Imaykayuqkunata ollqutupanqan
5
¡Imaykayuqkuna, wiyayämay! ¡Juiciu finalcho pasaypami ñakayanki! ¡Tsaymi qayarayparä waqayanki! 2 Imaykata qoriyanqaykipis ismurmi ushakanqa. Latsapaykikunatapis puyumi ushanqa. 3 Qoriykikuna y qellaynikikunapis manami välinqatsu. Ushanan tiempuchöna kaykashqapis riquëzakunata kikillaykikunapämi qoriykäyanki. Tsaymi juiciu finalcho tsay qoriyanqayki riquëzaykikuna ayrajashqa kayanqaykipita shimpiyäshunki. Salvayäshunaykipa trokinmi ninanö rupar ushayäshunki.†4 Mana pägaypa arutsiyanqaykipitami peonnikikuna Tayta Diosta mañakuykäyan. Paykuna mañakuyanqantami llapanta mandaq Tayta Dios wiyashqa.† 5 Qellayniki kaptinmi munayanqaykita rurar kay patsacho kawaykäyanki. Tsaynö kawarmi pishtanapä werayätsishqa uywanö kaykäyanki. 6 Qamkunaqa washäkuyta mana puëdiq jutsaynaq runakunatami wanutsiyashqayki.
Jesucristuta mana ajayaypa shuyänantsikpä ninqan
7 Wawqikuna panikuna, Señor Jesucristo kutimunqanyaq mana ajayaypa shuyäyay. Chakra aruqkunapis murukuyänanpä tamyatarämi shuyäyan. Mikuyninkunata qoriyänanpäpis usyatarämi shuyäyan. 8 Tsaynölla qamkunapis llapan shonquykikunawan yärakur mana ajayaypa Señor Jesucristuta shuyäyay. Payqa kutimunanpänami kaykan.
9 Wawqikuna panikuna, manakaqman ama churanakuyaytsu. Manakaqman churanakuyaptikiqa Jesucristo kutimurmi juzgayäshunki. Runakunata juzgananpä cercachönami kaykan.
10 Wawqikuna panikuna, yarpäyay Tayta Diospa jutincho willakuq profëtakuna imanö kawayanqantapis. Paykunaqa ima ñakaycho karpis mana ajayaypami Tayta Dios munanqannö kawayarqan. Tsaynölla qamkunapis kawayay. 11 Musyantsikmi imanö ñakarpis mana ajayaypa Tayta Dios munanqannö kawaqkunata pay yanapanqanta.† Tsaynöllashi Job pasaypa ñakarpis Tayta Diosman mana ajayaypa yärakunä.† Tsaynö yärakuptinshi Tayta Dios alli shonqu y kuyapäkuq kar bendicionninta churanä.†
12 Kuyay wawqikuna panikuna, imata awnirpis ama jurayankitsu ciëlucho kaykaqkunapa jutincho ni kay patsacho kaykaqkunapa jutinchöpis. Ama ni imapa jutinchöpis jurayankitsu. Tsaypa trokinqa cumpliyänaykipä kaptin awniyanki y mana cumpliyänaykipä kaptinqa ama awniyankitsu. Tsaynö kawayaptikiqa Tayta Dios manami castigayäshunkitsu.†
Tayta Diosta mañakunapä ninqan
13 Llakishqa karqa Tayta Diosta mañakuyay. Kushishqa karpis Tayta Diosta agradëcikur alabayay. 14 Mayqaykipis qeshyarqa mayor wawqikunata qayatsiyanki Tayta Diosta mañakuyänanpä. Paykunami Jesucristupa jutincho aceitita umaykiman wiñar alliyänaykipä Tayta Diosta mañakuyanqa.† 15 Llapan shonqunkunawan yärakur mañakuyaptinqa Tayta Dios alliyätsiyäshunkimi. Jutsata rurashqa kayaptikipis perdonayäshunkimi. 16 Tsaynö kaykaptinqa yärakuq mayikita jutsa rurayanqaykita willar confesakuyay. Tsaynölla jukniki juknikipäpis Tayta Diosta mañakuyay. Tsaynöpami qeshyayanqaykipita alliyäyanki. Tayta Dios munanqannö kawaq runa mañakunqantaqa Tayta Dios wiyanmi.
17 Profëta Elías mañakunqantapis Tayta Dios wiyanäshi. Noqantsiknö runalla kaykarpis mana tamyananpä llapan shonqunwan mañakuptinshi kimsa wata y soqta killa tamyanätsu.† 18 Yapay tamyananpä mañakuptinshi tamyamunä.† Tsayshi murupakuyanqanpis wayunä.