Salmo 69 (68)
Llakikur Tayta Diosta mañakunqan
(1) Cantaqkunapa mandaqninpämi. Liriu waytakuna niyanqan cantupa tönunwan kay salmuta cantayanki. David qellqanqan salmu.
1 (2) Tayta Dios, salvaykallämay.
Mayucho shenqaykaqnömi kaykä.
2 (3) Tsuktsukyaykaq sinigacho jatiraykaqnömi kaykä.†
Mayman jaruytapis manami kamäpakütsu.
Jondu yakucho kaykaqnömi kaykä.
Bunyaypa bunyar yaku apaykämaqnömi kaykä.
3 (4) Pasaypa qayararmi jasmayashqä.
Kunkäpis pasaypami nanaykan.
Tayta Diosta shuyarar rikachakuykaptillämi ñawïpis tsakaskinna.
4 (5) Chikimaqnïkunaqa aqtsä yupayta mana atipaypä kanqannömi kaykäyan.
Achäquita mana ashipaykaptïmi paykunaqa chikiykäyäman.
Mana suwapaykaptïmi “kutitsimay” nir tumpaykäyäman.†
5 (6) Tayta Dios, musyankimi mana cäsukuq kanqäta.
Llapan jutsa ruranqätapis qammi musyanki.
6 (7) Llapanta mandaq Tayta Dios, jutsata ruranqäpita qamman yärakamuqkuna penqakuycho ama kayätsuntsu.
Israel runakunata kuyaq Tayta Dios, jutsa ruranqäpita qamman yärakamuqkunata manakaqman ama churayätsuntsu.
7 (8) Runakuna ashlliyämaptinpis qam raykuqmi wiyaräkushqä.
Penqakuyllawanmi qaqlläpis pukayashqarä.
8 (9) Wawqïkunapis noqapita witikurmi jäpa runatanöna rikayäman.
Panïkunapäpis mana reqishqanami kaykä.†
9 (10) Templuykitami wanur kawarpis respitatsishä.†
Qamta manakaqman churayäshurniki noqatapis manakaqmanmi churayäman.†
10 (11) Ayunar waqaptïpis runakunami jamuräyäman.
11 (12) Llakikurnin qachqa latsapata jatikuptïpis llapanmi asipäyäman.
12 (13) Pïmaypis wasäta rimallarmi puriyan.
Machashqakunapis penqakatsimarmi cantapäyäman.
13 (14) Tayta Dios, tsaynö rurayämaptinpis qamllatami mañakamü.
Juklla yanapaykallämay, ari.
Kuyapämarniki mañakamunqäta wiyaykallämay.
Imaypis salvamanqaykinö kananpis salvaykallämay.
14 (15) Sinigaman jatikashqanö kaykanqäpita jipiykallämay.
Chikimaqnïkunapita salvaykallämay.
Yaku rurincho kaykaqnö kaykanqäpita jipiykallämay.
15 (16) Bunyaypa bunyar aywaq yaku apamänanta ama munaykullaytsu.
Jondu yaku ultamänanta ama kachaykullaytsu.
16 (17) Tayta Dios, rugakamuptï wiyaykallämay.
Qamqa llakipäkuq y kuyapäkuqmi kaykanki.
Kuyakuq kaynikiwan yanapaykallämay.
17 (18) Sirviqniki kaykaptïqa ama pakakuykullaytsu.
Pasaypa ñakaychömi kaykä. ¡Juklla yanapaykallämay!
18 (19) Shamur salvaykallämay.
Chikimaqnïkunapa makinpita jipiykallämay.
19 (20) Qam musyankimi wajupäyämanqanta, penqakatsiyämanqanta y manakaqman churayämanqanta.
Musyaykankimi chikimaqnïkuna pïkuna kayanqantapis.
20 (21) Qayapäyämanqanpitami shonqüpis pasaypa qallayashqa kaykan.
Tsaymi imata ruranäpäpis gänasnï ni kallpäpis kannatsu.
Kuyapämar yanapamänanpä mayjina ashirpis manami pitapis tarishqätsu.
21 (22) Mikuynïmanpis venënutami wiñapäyämashqa.
Yakunaptïpis vinagritami uputsiyämashqa.†
22 (23) Alli allillata mikuyänanpä qorikäyaptin castigaykullay.
Banquëtita mikuyanqanpis paykunapä imayka trampanö kaykullätsun.
23 (24) Paykunapa ñawinkunapis qaprayätsun.
Chankankuna imaypis tsuktsukyätsun.†
24 (25) Ajarnin paykunata castigaykullay.
Paykunataqa chipyaq ushakaykatsillay.
25 (26) Wayinkunapis tsunyaq rikakutsun.
Täyanqan toldunkunacho pipis ama tätsunnatsu.†
26 (27) Castigamanqaykita rikaykarmi ñakatsiyäman.
Ñakatsimanqaykita rikaykarmi ashlliyäman.
27 (28) Tsaynö runakunataqa jutsanman tupu castigaykullay.
Paykunataqa ama perdonaykullaytsu.
28 (29) Libru de la Vïdacho jutinkuna qellqaraykaqtapis börraykullay.†
Alli ruraqkunapa jutinkuna qellqaranqan librumanpis jutinkunata ama qellqaytsu.
29 (30) Noqaqa ñakaycho karmi pasaypa llakikü.
Tayta Dios, yanapamar salvaykallämay.
30 (31) Tayta Diospa jutinta joqarirmi alabashä.
Agradëcikurmi adorashä.
31 (32) Tsaynö alabaptïmi törukunata sacrificiupä apamunqäpitapis Tayta Dios mas kushikunqa.
32 (33) Salvamanqanta rikarmi llakishqa kaykaqkunapis kushikuyanqa.
Tayta Diosta ashiqkunapis kallpata tsarirmi payman yärakuyanqa.
33 (34) Tayta Diosmi imaynaqkuna mañakuyanqanta wiyan.
Payman yärakuqkunata prësu apayaptinpis manami qonqantsu.
34 (35) ¡Ciëlupis, kay patsapis, Tayta Diosta alabayätsun!
¡Lamarpis y tsaykunacho llapan kawaqkunapis, Tayta Diosta alabayätsun!
35 (36) Tayta Diosmi Sión jirkancho taq runakunata salvanqa.
Tsaynöllami Judácho kaykaq markakunatapis allitsatsinqa.
Tsaychömi kuyanqan runakuna yapay täyanqa.
36 (37) Tayta Diosta sirviqkunapita aywaraqkunami tsay markakunata chaskiyanqa.
Tayta Diosta kuyaqkunami tsaycho täyanqa.