Muchuqkunata alli rikanantsikpä ninqan
2
Kuyay wawqikuna panikuna, munayyuq Señornintsik Jesucristuman yärakurqa llapan runakunata iwal rikashun. 2 Qorikäyanqaykiman alli latsapashqa y qori sortïjashqa imaykayuq runa chämuptin y pasaypa makwa latsapashqa muchuq runa chämuptin 3 ¿imanirtä imaykayuq kaqta alli rikar “kay allinnin bancaman jamaykuy” niyanki y muchuq kaqtaqa “qamqa qepallacho ichiräkuy” o “patsaman jamakuy” niyanki? 4 Tsaynö nirqa ¿manaku jukninta alli rikaykäyanki y juknintana mana alli rikaykäyanki? Tsaynö karqa mana alli jueznömi kaykäyanki.5 Kuyay wawqikuna panikuna, wiyayämay. ¿Manaku Tayta Diosqa muchuqkunata akrashqa wakin runakunapita payman mas yärakuyänanpä y mandakuynincho imayyaqpis kawayänanpä? Tsaynö kawayänanpämi kuyaqninkunata awnirqan. 6 Tsaynö kaykaptinpis qamkunaqa muchuqkunata mana allimi rikaykäyanki. ¿Manaku imaykayuq runakunaqa munayanqanta ruratsir ñakatsiyäshunki? ¿Manaku maqaraykar juezkunamanpis apatsiyäshunki? 7 ¿Manaku paykunaqa salvamaqnintsik Jesucristutapis manakaqman churayan?
8 Tayta Diospa palabran kaynömi nin: “Kikiki kuyakunqaykinö runa mayikita kuyanki”.† Tsay leyta rasunpaypa cumplirqa allitami rurantsik. 9 Imaykayuq runakunata alli rikar y muchuqkunata mana alli rikarqa tsay leyta mana cumplirmi jutsata ruraykantsik.
10 Mayqanpis “Tayta Diospa llapan leyninkunata cumplïmi” nikar juk mandamientullatapis mana cumplirqa llapanta mana cumpliqnömi kaykäyan. 11 Tayta Diospa mandamientunmi nin “ama majaykita qanratankitsu”† y “ama runa mayikita wanutsinkitsu”†. Tsaynö kaykaptinqa majanta mana qanratarpis runa mayinta wanutsirqa Tayta Diospa leyninkunata manami cumpliykantsu.
12 Tsaynö kaykaptinqa imata parlayänaykipäpis y imata rurayänaykipäpis shumaq yarpachakuyay. Willakuynin ninqannöllami juiciu finalcho Tayta Dios juzgayäshunki. 13 Runa mayikita mana kuyapäyaptikiqa qamkunatapis Tayta Dios manami kuyapäyäshunkitsu. Runa mayikita kuyapäyaptikimi itsanqa qamkunatapis kuyapäyäshunki.
Tayta Diosman yärakur allita ruranantsikpä ninqan
14 Kuyay wawqikuna panikuna, “Tayta Diosmanmi yärakuykä” nirpis pay munanqannö mana kawashqaqa yärakunqantsikpis ¿imapätä välin? Tsaynö kawaq runakunataqa Tayta Dios manami salvanqatsu. 15 Tayta Diosman yärakuq mayintsikta latsapaynaqta o mallaqaykaqta rikaykar 16 mana yanapashqaqa ¿imapätä välin “Tayta Dios yanapaykulläshuy qoñu qoñu kanaykipä y pacha junta mikunaykipä” ninqantsikpis? 17 Tsaynöllami runa mayintsikta mana yanapashqaqa Tayta Diosman yärakunqantsikpis manakaqllapä kaykan.
18 Wakin runakunami niyan: “Mana yanapakuq karpis Tayta Diosmanmi yärakü”.
Tsaynö niyaptinpis noqami nï: Mana yanapakuq karqa manami rasunpaypatsu Tayta Diosman yärakuykäyanki. Runa mayikita yanaparmi itsanqa Tayta Diosman rasunpaypa yärakuykäyanki. 19 Tayta Dios jukllaylla kanqanta criyiyanqayki alli kaptinpis tsay criyiyanqallaykiwanqa manami salvakuyankitsu. Tayta Dios kanqantaqa supaykunapis criyiyanmi. Tsaynö criyirpis infiernuman qaykushqa kayänanpä kanqanta musyarmi mantsariywan tsuktsukyäyan.
20 ¡Upa yarpayta ama yarpäyaytsu! Runa mayikita mana yanapayaptikiqa Tayta Diosman yärakuyanqaykipis manakaqllapämi kaykan. 21 Yarpäshun unay castantsik Abraham imanö kanqanta. Payshi Tayta Diosta cäsukur tsurin Isaacta altarcho wanutsinanpä pushanä.† Tsaynö cäsukuptinshi jutsaynaqtanö Tayta Dios chaskinä. 22 Tsaynöpami Abraham rasunpaypa yärakunqanta musyantsik.
23 Tayta Diospa palabran kaynömi nin: “Tayta Dios ninqanta Abraham criyiptinmi jutsaynaqtana chaskirqan”.†
Tsaynöllami nin Abraham Tayta Diospa amïgun kanqanta. 24 Tsaynö kaykaptinqa manami yärakunqallantsikpitatsu Tayta Dios salvamantsik, tsaypa trokinqa payman yärakurnin allikunata ruranqantsikpitami.
25 Tsaynöpis yarpäshun prostitüta Rahab imata ruranqantapis. Israel runakuna Jericó markaman rikapakuq chäyaptinshi wayinman pakaykunä. Nirkurnashi Jericó runakuna ashiyaptin jukläpana qeshpitsinä. Tsaynö ruranqanpitami paytapis Tayta Dios jutsaynaqtanö chaskirqan.†
26 Tsaymi allikunata mana rurashqaqa Tayta Diosman yärakunqantsikpis manakaqllapä kaykan. Cuerpunpita alma yarquptin runa wanunqannömi yärakuynintsikpis wanushqanö kaykan.