Jerusaléncho willanakuyanqan
15
Tsay witsanmi Judeapita Antioquíaman aywaykur wakin runakuna wawqikunata yachatsir niyarqan: “Moisés qellqanqan leykuna ninqannö† mana señalakurqa manami salvakuyankitsu”.2 Tsaynö yachatsiyaptinmi Pabluwan Bernabé paykunawan pasaypa rimanakuyarqan. Tsaymi Antioquía wawqikuna panikuna willanakuskir Pabluta, Bernabéta y wakin wawqikunatapis Jerusalénman kachayarqan apostolkunata y mayor wawqikunata tapuyämunanpä.
3 Jerusalénpa aywaqnö Feniciapa y Samariapa päsarmi wawqikunata panikunata willayarqan mana Israel runakunapis Jesucristuman yärakuyanqanta. Tsaynö willayaptinmi llapanpis kushikuyarqan.
4 Jerusalénman chäyaptinnami apostolkuna, mayor wawqikuna y tsaycho kaykaq llapan wawqikuna panikunapis paykunata kushishqa chaskiyarqan. Tsaypitanami Pabluwan Bernabé willakuyarqan markan markan puriyaptin Tayta Dios yanapanqanta. 5 Tsaymi Jesúsman yärakuq wakin fariseukuna contran shärir niyarqan: “Jesúsman yärakurpis mana Israel runakuna señalakuyätsun y Moisés qellqanqan leykunata cumpliyätsun”.
6 Tsaynö niyaptinmi apostolkuna y mayor wawqikunapis qorikaykur willanakuyarqan. 7 Pasaypa rimanakuyaptinmi Pedro ichirkur nirqan: “Wawqikuna, musyayankimi mana Israel runakuna Jesucristuman manarä yärakuyaptin willakuyninta willakunäpä Tayta Dios akramanqanta.† 8 Tayta Diosqa musyanmi runapa shonqun imata yarpanqantapis. Tsaymi rasunpaypa yärakuyanqanta musyanantsikpä noqantsikman kachamunqannö† paykunamanpis Espíritu Santuta kachamushqa.† 9 Tsaynöpami musyantsik Jesucristuman yärakuq kaqtaqa Israel runa o mana Israel runa kaptinpis Tayta Dios shonqunkunata purificar salvanqanta.
10 “Tsaynö kaykaptinqa ¿imanirtä Tayta Diosta ajanätsir discïpulukunataa nikäyanki Moisés qellqanqan leykunata cumpliyänanpä? Tsay leykunataqa unay castantsikkuna ni kikintsikpis manami cumpliyta kamäpakushqantsiktsu. 11 Israel runa kashqapis o mana Israel runa kashqapis Señor Jesucristo kuyapämarnintsikmi salvamantsik”.
12 Pedro tsaynö niptinmi tsaycho kaykaq runakuna upällakuyarqan. Tsaynami Pabluwan Bernabé willakuyarqan mana Israel runakuna kaqchöpis milagrukunata rurayänanpä Tayta Dios yanapanqanta.
13 Tsaynö willakur ushaskiyaptinmi Santiago nirqan: “Wawqikuna, wiyayämay. 14 Simónmib willamashqantsik mana Israel runakunata willapaptin Tayta Dios salvanqanta. 15 Tsaynö kananpämi profëtakuna qellqayanqanchöpis kaynö nin:
16 “ ‘Tsaypita kutimurmi Davidpa juchushqa wayinta yapay shäritsishä.c
Unay kanqannö yapay kananpämi juchushqa kaqkunata allitsashä.†
17 Tsaynö rurashä llapan runakunapis ashiyämänanpämi.
Noqa akranqä mana Israel runakunapis noqamannami yärakayämunqa.
18 Noqa Tayta Diosmi tsaynö kananpä nï.
Tsaynö kananpä unaypita patsami musyatsirqä’.†
19 “Tsaymi noqa nï: Mana Israel runakunapis Jesucristuman yärakuyaptin ima tsapatapis ama churapäshuntsu. 20 Tsaypa trokinqa cartakushun ïdulukunapä pishtayanqan aytsata mana mikuyänanpä,† fornicación jutsata mana rurayänanpä, wanushqa uywakunapa aytsanta mana mikuyänanpä y uywapa yawarnintapis mana mikuyänanpä.† 21 Tsaykunata cumpliyänanpäqa unaypita patsami Moisés qellqanqan leykunata cada markacho yachatsiyan. Tsaynöllami cada jamay junaq sinagögakunacho liyiyan”.
Jerusalénpita cartakuyanqan
22 Tsaynö niptinmi apostolkuna, mayor wawqikuna y llapan wawqikuna panikunapis kushikuyarqan. Tsaymi Pabluwan Bernabé Antioquíaman kutiyaptin wallkiyänanpä ishkay wawqikunata akrayarqan. Tsay wawqikunami kayarqan Judas y Silas. Judaspa jukaq jutinmi karqan Barsabás. Judasta y Silastami llapan wawqikuna panikuna respitayaq. 23 Paykuna apayanqan cartachömi nirqan:
Antioquíacho, Siriacho y Ciliciacho kaykaq mana Israel wawqikuna panikuna, qamkunapämi apostolkuna, mayor wawqikuna y Jerusaléncho kaykaq wawqikuna panikunapis kay cartata cartakayämü. Salüdükunatami apatsiyämü.
24 Musyayashqämi wakin wawqikuna Jerusalénpita shamur llutankunata yachatsikur llakikatsiyäshunqaykita. [Paykunaqa nikäyan Moiséspa leyninta cumplir señalakuyänaykipä kanqantami.] Paykunata manami noqakunatsu kachayämushqä. 25 Tsayta musyarmi llapäkuna willanakuskir kuyay wawqintsik Pabluwan y Bernabéwan ishkay wawqikunata kachaykäyämü. 26 Pabluwan Bernabémi wanuytapis mana mantsariypa Señornintsik Jesucristupa willakuyninta willakuykäyan. 27 Paykunawanmi Judasta y Silasta kachaykäyämü kay cartacho qellqayämunqäta tantiyatsiyäshunaykipä.
28 Manami noqakunapis ni Espíritu Santupis qamkunata obligayätsu Moisés qellqanqan leykunata cumpliyänaykipä. 29 Itsanqa ïdulukunapä pishtayanqan aytsata, wanushqa uywakunapa aytsanta y uywapa yawarninta ama mikuyaytsu. Tsaynöpis fornicación jutsata ama rurayaytsu. Kay ninqäkunata cumpliyaptikiqa allimi kanqa. Aywallä.
30 Despachayaptinmi Judaswan Silas Antioquíaman chaykur wawqikuna panikuna qorikaskiyaptin apayanqan cartata entregayarqan. 31 Tsay cartata liyipäyaptinmi llapan kushikuyarqan. 32 Judaswan Silaspis profëta karmi imaykanöpa tantiyatsir wawqikunata panikunata shakyätsiyarqan. 33 Tsaycho atska junaq qoyaskiyaptinnami Tayta Diosta mañakuskir Jerusalénman kutikuyänanpä wawqikuna panikuna despachayarqan. 34 [Tsaynö kaptinpis Silasqa tsaychömi quëdakurqan.] 35 Pabluwan Bernabépis Antioquíacho quëdarmi Jesucristupa alli willakuyninta wakin wawqikunawanpis yachatsiyarqan.
Pablo yapay willakuq aywanqan
36 Tsaypita atska killatanami Bernabéta Pablo nirqan: “Jesucristupa willakuyninta willakunqantsik markakunaman kutir wawqikuna panikuna imanö kayanqantapis musyamushun”.
37 Tsaynami Bernabéqa Marcos niyanqan Juanta pushayta munarqan. 38 Pablumi itsanqa munarqantsu, Panfiliapita† kachariykur kutimushqa kaptin. 39 Tsaymi Pabluwan Bernabé pasaypa rimanakur rakikäyarqan. Bernabémi Marcusta pushakurkur büquiwan Chipriman aywarqan. 40 Pablunami wallkinanpä Silasta akrarqan. Nirkurmi wawqikuna panikuna Tayta Diosta mañakuskir kachayaptin paykunapis aywayarqan. 41 Siria y Cilicia provinciakunacho markakunaman charmi Pabluwan Silas wawqikunata panikunata shakyätsiyarqan.