3 Contran shäriyaptinpis Pabluwan Bernabéqa Tayta Diosman yärakurmi atska junaq mana mantsariypa willakuyarqan. Salvamänapä kaq willakuynin rasunpaypa kanqanta musyayänanpämi Tayta Dios paykunata yanaparqan milagrukunata rurayänanpä.

4 Tsaynö kaptinpis tsay markacho taq runakuna kikinpura chikinakurmi wakinqa Israel runakunapa janan shäriyarqan y wakinna apostolkunapa janan shäriyarqan. 5 Tsaymi Israel runakuna y mana Israel runakunapis apostolkunata saqmaypa wanutsiyänanpä autoridäkunawan willanakuyarqan. 6 Tsayta musyaykurmi Pabluwan Bernabé qeshpir aywakuyarqan Listraman, Derbiman y Licaoniacho kaq wakin markakunamanpis. 7 Tsay markakunachömi Tayta Diospa alli willakuyninta willakuyarqan.

8 Listra markachömi yurinqanpita patsa mana puriq weqru runa karqan. Paymi jamaraykarqan 9 Pablo parlanqankunata wiyar. Payta rikaykurmi alliyänanpä Tayta Diosman yärakuykanqanta Pablo tantiyaskir 10 jinchi nirqan: “¡Shärir shumaq ichiy!”

Tsaynö niptinmi juklla ichirkur puriyta qallaykurqan.

11 Tsayta rikaykurmi runakuna kikinkunapa idiömancho niyarqan: “¡Dioskunami runa tukullar noqantsikman shayämushqa!”

12 Tsaymi Bernabéta niyarqan Zeus kanqanta. Y Pablutana willakuq kaptin Hermes kanqanta niyarqan.^a 13 Tsay marka yaykunachömi Zeus niyanqan diosta adorakuyänan templu karqan. Apostolkunata adorayänanpä törukunata pishtar rupatsiyta munayaptinmi tsay templucho sirviq sacerdöti waytan wallqashqata törukunata marka punkuman qatirqan.

14 Tsayta tantiyaskirmi apóstol Pabluwan apóstol Bernabé latsapankunata rachiskir^† runakuna kaqman cörrilla aywaykur niyarqan: 15 “¡Taytakuna, ama tsayta rurayaytsu! Noqakunapis qamkunanö runallami kayä. Shayämushqä manakaq dioskunata kacharir imayyaqpis kawaq Tayta Diostana adorayänaykipä tantiyatsiqmi. Paymi ciëluta, kay patsata, lamarta y llapan imaykatapis kamashqa. 16 Ñöpataqa kikinkuna munayanqannö kawayänanpämi runakunata Tayta Dios kachaykurqan. 17 Tsaynö kacharirpis pïmaytami tantiyatsin rasunpaypa kaq Dios kanqanta y kuyakuq kanqanta. Paymi mikuynikikuna alli wayunanpä tamyata tamyatsimun y kushishqa kawanantsikpäpis mikuyta kamaripämantsik”.

18 Tsaynö nir tantiyatsiptinpis Pabluta y Bernabéta mana adorayänanpä ajatarämi tantiyayarqan.

19 Tsaypitanami apostolkunata chikiq Israel runakuna Antioquíapita y Iconiupitapis Listraman chäyarqan. Pablupa contran shäriyänanpä willapäyaptinmi Pabluta pitiqpä saqmayarqan. Wanushqana kanqanta yarparmi qarachashqa apaykur markapita jukläman jitaskiyarqan. 20 Tsaycho discïpulukuna juntaparaykäyaptin kawaskamurmi markaman Pablo kutirqan. Tsaypita warayninnami Derbe markaman Bernabéwan aywakuyarqan.

21 Derbiman chaykur alli willakuyta willakuyaptinmi atskaq runakuna Jesúsman criyikurnin discïpulunkunana kayarqan. Tsaypitanami kutiyarqan Listra, Iconio y Antioquía markakunaman. 22 Tsay markakunaman chaykurmi Jesúspa discïpulunkunata^b mana ajayaypa yärakuyänanpä shakyätsir niyarqan: “Tayta Diospa mandakuyninman yaykunantsikpäqa imayka ñakaytarämi päsashun”.

23 Tsaynöllami wawqikunata y panikunata yanapayänanpä cada iglesiacho mayor wawqikunata churayarqan. Nirkurnami ayunar y Tayta Diosta mañakur yärakuyanqan Señor Jesucristupa makinman kachaykuyarqan.

24 Pisidia provinciapita kutirnami Panfilia provinciamanna chäyarqan. 25 Perge markachöpis Tayta Diospa willakuyninta willakuskirmi Atalia markaman aywayarqan. 26 Nirkurmi büquiwan Antioquíaman kutiyarqan. Antioquíapitami ñöpatapis wawqikuna panikuna willakur puriyänanpä kachashqa kayarqan. Kacharmi Tayta Diosta mañakuyarqan paykunata yanapananpä. 27 Antioquíaman chaykurnami wawqikuna panikuna qorikäyaptin Tayta Dios alli yanapanqanta willayarqan. Tsaynöllami willayarqan mana Israel runakunapis Jesucristuman yärakuyänanpä Tayta Dios yanapanqanta. 28 Pabluwan Bernabé tsaycho unaymi discïpulukunawan täkuyarqan.