunaqa llutanta yachatsirmi maytsaypapis puriykäyan! ¡Kananqa kay markamannami chäyämushqa! 7 ¡Jasónmi paykunata patsatsishqa! ‘¡Jesús jutiyuq runami mas munayyuq rey’ nirmi mandamaqnintsik rey Césarpa leyninkunata manakaqman churaykäyan!”
8 Tsaynö niyaptinmi tsaycho runakuna y autoridäkunapis pasaypa ajäkuyarqan. 9 Tsaymi Jasóntawan wakin kaq wawqikunata multata pägaskatsir autoridäkuna kachäyarqan.
Pabluwan Silas Berea markacho willakuyanqan
10 Tsay paqasmi Pablutawan Silasta wawqikuna panikuna Berea markaman kachayarqan. Bereaman chaykurmi sinagögaman yachatsiq aywayarqan. 11 Berea runakunaqa Tesalónica runakunapita mas tantiyakuq karmi Tayta Diospa willakuyninta llapan shonqunkunawan chaskikuyarqan. Pabluwan Silas yachatsiyanqan rasunpaypa kanqanta musyayänanpämi Tayta Diospa palabranta qoyay qoyay yachakuyarqan. 12 Tsay markachöqa atskaq Israel runakuna, mana Israel runakuna y mana Israel reqishqa warmikunapis Jesúsmanmi criyiyarqan.
13 Tayta Diospa willakuyninta Bereachöpis Pablo willakuykanqanta musyarmi Tesalónicacho taq Israel runakuna tsayman aywayarqan. Chaykurnami Pablupa contran shäriyänanpä runakunata willayarqan. 14 Tsaymi wawqikuna panikuna jinan höra Pabluta qeshpitsiyarqan lamar kuchunman. Silaswan Timoteunami Bereacho quëdakuyarqan. 15 Pabluta pushaqkunaqa Atenas markayaqmi chätsiyarqan. Kutikuyaptinnami Pablo nirqan: “Bereaman chaykur Silastawan Timoteuta kayman juklla kachayämuy”.
Atenas markacho Pablo willakunqan
16 Atenascho Silasta y Timoteuta shuyaraqnö purirmi atska ïdulukunata rikar Pablo pasaypa ajanarqan. 17 Tsaymi sinagögaman aywar Israel runakunata y Diosta cäsukuq mana Israel runakunatapis Tayta Diospa willakuyninta tantiyatsiq. Pläzamanpis qoyay qoyay aywarmi runakunata willaq.
18 Tsaychömi Epicúreo y Estoico ninqan yachaq runakunawan parlayaq. Jesúspita willaptin y wanushqakuna kawariyämunanpä kanqanta willaptinmi wakin runakuna niyarqan: “Kay yachaq tukuq runa ¿imatarä parlakunpis?”
Y wakinnami niyarqan: “Kay runaqa mana reqinqantsik dioskunapämi parlan”.
19 Tsaymi mas tantiyatsinanpä tsay runakuna Pabluta pushayarqan autoridäkuna qorikäyanqan Areópago ninqanman. 20 Tsaychömi Pabluta niyarqan: “Qamqa imaypis mana wiyayanqätami yachaykätsinki. Tsaymi imanö kanqantapis shumaq musyayta munayä”.
21 (Atenas runakuna y tsaycho taq jäpa runakunapis mushuq yachatsikuy kaptinqa imaypis wiyayaqmi. Nirkurmi qoyay qoyay tsay wiyayanqankunallata parlayaq.)
22 Tsaymi Areópagucho qorikashqa autoridäkunapa puntanman ichiykur Pablo nirqan: “Atenas runakuna, noqa rikaykämi dioskunata respitar adoraykäyanqaykita. 23 Markapa purirmi ïdulu adorayänan wayikunata, altarkunata y ïdulukunatapis rikashqä. Tsaynöllami juk altarcho rikashqä ‘kay altarqa mana reqinqantsik diospämi’ nir qellqaraykaqta. Tsay mana reqiyanqayki Diospämi willakuykä.
24 “Paymi kay patsata y llapan imaykatapis kamashqa. Ciëlutapis y kay patsatapis munayninchömi tsararan. Tsaymi runakuna rurayanqan templuchöqa tantsu.† 25 Noqantsik manami imatapis payta kamaripantsiktsu. Tsaypa trokinqa paymi kawanantsikpäpis jamaynintsik qaramantsik y llapan munanqantsikkunatapis kamaripämantsik.
26 “Juk runallata kamaskirmi bendicionninta churamurqan atskaqman mirayaptin nacionkuna maytsaychöpis kayänanpä. Paymi destinarqan tsay nacionkuna imayyaq kayänanpä y kuchunkuna may maypa kananpäpis. 27 Tayta Diosmi tsaynö kamakätsishqa imaykanöpapis payman yärakunantsikpä. Payqa manami noqantsikpita karuchötsu kaykan, sinöqa ñöpantsikchömi. 28 Tayta Dios yanapamashqarämi kawantsik y purintsikpis. Marka mayikipis shumaq yarpachakuskirmi qellqar nirqan: ‘Llapantsikpis paypa wamrankunami kaykantsik’.
29 “Tayta Diospa wamran kaykarqa ama yarpäshuntsu qoripita, qellaypita o rumipita rurashqa ïdulukunanö kanqanta. Tsaykunataqa runakuna kikinpa yarpayllankunapitami rurayan. 30 Runakuna mana musyarnin ïdulukunata rurayanqanpita Tayta Dios manami castigarqantsu. Kananqa maytsaycho taq runakunatami nin ïdulukuna adorayta kacharir pay munanqannöna kawayänanpä. 31 Llapan runakunata mana janan shäriypa juzgananpämi† Tayta Dios juk runata akrashqa. Tsay runa pï kanqanta musyanantsikpämi wanunqanpita kawaritsimushqa”.
32 Wanunqanpita kawarimunqanta Pablo niptinmi wakin runakuna asipäyarqan. Wakin runakunanami niyarqan: “Juk junaqmi masta tantiyatsiyämänaykipä qayayäshayki”.