Pablutawan Silasta Timoteo wallkinqan
16
Tsaypitanami Derbe y Listra markakunaman Pabluwan Silas chäyarqan. Listra markachömi Timoteo jutiyuq juk discïpulu tarqan. Timoteupa taytan mana Israel runa kaptinpis mamanqa Jesucristuman yärakuq Israel warmimi karqan. 2 Timoteo alli chölu kanqantami Listra y Iconio markakunacho taq wawqikuna panikuna parlayaq.3 Timoteupa taytan mana Israel runa kaptinmi pïmaypis musyayarqan Timoteo señalanni kanqanta. Tsaymi Pablo pushayta munar tsay kinraycho taq Israel runakuna mana jamuräyänanpä Timoteuta señalatsirqan. 4 Tsaypita markan markan purirmi wawqikunata y panikunata willayarqan apostolkuna y mayor wawqikuna Jerusaléncho willanakur niyanqanta cumpliyänanpä.† 5 Tsaynöpami Jesucristuman shumaq yärakur wawqikuna panikuna qoyay qoyay masrä atskayäyarqan.
Macedonia runa qayakamuqta Pablo revelacioncho rikanqan
6 Asia provinciaman willakuq aywayta munayaptinpis Espíritu Santu manami munarqantsu. Tsaynami Galaciapa y Frigiapa päsayarqan. 7 Misia partiman chaykur Bitinia provinciapa aywayta yarpäyaptinpis Jesúspa Espïritun tsaypa aywayänanta manami munarqantsu. 8 Tsaymi Misia partipa päsar Troas markaman chäyarqan. 9 Juk paqasnami revelacioncho Pablo rikarqan Macedonia provinciapita juk runa ichirkur qayakamuqta: “Taytay, yanapayämänaykipä Macedoniaman shayämuy”.
10 Revelacionta rikanqanta willayämaptinmi tantiyayarqäa tsay markakunamanpis alli willakuyninta chätsiyänäta Tayta Dios munanqanta. Tsaymi Macedoniaman aywayänäpä juklla kamarikuyarqä.
Filipos markacho willakuyanqan
11 Troaspita büquiwan aywarmi Samotracia islaman chäyarqä. Waraynin junaqnami Neápolis markaman chäyarqä. 12 Tsaypitanami Filipos markaman chäyarqä. Filipos markaqa Macedonia provinciacho wakin markakunapita mas jatunmi kaykan. Tsaychöqa Roma runakunami täyan. Juk ishkay junaqmi tsaycho qoyäyarqä.
13 Tayta Diosta mañakuyänanpä imaypis mayu kuchunman qorikäyanqanta musyarmi jamay junaqcho markapita yarqur tsayman aywayarqä. Tsaycho warmikuna qorikashqa kaykaqtami Tayta Diospa willakuyninta willayarqä. 14 Tsaychömi Tiatira markapita Lidiapis kaykarqan. Payqa granäti tëlakunatami rantikuq. Mana Israel warmi karpis Tayta Diostami cäsukuq. Lidiata Tayta Dios tantiyatsiptinmi Pablo willakunqanman criyikurqan. 15 Paypis y wayincho taqkunapis bautizakuskirmi rugakur niyämarqan: “Señor Jesucristuman yärakuq mayiki kaykaptïqa patsakuyänaykipä wayïman shayämuy”.
Tsaynö niptinmi wayinman aywayarqä.
Pablutawan Silasta carcelman wichqayanqan
16 Juk kutimi Tayta Diosta mañakuq aywayanqächo supaypa munayninwan suerti qatiq jipashwan tinkuyarqä. Tsay jipashmi patronninkunata atska qellayta gänatsirqan. 17 Paymi Pablupa y noqakunapa qepäkunata shamur jinchi nirqan: “¡Kay runakunaqa munayyuq Tayta Diostami sirviyan! ¡Paykunami tantiyatsiyäshunki imanö salvakuyänaykipä kanqantapis!”
18 Tsaynö qoyay qoyay qatiräyämaptinmi Pablo ajanar jipashcho kaykaq supayta nirqan: “¡Kay jipashpita yarqunaykipämi Jesucristupa jutincho qamta nï!”
Tsaynö niptinmi jinan höra supay yarqurqan.
19 Tsaymi jipashpa patronninkuna qellayta manana gänayänanpä kanqanta tantiyar Pablutawan Silasta prësu tsariskir autoridäkuna juzgayänanpä pläzaman apayarqan. 20 Autoridäkunaman chaykatsirmi niyarqan: “Kay Israel runakunami marka mayintsikkunata ajanaykätsiyan. 21 Israel runakunapa costumbrinkunata rurayänanpämi markantsikcho yachaykätsiyan. Noqantsik Roma runa kaykarqa manami tsay costumbrinkunata rurashwantsu”.
22 Tsaynö niyaptinmi llapan runakuna Pablupa y Silaspa contran shäriyarqan. Tsaymi autoridäkuna niyarqan Pablupa y Silaspa latsapankunata jipipuskir wiruyänanpä. 23 Nirkurmi carcelman wichqaskatsir shumaq täpananpä prësukuna cuidaq wardiata niyarqan. 24 Tsaynö niyaptinmi mas ruri kaq calapösuman wichqaskir chakinkunata cëpumanb ullkatsirqan.
25 Pullan paqasnö kaykaptinmi Pabluwan Silas Tayta Diosta mañakur alabayarqan. Tsaytami wakin kaq prësukunapis wiyaparäyarqan. 26 Tsay höra illaqpita patsa pasaypa kuyur carceltapis kuyutsiptinmi llapan punkukunapis kichakaskiyarqan y prësukuna wataräyanqan cadënakunapis paskakaskiyarqan. 27 Prësukuna cuidaq wardianami rikcharkur punkukuna kicharaykaqta tarirqan. Tsaymi prësukuna qeshpiyanqanta yarpar espädanwan wanutsikuyta munarqan. 28 Pablunami jinchi nirqan: “¡Ama wanutsikuytsu! ¡Llapäkunami kaykäyä!”
29 Tsaynö niptinmi aktsita mañakuskir Pabluwan Silas kaykäyanqanman cörrilla yaykur puntankunaman tsuktsukyarrä qonqurikuykurqan. 30 Carcelpita jipiskamurmi tapurqan: “Taytakuna, salvakunäpä ¿imatatä ruräman?”
31 Paykunanami niyarqan: “Señor Jesucristuman yärakuy. Payman yärakurqa qampis y wayikicho taqkunapis salvakuyankimi”.
32 Tsaypitanami tsay wardiata y wayincho taqkunatapis Señor Jesucristupa willakuyninta willayarqan. 33 Tsay paqasmi wardiaqa Pablupa y Silaspa qerinkunata mayllaskir jampirqan. Nirkurmi paypis y wayincho taqkunapis bautizakuskir 34 wayinman pushaykur mikuyta qararqan. Tayta Diosman yärakuyänanpä tantiyakunqanpitami wayincho taqkunawan pasaypa kushikuyarqan.
35 Waraynin tutanami Pablutawan Silasta jipiyänanpä autoridäkuna wardiakunata kachayarqan. 36 Tsaymi prësukuna cuidaq wardia Pabluta nirqan: “Autoridäkunami willakatsiyämushqa qamkunata jipinäpä. Kananqa añawna aywakuyay”.
37 Pablunami wardiakunata nirqan: “Roma runa kaykäyaptïmi manarä juzgayämar llapanpa puntancho wiruyämashqa y kay carcelman wichqatsiyämashqa. Kananqa ¿pakayllapa jipiyämaytaku munaykäyan? ¡Jipiyämänanpä kikinkunarä shayämutsun!”
38 Tsaynö ninqantami wardiakunaqa autoridäkunata willayarqan. Roma runa kayanqanta musyaykurmi autoridäkuna mantsariyarqan. 39 Tsaymi Pablo y Silas kaqman aywaykur perdonta mañakuyarqan. Nirkurnami carcelpita jipiskir tsay markapita aywakuyänanpä rugayarqan. 40 Carcelpita yarquskirmi Lidiapa wayinman aywayarqan. Tsaycho wawqikunata y panikunata shakyarkatsirmi Filipos markapita aywakuyarqan.