Carcelcho Pedro wichqaranqan
12
Tsay witsanmi Jesucristuman yärakuqkunata castigatsiyta munar rey Herodes wakinta prësu tsaritsirqan. 2 Tsaynöllami apóstol Juanpa wawqin Santiagutapis espädawan wanutsiyänanpä mandarqan. 3 Wanutsinqanpita Israel runakuna kushikuyanqanta rikarmi Pedrutapis prësu tsaritsirqan. Tsayqa karqan Levadüraynaq Tanta Mikuna fiestaa witsanmi. 4 Pascua fiesta† ushayrä llapan runakunapa ñöpancho juzgayta munarmi carcelman wichqatsirqan. Nirkurmi täpayänanpä chusku grüpu soldädukunata mandarqan. Cada grüpuchömi chusku soldädukuna kayarqan.5 Carcelcho Pedruta wichqarätsiyaptinmi Jesucristuman yärakuqkuna mana kachaypa Tayta Diosta mañakuykäyarqan.
Carcelpita Pedruta ángel jipinqan
6 Herodes juzgananpä patsa manarä waraptinmi ishkay soldädukunapa chawpincho cadinashqa Pedro punuykarqan. Wakin kaq soldädukunanami punkucho täpaykäyarqan. 7 Tsaynö kaykaptinmi Señor Jesucristo kachamunqan ángel illaqpita atsikyar Pedruta yuriparqan. Custillanta yataykur rikcharkatsirmi nirqan: “¡Pedro, apuray shäriy!”
Niptinmi jinan höra Pedro wataraykanqan cadënakuna makinpita qotukaskirqan.
8 Nirkurmi ángel nirqan: “Juklla wachakakurkur llanqikita jatikuy”.
Jatikurkuptinnami nirqan: “Capötikita jatikurkur qepalläpa shamuy”.
9 Pedrunami angelpa qepallanpa aywarqan. Carcelpita rasunpaypa yarquykanqanta manami tantiyarqantsu, tsaypa trokinqa revelacionta rikaykanqantami yarparqan. 10 Ruricho kaq soldädukunata y chawpi punkucho kaq soldädukunata päsaskirmi cälliman yarquna kaq fiërru punkumanna chäyarqan. Tsay punku kikillan kichakaskiptinmi cällimanna yarquyarqan. Tsaypita juk esquïnata aywaykäyaptinmi ángel illakaskirqan.
11 Tsaymi cällicho kaykanqanta tantiyaskir Pedro nirqan: “Kananmi itsanqa rasunpaypa musyä salvamänanpä angelninta Tayta Dios kachamunqanta. Paymi salvamashqa Herodespita y Israel runakuna wanutsiyämänanpä kanqanpita”.
12 Tayta Dios salvanqanta tantiyaskirmi Juanpa maman Maríapa wayinman aywarqan. Juanpa jukaq jutinmi Marcos karqan. Tsaychömi atskaq qorikaykur Pedrupä Tayta Diosta mañakuykäyarqan. 13 Chaykur sawan punkuta Pedro takakuptinmi pï kanqantapis rikaq Rode jutiyuq jipash yarqurqan. Tsay jipashqa Maríapa yanapaqninmi karqan. 14 Parlakuyninpita Pedro kanqanta reqiskirmi pasaypa kushikurqan. Tsaymi punkuta manarä kichapur Pedro kaykanqanta willakuq ruriman cörrilla kutirqan.
15 Willakuptinmi niyarqan: “¡Imanöpatä Pedro kanqa!”
Rasunpaypa Pedro kanqanta niptinmi mana criyir niyarqan: “Angelnin parlamuq imatachi wiyapakushqayki”.
16 Tsayyaqmi kutin kutin punkuta takakur Pedro qayakurqan. Punkuta kichaskirnami Pedro kanqanta rikaykur llapankuna espantakuyarqan. 17 Upällakuyänanpä makinwan sëñarmi Pedro willarqan carcelpita Señor Jesucristo imanöpa jipimunqantapis. Nirkurnami nirqan: “Carcelpita yarqamunqäta Santiaguta† y wakin wawqikunata y panikunatapis willayay”.
Tsaypitanami yarquskir jukläpana aywakurqan.
18 Carcelcho Pedro mana warämushqa kaptinmi soldädukuna “Pedruta ¿imarä päsashqa?” nir ima ruraytapis kamäpakuyarqantsu. 19 Maytsaypa ashitsirpis mana tarirmi täpaq soldädukunata shumaq tapuskir Herodes mandarqan tsay soldädukunata wanutsiyänanpä. Nirkurmi Judeapita Cesareaman Herodes aywakurqan.
Herodes wanunqan
20 Tirucho y Sidóncho taq runakuna Herodespa contran rurashqa kayaptinmi Herodes ajanar tsay markakunaman mikuyta apatsiyta munarqannatsu. Tsaynö kaptinmi tsay runakuna Herodesman kachata kachayarqan parlayämunanpä. Manarä parlarmi Herodespa yanapaqnin Blastuwan amistäta rurayarqan. Blastunami Herodeswan parlarqan Tiro y Sidón runakunawan allina kawayänanpä. 21 Herodesnami juk junaq paykunawan parlayänanpä nirqan. Tsay junaq chämuptinmi mas allinnin kaq latsapanta jatikurqan. Nirkurnami juzgananpä sillaman jamaykur runakunata parlapämurqan. 22 Tsayta wiyaykurmi runakuna jinchi niyarqan: “¡Kay parlaykämuqqa manami runatsu, sinöqa juk diosmi!”
23 Tayta Diosllata adorayänanpä Herodes mana niptinmi Señor Jesucristo kachamunqan ángel jinan höra castigaptin kuru ushaypa wanurqan.