Noqa Santiagumi,^† Tayta Diospa y Señor Jesucristupa sirviqnin kar qamkunata winchikamü.

2 Kuyay wawqikuna panikuna, ima ñakaycho karpis llapan shonquykikunawan kushikuyay. 3 Musyayankimi ñakarrä llapan shonquykikunawan Tayta Diosman yärakuyanqaykita. 4 Mana ajayaypa yärakurqa Tayta Dios munanqannö kawayänaykipämi shumaq yachakuyanki.

5 Mayqaykipis Tayta Dios munanqannö kawayta mana kamäpakurqa tantiyatsishunaykipä payta mañakuyay. Mañakuyaptikiqa tantiyatsishunkimi. Mañakuq kaqtaqa imaypis yanapanmi.^† 6 Itsanqa llapan shonquykikunawan yärakur mañakuyay. Mañakuyanqayki höra ama yarpäyaytsu “¿wiyamanqatsurä o manatsurä?” nir. Tsaynö yarparqa lamarta wayra wakläman kayläman pulchaqyätsinqannömi kaykäyanki. 7 Tsaynö kaykarqa ama yarpäyaytsu Tayta Diospita imatapis chaskiyänaykipä kanqanta. 8 Tsaynö mañakuq runaqa manami shumaq yärakuntsu ni Tayta Dios munanqannötsu kawan.

9 Muchuq wawqikuna panikuna, Tayta Dios alli rikashunqaykipita kushikuyay. 10 Imaykayuq wawqikuna panikuna, imaykaykikunaman mana yärakuyänaykipä Tayta Dios tantiyatsiyäshunqaykipita qamkunapis kushikuyay. Imaykayuq karpis waytanö ushakaqllami kaykäyanki.

12 Imayka ñakaycho karpis Tayta Diosman mana ajayaypa yärakuq runaqa kushishqami kawan. Tsaynö kawarqa Tayta Diospa ñöpanchömi corönata chaskinqa. Tsay corönaqa mana ushakaq kawaymi. Tsay corönata chaskiyänanpämi kuyaqnin runakunata Tayta Dios awnirqan.

13 Yarpaynikikunaman jutsa ruray shamuptin ama niyaytsu jutsata ruranantsikpä Tayta Dios yarpätsimanqantsikta. Tayta Diosqa manami imaypis jutsata rurantsu ni pitapis jutsa rurayman jitarpuntsu. 14 Tsaypa trokinqa tantiyakuyay tsay yarpay kikikipa shonquykikunapita kanqanta. 15 Shonquykikuna llutan yarpanqankunata rurarmi jutsata ruraykäyanki. Jutsa ruraqkunataqa Tayta Diosmi infiernuman qaykunqa.

16 Kuyay wawqikuna panikuna, llutanta ama yarpäyaytsu. 17 Llapan allikunata chaskiyanqaykiqa atsikyaqkunata kamaq Taytantsikpitami. Payqa manami llantuy päsaqnötsu, tsaypa trokinqa imaypis kanqannöllami kaykan. 18 Kikin munanqannöllami alli willakuyninwan mushuq kawayta qaramashqantsik llapan kamanqankunapitapis mas kuyay wamrankuna kanantsikpä.^†

19 Kuyay wawqikuna panikuna, tsaynö kaykaptinqa yachaq tukur alläpa ama parlayaytsu, tsaypa trokinqa wakinpis parlayänanpä upällakuyay. Tsaynöpis ama jukllaqa ajanäyaytsu. 20 Ajanarqa manami Tayta Dios munanqannötsu kawayanki.

21 Mana alli ruraykunatapis y imayka viciukunatapis kachariyay. Willakuyninta shonquykikunaman Tayta Dios murushqa kaykaptinqa willakuyninta shumaq cäsukuyay. Paypa alli willakuyninqa salvayäshunaykipä munayyuqmi. 22 Willakuyninta wiyayanqallaykiwanqa ama contentakuyaytsu, tsaypa trokinqa cäsukur kawayay. Tsaynö mana kawayaptikiqa yachakuyanqaykipis manakaqllapämi kanqa.

23 Tayta Diospa willakuyninta wiyaykar mana cäsukuq runaqa qaqllanta espëjucho rikarpis 24 witiskir juklla qonqaqnömi kaykan. 25 Tayta Diospa willakuyninta mana qonqaypa cäsukurmi itsanqa espëjucho rikakur qaqllan imanö kanqantapis mana qonqaqnö kaykan. Tsaynö kawaqtaqa Tayta Diosmi imaykachöpis yanapanqa.

26 Mayqaykipis “Tayta Diosmanmi yärakü” nikarpis mana allikunata parlarqa manami rasunpaypatsu yärakuykäyanki. Tsaynö kayaptikiqa Tayta Diosman yärakuyanqaykipis manakaqllapämi. 27 Tayta Diosman rasunpaypa yärakurqa waktsakunata y viüdakunata muchuycho kayaptin yanapayanki. Wakinkuna jutsata rurar kawayaptinpis noqantsikqa jutsata ama rurashuntsu.