Salmo 68 (67)
Contrankunata Tayta Dios vincinqanpita alabanqan
(1) Cantaqkunapa mandaqninpämi. David qellqanqan salmu. Cantanantsikpämi.
1 (2) Tayta Dios, janäkuna shäriykullay.
Contraykikuna mashtakaypa mashtakar qeshpiyätsun.
Chikishuqnikikunapis ñöpaykipita qeshpir aywakuyätsun.†
2 (3) Wayrawan qoshni illakaqnö illakäyätsun.
Ninacho cëra tsulluqnö ushakäyätsun.
Jutsa ruraqkunapis ñöpaykicho ushakäyätsun.
3 (4) Allita ruraqkuna itsanqa kushikuyätsun.
Ñöpaykicho kushishqa kawayätsun.
Kushikuypita saltaykachäyätsun.
4 (5) Tayta Diosta alabayay.
Cantukunata cantar jutinta joqariyay.
Paymi pukutaynin muntashqa purin.
Paypa jutinqa Yahwehmi.
¡Paypa ñöpancho kushikuyay!
5 (6) Tayta Diosqa sagrädu templunchömi taykan.
Paymi waktsakunapa taytan.
Paymi viüdakunapa favornin.
6 (7) Castaynaqkunataqa Tayta Diosmi yanapan castayuqnö kayänanpä.
Prësukunata jipiskirmi imaykayuqpis kayänanpä yanapan.
Mana wiyakuq runakunatami itsanqa churan tsaki jirkacho taykaqnö ñakayänanpä.
7 (8) Tayta Dios, kuyanqayki runakunatami Egiptupita yarqayämunanpä yanaparqayki.
Nirkurmi tsunyaq jirkapa pushamurqayki. Selah
8 (9) Patsapis pasaypami tsuktsukyarqan.
Tamyapis palchachayparämi tamyamurqan.
Tayta Dios tsaycho kaptinmi Sinaí jirkapis kuyurqan.
Payqa Israel runakunata kuyaq Tayta Diosmi kaykan.†
9 (10) Tayta Dios, tamyatapis allimi tamyatsimushqayki.
Qachpayashqa chakratapis alli wayuq chakramanmi tikratsishqayki.
10 (11) Kuyanqayki runakuna kayaptïmi tsaycho täyänäpä churayämashqayki.
Kuyayämarmi imäkuna pishiptinpis yanapayämashqayki.
11 (12) Tayta Dios mandaptinmi atska warmikuna willakur niyarqan:
12 (13) “¡Contrantsik reykunapis soldädunkunawan qeshpirmi aywakuyashqa!”
Contrankunapita apayanqantami wayinkunacho warmikuna rakipänakuyarqan.
13 (14) Uywankunata täpar quëdaqkunapis paluma niraq adornukunatami chaskiyashqa.
Tsay adornukuna kaykan yuraq qellaypita rurashqa älayuq y qoripita rurashqa plümayuqmi.
14 (15) Llapanpä munayyuq Tayta Dios mantsakätsiptinmi tsay reykuna qeshpir aywakuyarqan.
Tsaynö qeshpiyanqanmi karqan Salmón jirkacho rashtata wayra apanqannö.
15 (16) Basán jirkakunaqa pasaypami lliwlliwyaykan.
Puntankunapis pasaypa altumi.
16 (17) Altu jirkakuna, ¿imanirtä chikir rikaraykäyanki Tayta Dios täkunqan Sión jirkanta?
¡Tsaychömi Tayta Dios imayyaqpis täkunqa!
17 (18) Tayta Diospa guërra carrëtankunaqa yupaytapis mana atipaypämi.
Tsay carrëtankunawanmi Sinaí jirkapita templunman shamushqa.
18 (19) Tayta Dios, prësukunata apamurmi witsämurqayki.
Runakuna apayämunqan qaraykunatami chaskirqayki.†
Mana cäsukuq runakunapis munaynikichönami kaykäyan.
Paykuna täyanqanchönami taykanki.
19 (20) ¡Salvakuq Tayta Dios alabashqa kaykullätsun!
Paymi qoyay qoyay yanapamantsik. Selah
20 (21) Tayta Diosnintsikqa imapitapis salvakuq Diosmi.
Wanuypitapis paymi salvamantsik.
21 (22) Tayta Diosqa contrankunapa umanta pakirinqami.
Jutsa rurayllacho kawaqkunapa umantapis pakirinqami.
22 (23) Tayta Diosmi nin:
“Basánpitapis contraykikunata kutitsimushämi.
Lamar rurinpitapis jipimushämi.
23 (24) Tsaynö rurashä yawarninwan chakikita mayllayänaykipä
y allquykikunapis yawarninta laqwayänanpämi”.
24 (25) Mandamaqnï Tayta Dios, tsaytsika runakunami adorayäshunki.
Qatinayllamanmi templuykiman yaykuykäyan.
25 (26) Puntatami cantaqkuna aywaykäyan.
Qepantanami tukaqkuna aywaykäyan.
Chawpintanami panderëtakunata tukaraykar jipashkuna aywaykäyan.
26 (27) ¡Llapayki Tayta Diosta alabayay!
¡Israel runakuna, llapayki qorikaykur alabayay!
27 (28) Ñöpantami tapshi kaq Benjamín trïbu runakuna aywaykäyan.
Paykunawanmi aywaykäyan Judá, Zabulón y Neftalí trïbukunapita atskaq mandaqkuna.
28 (29) Tayta Dios, munayyuq kanqaykita tantiyaykatsiyällämay.
Ñöpata yanapayämanqaykinö yapay yanapaykayällämay.
29 (30) Jerusalén templuykimanmi reykuna qaraykunata apayämunqa.
30 (31) Guërrallata munaypa munaq runakunata castigaykullay.
Paykunaqa ututukunacho pakakuykur atacakuq uywanömi kaykäyan.
Tsaynöpis waqrakuq törukunanömi kaykäyan.
Imaykayuq kayta munarmi nacionkunata atacar imaykantapis apakuyan.
Tsaynö kaqkunataqa llapantapis ushakaykatsillay.
31 (32) Egiptupitami Faraónpa kachankuna shayämunqa.
Etiopía nación runakunami Tayta Diosta alabayanqa.
32 (33) Kay patsacho llapan nación runakuna, Tayta Diosta alabayay.
Cantukunata cantar payta alabayay. Selah
33 (34) Tayta Diosqa muntashqami ciëlupa purin.
Parlamunqanpis maytsaymanmi wiyakämun.
34 (35) Tayta Dios munayyuq kanqanpita alabayay.
Payqa munayninwanmi Israel runakunata yanapan.
Azulyaraykaq ciëluchöpis munayyuqmi kaykan.
35 (36) Templuncho Tayta Dios almiraypämi kaykan.
Kuyanqan Israel runakunataqa munayninwanmi yanapan.
¡Tayta Dios alabashqa kaykullätsun!