Pablo llakikunqan
3
¡Mana tantiyakuq Galacia runakuna! Noqantsik raykuq Jesucristo cruzcho wanunqanta shumaqmi tantiyayarqayki. Tsaynö kaykaptinqa ¿pitä engañayäshushqayki [llutan yachatsikuyta criyiyänaykipä]? 2 Kanan mä willayämay. ¿Moisés qellqanqan leykunata cumplirku o Jesucristupa willakuyninta wiyar payman yärakurku Espíritu Santuta chaskiyarqayki? 3 ¡Pasaypa mana tantiyakuqnaku kaykuyanki! Espíritu Santu yanapayäshuptikimi Tayta Dios munanqannö kawayta qallaykuyashqayki. Tsaynö kaykaptinqa ¿imanirtä Espíritu Santuta mana cäsukur Moisés qellqanqan leykunata cumpliyta munaykäyanki? 4 Tsaynö karqa ¿manakaqllapätsurä Jesucristuman criyiyanqaykipita ñakayashqayki? Manachi manakaqllapäqa ñakayankimantsu.5 ¿Tsay leykunata cumpliyanqaykipitatsurä Espíritu Santuta Tayta Dios qarayäshushqayki? ¿Leykunata cumpliyanqaykipitatsurä qamkunacho milagrukunata ruran? Manami tsaypitatsu, sinöqa Jesucristupa alli willakuyninta wiyar payman yärakuyanqaykipitami.
Abrahamnö yärakur salvashqa kanqantsik
6 Yärakuptinmi Abrahamtapis jutsaynaqtana Tayta Dios chaskirqan.† 7 Shumaq tantiyakuyay. Tayta Diosman noqantsikpis yärakurqa mayqan casta karpis Abrahampa castanmi kantsik.†
8 Tayta Diospa palabranmi nin mana Israel runakunatapis payman yärakuyanqanpita Tayta Dios perdonananpä kanqanta. Tsaymi alli willakuyninta Abrahamta willar Tayta Dios nirqan: “Qam raykuqmi llapan casta runakunapis bendicionnïta chaskiyanqa”.†
9 Tsaymi noqantsikpis Tayta Diosman yärakur Abraham bendicionta chaskinqannö bendicionta chaskintsik.a
10 Moisés qellqanqan leykunata cumpliyanqanpita salvashqa kayanqanta yarpaqkunaqa llapanpis maldicionashqami kayan. Tayta Diospa palabranchöpis kaynömi qellqaraykan: “Llapan qellqashqa leykunata mana cumpliq kaqqa maldicionashqami kanqa”.†
11 Tsaynö kaykaptinqa Moisés qellqanqan leykunawanqa manami mayqanpis salvakuyanqatsu. Tsaypämi Tayta Diospa palabrancho nin: “Munanqänö kawaq runaqa noqaman yärakamurmi kawanqa”.†
12 Moisés qellqanqan leykuna manami Diosman yärakur salvakunantsikpätsu parlan, sinöqa nin: “Leynïkunata cumpliq kaq runaqa llapantami cumplinman”.†
13 Tsay leykunata cumpliyta mana kamäpakurmi maldicionashqa karqantsik. Tsaymi trokintsikcho maldicionashqa runanö wanur Jesucristo salvamashqantsik. Tayta Diospa palabranchöpis kaynömi qellqaraykan: “Pï runapa ayanpis qerucho warkaraptinqa tsay runa maldicionashqami kanqa”.†
14 Jesucristupis tsaynö wanurqan Abrahamta Tayta Dios awninqan bendicionta mana Israel runakunapis chaskiyänanpämi. Tsaymi Jesucristuman yärakur Tayta Dios awninqan Espíritu Santuta chaskintsik.
Abrahamta Tayta Dios awninqan
15 Wawqikuna panikuna, kananqa runakuna rurayanqan testamentuman tinkutsiypami tantiyatsiyäshayki. Musyanqantsiknöpis testamentuta rurar firmaptinqa manami pipis manakaqman churannatsu ni imatapis yapannatsu. Tsaynöllami Tayta Dios awninqanpis kaykan.
16 Pay awninqanqa Abrahampä y paypita aywaraqpämi. Manami Abrahampita llapan aywaraqkunapä kanqantatsu Tayta Dios nirqan, tsaypa trokinqa paypita aywaraq jukllayllapä kanqantami nirqan.b Tsaynö nirqa Jesucristupämi parlarqan.
17 Tsaymi nï: Abrahamwan pactuta [Cristucho] ruranqanpita chusku pachak kimsa chunka (430) watatarämi leyninkunata Moisésta Tayta Dios entregarqan.† Qepatarä shamushqa karmi Abrahamta awninqanta anulashqatsu. 18 Tsaynö kaptinqa manami Moisés qellqanqan leykunata cumplinqantsikpitatsu salvakuntsik, tsaypa trokinqa Abrahamta awninqanta Tayta Dios cumpliptinmi. Moisés qellqanqan leykunata cumplinqantsikpita salvakunantsik kaptinqa Tayta Dios awninqanpis manakaqllapämi kanman karqan.†
Moisés qellqanqan leykuna imapä kanqanpis
19 Tsaynö kaykaptinqa ¿imapätä tsay leykuna? Runakuna jutsayuq kayanqanta tantiyakuyänanpämi tsay leykunata Moisésta Tayta Dios entregarqan.† Tsaynö kaptinpis tsay leykunaqa Jesucristo shamunqanyaqllami karqan. Paymi Abrahamta Tayta Dios awninqan runa kaykan.
Tsaynöpis Tayta Diosqa leyninkunata angelkunawanmi Moisésta entregatsirqan.† Moisésnami tsay leykunata runakunata willarqan. 20 Abrahamta awnirmi itsanqa jukwan willakatsinanpa trokin kikin Tayta Dios parlaparqan.
21 Tsaynö kaykaptinqa ¿Tayta Diospa leyninkuna salvamänantsikpätsurä kaykan? ¡Manami! Tsay leykuna salvamänantsikpä kaptinqa awninqantami Tayta Dios manakaqman churanman karqan. Salvamänantsikpä kaptinqa leyninkunata cumplirmi salvakushwan karqan. 22 Tayta Diospa palabranmi nin llapantsikpis jutsayuq kanqantsikta. Jesucristuman yärakurrämi Tayta Dios awninqanta chaskir salvakuntsik.
23 Jesucristuman manarä yärakushqami Moisés qellqanqan leykuna munaynincho tsararämarqantsik. Jesucristo shamunqanyaqmi tsaynö tsararämarqantsik. 24 Tsurinta imaykayuq runa wätayninpa makinman churanqannömi noqantsiktapis Tayta Dios tsay leykunapa munayninman churamashqantsik. Tsaynö churamashqantsik Jesucristo shamuptin payman yärakur salvakunantsikpämi. 25 Wamra jatunyarkur wätaqninpa makincho manana kanqannömi Jesucristuman yärakur Moisés qellqanqan leykunapa munayninchönatsu kaykantsik.
Tayta Diospa wamranna kanqantsik
26 Wawqikuna panikuna, Jesucristuman yärakurnami kananqa Tayta Diospa wamrankunana kaykantsik. 27 Tsaynöpis bautizakurnintsikmi Jesucristuwan jukllayllanö kar paypa munayninchöna kaykantsik. 28 Tsaymi Israel runa o mana Israel runa karpis, watay o mana watay karpis, ollqu o warmi karpis Jesucristucho karqa Tayta Diospa wamranna kantsik. 29 Tsaynöpis Jesucristuman criyikurqa Abrahampita aywaraqnami kantsik. Tsaynöpami Abrahamta Tayta Dios awninqanta noqantsikpis chaskintsik.†