Noqa Pablumi kay cartata qamkunaman cartakaykämü. Apóstol kanäpä manami runakunatsu churayämashqa, sinöqa Jesucristo y payta kawaritsimuq Tayta Diosmi.

Kaycho kaykaq wawqikuna panikunami winchikayämushunki. 3 Yayantsik Tayta Dios y Señor Jesucristo kuyapäyäshurniki alli kawayänaykipä yanapaykuyälläshuy. 4 Yayantsik Tayta Dios munanqannömi kay patsacho jutsapita salvamänantsikpä Jesucristo wanurqan.^† 5 Tayta Dios imayyaqpis alabashqa kaykullätsun. Amén.

6 Musyayanqaykinöpis Jesucristupa kuyakuyninwanmi Tayta Dios qayayäshurqayki. Tsayta musyaykarqa ¿imanirtä llutan yachatsikuyta chaskikur manaräpis unayta Tayta Diospita witikuyashqayki? ¡Tsaytaqa manami imanö tantiyaytapis kamäpakütsu! 7 Jesucristupa willakuyninpita mas juk willakuyqa manami salvakunantsikpä kantsu. Tsaynö kaptinpis wakin runakunami Jesucristupa willakuyninman yaparkur llutanta yachaykätsiyäshunki.

8 Qamkunata yachatsinqäta manakaqman churar pipis llutanta yachatsiptinqa infiernuman Tayta Dios qaykutsun. Noqakunatapis llutanta yachatsiyashqa kayaptïqa infiernuman qaykayämätsun. Ciëlupita shamuq angeltapis llutanta yachatsishqa kaptinqa infiernuman qaykutsun. 9 Yapaymi nï: Pipis Jesucristupa willakuynin jananman llutan yachatsikuyta yapaq kaqtaqa infiernuman qaykutsun.

10 Tsaynö nir ¿runakuna alabayämänantatsurä ashï? ¿Runakunapita alli rikashqa kaytatsurä munä? Noqa manami runakuna alabayämänanpätsu yachatsï, tsaypa trokinqa Tayta Dios: “Allitami rurashqayki” nimänanpämi.^† Runakuna alabayämänan raykuq yachatsirqa manami Jesucristupa sirviqnintsu käman.

11 Wawqikuna panikuna, shumaq tantiyakuyay. Alli willakuyta willakunqäqa manami runakunapa yarpaynintsu. 12 Tsay willakuytaqa manami runatsu yachatsimashqa, sinöqa kikin Jesucristumi revelacioncho tantiyatsimashqa.

13 Qamkuna musyayankimi ñöpata Israel runakunapa costumbrinkunata cumplir imanö kanqätapis. Tsay witsanmi Jesucristuman yärakuqkunapa contran shärir qatikacharqä. Paykunatami llapanta ushakätsiyta munarqä.^† 14 Wakin Israel mayïkunapitapis masmi costumbrïkunata välitsirqä.^† Llapan yuriy mayïkunapitapis masrämi Moisés qellqanqankunata cumplirqä.

15 Imanö kaptinpis manarä yuriptïmi Tayta Dios kuyapämar payta sirvinäpä akramashqa.^† 16 Nirkurmi Jesucristuman yärakunäpä shumaq tantiyatsimar^† mana Israel runakunata willakuyninta willanäpä kachamashqa.

Tsaynö kachamaptinmi willakuyninta tantiyatsimänanpä pitapis tapukurqänatsu. 17 Manami noqapita mas punta kaq apostolkunawan parlanäpäpis Jerusalénman aywarqätsu, tsaypa trokinqa Arabia partipami aywarqä. Tsaypitanami Damasco markaman yapay kutirqä. 18 Tsaypita kimsa watatarämi Pedruwan parlaq Jerusalénman aywarqä.^† Tsaychömi chunka pitsqa junaq paywan juntu kayarqä. 19 Tsaychömi reqirqä Señor Jesucristupa wawqin Santiaguta. Wakin apostolkunataqa manami reqirqätsu. 20 Tayta Dios musyanmi mana llullakunqäta.

21 Tsaypitanami Siria y Cilicia provinciakunapa aywarqä.^a 22 Judea provinciacho^b wawqikuna panikunaqa manami mayqanpis reqiyämarqantsu. 23 Paykunashi wiyayänä: “Qatikachämaqnintsik runami kananqa Jesucristupa willakuyninta willakurna puriykan”.

24 Tsaynö niqta wiyarshi Tayta Diosta alabayänä.