Jerusaléncho apostolkuna Pabluta chaskiyanqan
2
Tsaypita chunka chusku watatarämi Tituta pushakurkur Bernabéwan† Jerusalénman kutirqä. 2 Tsayman kutirqä aywanäpä revelacioncho Tayta Dios tantiyatsimashqa kaptinmi. Jerusaléncho apostolkunawan kikilläkuna qorikarmi mana Israel runakunata imata yachatsinqätapis willarqä. Llutanta yachatsinqäta yarpäyaptinqa pasaypa ñakar willakunqäpis manakaqllapämi kanman karqan. 3 Willakunqäta tantiyatsiptïmi alli kanqanta niyämarqan. Tsaynöpami mana Israel runa kanqanta musyarpis “Tito señalakutsun” niyarqantsu.4 Willakunqä alli kanqanta niyaptinpis juk ishkay runakunami criyiq tukur Moisés qellqanqan leykunata cumpliyänapä wawqikunata panikunata yachatsiyarqan. Tsaynö yachatsiyaptinpis Jesucristuman criyikushqana kaykarqa manami tsay leykunata cumplinantsikpänatsu kaykantsik. Paykuna niyanqanta chaskirqa manami libritsu kantsik, sinöqa tsay leykunapa munaynincho karmi wätaynölla kantsik. 5 Tsaymi tsay llutan yachatsikuykunata chaskipäyashqätsu. Chaskipäyaptïqa Jesucristupa alli willakuyninpita witikuyankimanmi karqan.
6 Jerusaléncho kaq apostolkunaqa willakuptï manami michäyämarqantsu (Jesucristuwan juntu purishqa kayaptinpis Tayta Diospäqa llapantsikpis iwalmi kantsik),† 7 tsaypa trokinqa tantiyakuyarqan Israel runakunata willananpä Pedruta churanqannö mana Israel runakunata willanäpä noqatapis Tayta Dios churamanqantami. 8 Israel runakunapa apostolnin kananpä Pedruta Tayta Dios churanqannömi mana Israel runakunapa apostolnin kanäpä noqatapis churamashqa.
9 Tsaymi Santiago, Pedro y Juanpis tantiyayarqan willakuyninta willakur purinäpä Tayta Dios churamanqanta. (Paykunapäqa iglesiacho columna kayanqantami niyan.) Tsaypitanami paykuna niyämarqan: “Mana Israel runakunaman Bernabéwan qam aywayay y noqakunana Israel runakunaman aywayäshä”.
Tsaynö willanakuskiyaptïmi makinkunata qoyämarqan. 10 Tsaynöpis niyämarqan imaynaq wawqikunata panikunata mana qonqaypa yanapayänäpämi. Tsaytaqa imaypis ruraykämi.†
Pedruta Pablo ollqutupanqan
11 Antioquíaman Pedro chaykamur mana allita ruraptinmi ollqutuparqä. 12 Ñöpataqa mana Israel wawqikunawan panikunawan qorikarmi mikuq.† Santiaguwan puriq runakuna chäyämuptinmi itsanqa jamuräyänanta mantsarir mana Israel kaqkunawan qorikarqannatsu. 13 Pedruta rikarmi wakin wawqikuna panikunapis y Bernabépis mana Israel kaqkunawan mikuyänanpä takukäyarqannatsu.
14 Tsaynö ruranqan mana alli kaptinmi wawqikunapa panikunapa ñöpancho Pedruta ollqutupar nirqä: “Qampis mana Israel runanö Moisés qellqanqan leykunata mana cumpliykarqa ¿imanirtä munanki mana Israel runakuna tsay leykunatarä cumpliyänanta? 15 Noqantsikqa manami mana Israel runatsu kantsik, sinöqa yurinqantsikpita patsami Israel runa kantsik. 16 Musyantsikmi Tayta Dios imanö perdonamanqantsikta. Manami Moisés qellqanqan leykunata cumplishqatsu perdonamantsik,† sinöqa Jesucristuman yärakushqami. Tsaymi Tayta Dios perdonamänantsikpä Jesucristuman yärakuntsik.† Tsay leykunata cumplinqanpitaqa manami pitapis Tayta Dios salvantsu”.
17 Moisés qellqanqan leykunaman yärakunantsikpa trukan Jesucristuman yärakushqami wakin runakuna yarpäyan jutsata ruranqantsikta. Tsaynö yarpaykäyaptinpis ¿Jesucristutsurä jutsata ruratsimantsik? ¡Manami! 18 Tsaypa trokinqa jutsayuq kantsik Moisés qellqanqan leykunaman yapay yärakurmi. 19 Moisés qellqanqan leykunapa munaynincho karmi tsay leykunapä wanushqanöna karqä.† Kananqa librinami kä† Tayta Dios munanqannö kawanäpä. 20 Noqaqa Jesucristuwan cruzcho wanushqanömi kaykä.† Manami noqanatsu kawä, sinöqa Jesucristumi noqacho kawan. Tsaymi Tayta Diospa Tsurinman yärakur kawaykä.† Paymi kuyamarnintsik noqantsik raykuq wanushqa.
21 Manami Tayta Dios kuyapämanqantsikta manakaqmantsu churaykä. Wakin runakuna niyanqannö leyninkunata cäsukushqarä Tayta Dios salvamashqaqa Jesucristo wanunqanpis manakaqllapämi kanman karqan.