Bernabéta y Sauluta Espíritu Santu akranqan
13
Antioquía iglesiachömi profëtakuna y yachatsikuqkuna kayarqan Bernabé, Yana Runa niyanqan Simón, Cirenipita kaq Lucio, Manaén y Saulupis. Manaénwan rey Herodesqa tsay wayillacho wiñaqmi kayarqan. 2 Juk junaq Tayta Diosman yärakuqkuna ayunar alabayaptinmi Espíritu Santu nirqan: “Bernabéta y Sauluta churayay willakuynïta willakur puriyänanpä. Tsaypämi paykunata qayashqä”.3 Ayunaskirnami Bernabépa y Saulupa umanman makinkunata churar Tayta Diosta mañakuyarqan. Tsaypitanami paykunata despachayarqan.
Chipricho willakuyanqan
4 Espíritu Santu tsaynö kachaptinmi Bernabé y Saulo Seleucia markaman chäyarqan. Tsaypitanami büquiman witsarkur Chipre islaman aywayarqan. 5 Salamina markaman chaykurmi sinagögakunacho Tayta Diospa willakuyninta willakuyarqan. Marcos niyanqan Juanpis paykunata yanaparmi purirqan.
6 Chipripa päsar willakurmi Pafos markaman chaykur Barjesús jutiyuq Israel runata tariyarqan. Payqa profëta tukuq brüjumi karqan. 7 Tsay brüjumi Chipripa mandaqnin Sergio Pauluta yanapar purirqan. Sergio Pauluqa alli yarpayyuq runami karqan. Tayta Diospa willakuyninta wiyayta munarmi Bernabéta y Sauluta qayatsirqan. 8 Tsay brüjunami paykunapa contran shärir Sergio Pauluta micharqan willakuyanqanta mana chaskinanpä. Barjesústaqa brüju kaptinmi Elimasa niyaq.
9 Tsaynö michaptinmi Saulo ajanarqan. (Saulupaqa jukaq jutinmi Pablo karqan.) Tsaymi rikaraskir Espíritu Santupa munayninwan 10 nirqan: “¡Qamqa diablu munanqanta rurarmi Tayta Diospa contran kaykanki! ¿Imayyaqtä runakunata engañar Tayta Diospa willakuqnin tukunki? 11 Tsaynö kanqaykipitami Tayta Diospa castïgunwan qaprayar juk tiempuyaq atsikyay patsata rikankitsu”.
Tsaynö niptinmi jinan höra qaprayaskirqan. Maypapis aywayta mana kamäpakurmi janchayänanpä runakunata rugakurqan. 12 Qaprayanqanta rikaykur y Diospa willakuynin shumaq kanqanta tantiyarmi Sergio Paulo criyirqan.
Pisidiacho kaq Antioquía markacho willakunqan
13 Tsaypitanami büquiman yarkurkur Pafos markapita Panfiliacho kaykaq Perge markaman yanapaqninkunawan Pablo aywarqan. Tsaycho paykunata jaqiykurmi Marcos niyanqan Juan Jerusalénman kutirqan. 14 Perge markapita aywarmi Pisidiacho kaq Antioquía markaman Bernabéwan Pablo chäyarqan. Jamay junaq kaptinnami sinagögaman aywayarqan. 15 Leykunata y profëtakuna qellqayanqanta liyir ushaskiptinmi sinagögacho mandaqkuna Pabluwan Bernabé jamaraykäyanqanman juk runata kachayarqan ninanpä: “Wawqikuna, imallapis yachatsiyämänaykipä kaptinqa yachaykatsiyällämay”.
16 Tsaymi Pablo ichirkur runakuna upällakuyänanpä makinta joqarkur nirqan: “Israel runakuna y Tayta Diospita mantsapakuq mana Israel runakunapis, yachatsinqäta shumaq wiyayämay. 17 Adoranqantsik Tayta Diosshi unay castantsikkunata akraykur Egiptucho jäpa kayaptinpis jatun nación kayänanpä yanapanä.† Nirkurshi milagrukunata rurar Egiptupita jipimunä.† 18 Chusku chunka (40) watanö tsunyaq jirkakunapa purir mana cäsukuyaptinpis pacienciakunäshi.† 19 Tsaypita Canaánman chaykatsirnashi qanchis nacionkunata† ushakaskatsir herenciankuna rikatsinä.† 20 Egiptucho kayanqanpita Canaáncho herenciankunata chaskiyanqanyaq chusku pachak pitsqa chunka (450) watanöshi päsanä.
“Canaánchönashi profëta Samuel† kawanqan witsanyaq mandakuyänanpä juezkunata Tayta Dios churanä.† 21 Tsaypitanashi mandaqnin rey kananpä runakuna mañakuyaptin† Benjamín trïbu Cispa tsurin Saúlta churanä.† Payshi chusku chunka (40) wata rey kanä. 22 Tsaypitanashi Saúlta jipiskir Davidtana rey kananpä churanä. Paypäshi Tayta Dios ninä: ‘Isaípa tsurin Davidqa shonqüpänömi kaykan. Payqa llapan ninqäkunatami cäsukunqa’.†
23 “Tsaypitanami Tayta Dios awninqannölla rey David castapita salvamaqnintsik Jesús Israelcho yurirqan. 24 Manarä Jesús willakuptinmi Israel runakunata Bautizaq Juan willarqan jutsankunata kacharir bautizakuyänanpä.† 25 Tsaypita wanunanpä wallkallana pishiykaptinmi Juan nirqan: ‘¿Pï kanqätatä yarpäyanki? Manami noqatsu Cristo kä. Cristuqa qepätarämi shamunqa.† Noqaqa llanqi watunta paskanalläpäpis manami välïtsu’.†
26 “Abrahampita aywaraq Israel wawqikuna y Tayta Diospita mantsapakuq mana Israel runakuna, noqantsikmanmi salvashqa kanantsikpä alli willakuy chämushqa. 27 Jerusaléncho taq runakuna y autoridäninkunaqa profëtakuna qellqayanqanta cada jamay junaq sinagögacho liyirpis Jesúspä qellqayanqanta manami tantiyayarqantsu. Tsaymi profëtakuna qellqayanqanta cumplir Jesústa wanutsiyarqan. 28 Jutsaynaq kaykaptinmi Jesústa wanutsinanpä Pilatuta rugakuyarqan.† 29 Profëtakuna qellqayanqannöllami llapanpis päsarqan. Wanuskiptinnami cruzpita jipiskir pampayarqan.† 30 Wanutsishqa kaptinpis Tayta Diosmi kawaritsimushqa. 31 Kawarirkamurmi Galileapita Jerusalénman† paywan aywaq discïpulunkunata atska kuti yuriparqan. Paykunami Jesúspita kanan willakuykäyan.
32 “Tsaynöllami noqakunapis Tayta Diospa willakuyninta willakuykäyä. Unay castantsikkunata awninqantami 33 Tayta Dios cumplishqa. Tsaynö cumplirqan Jesucristuta kawaskatsimurmi. Ishkay kaq salmuchöpis Jesucristupä kaynömi qellqaraykan:
“ ‘Qamqa tsurïmi kanki.
Kanan junaqpitami taytayki kä’ nir.†
34 Jesucristo kawarimur imaypis manana wanunanpä kanqantaqa Tayta Dios kaynömi nin:
‘Davidta awninqä santu bendicionkunatami qamta qarashayki.
Tsay awninqätami imaypis cumplishä’.†
35 Tsaynöllami juk salmuchöpis qellqaraykan:
‘Santu sirviqniki kaptïmi sepultüracho cuerpü ismunantapis munankitsu’.†
36 “Davidqa manami kikinpätsu tsaynö qellqarqan. Tayta Dios munanqanta cumpliskir David wanukuptinmi unay castankuna pamparäyanqancho paypapis cuerpun ushakarqan. 37 Jesústami itsanqa Tayta Dios kawaritsimushqa. Tsaymi paypa cuerpunqa sepultüracho ushakashqatsu.
38 “Wawqikuna, ninqäta shumaq tantiyakuyay. Jesucristo kayninpami jutsantsikkunata Tayta Dios perdonamantsik. 39 Llapantapis payman yärakuq kaqtaqa Tayta Diosmi jutsaynaqta chaskin. Moisés qellqanqan leykunata cumplinqanpitaqa manami pipis salvakuntsu. 40 Paqtä profëtakuna qellqayanqancho ninqannö qamkunatapis päsayäshunkiman. 41 Paykuna qellqayanqanmi nin:
“ ‘Mana yärakuqkuna, pasaypa mantsakäyay.
Pasaypa mantsariypä kaqkunata ruranäpänami kaykä.
Imanö ruranäpä kanqanta willayäshuptikipis manami criyiyankitsu’ ”.†
42 Sinagögapita Pabluwan Bernabé yarquskiyaptinmi [mana Israel runakuna] rugayarqan jukaq jamay junaqpis yapay yachatsiyänanpä. 43 Pabluwan y Bernabéwanmi Israel runakuna y Diosta cäsukuq mana Israel runakunapis atskaq aywayarqan. Paykunatami Pablo shakyätsirqan kuyapäkuq Tayta Diosman imaypis yärakuyänanpä.
Mana Israel runakunatana willayänanpä ninqan
44 Jukaq jamay junaqnami tsay markacho cäsi llapan runakuna Tayta Diospa willakuyninta wiyayta munar sinagögaman qorikäyarqan. 45 Atskaq runakunata rikaykurmi wakin Israel runakuna Pabluta chikirnin parlanqanta manakaqman churayarqan.
46 Tsaymi Pabluwan Bernabé mana mantsariypa niyarqan: “Israel runakuna kayaptikimi qamkunata Tayta Diospa willakuyninta puntata willayashqä. Tsaynö willayaptïpis mana ushakaq kawayta manami chaskiyta munayankitsu. Mana chaskiyaptikimi mana Israel runakunatana willayäshä. 47 Paykunata willanantsikpämi Tayta Dios nishqa:
“ ‘Maytsay nacionkunapäpis aktsi kanaykipämi churashqä.
Tsaynöpami maytsaychöpis runakuna salvakuyanqa’ ”.†
48 Tsaynö parlayanqanta wiyarmi mana Israel runakuna kushikur Tayta Diosta alabayarqan. Tsaynöpami mana ushakaq kawayta tariyänanpä Tayta Dios akranqankuna llapanpis Jesucristuman yärakuyarqan.
49 Tsaymi Tayta Diospa willakuyninta Pabluwan Bernabé markan markan willakuyarqan. 50 Tsaynö willakuyaptinmi paykunapa contran shäriyänanpä Tayta Diospita mantsapakuq alli rikashqa warmikunata y respitashqa runakunata Israel runakuna willayarqan. Contran shärir tsay markakunapita qarquyaptinmi 51 chakinkunacho kaykaq polvuta tapsikuskir† Iconio markamanna Pabluwan Bernabé aywakuyarqan. 52 Jesucristupa discïpulunkunaqab Espíritu Santupa munaynincho karmi kushishqa kawayarqan.