Salmo 70 (69)
Ras yanapananpä Tayta Diosta mañakunqan
(1) Cantaqkunapa mandaqninpämi. David qellqanqan salmu. Tayta Diospa altarnincho inciensiuta rupatsir kay salmuta cantayay.
1 (2) Tayta Dios, salvaykallämay.
Juklla shamur yanapaykallämay.
2 (3) Wanutsimayta yarpaqkunaqa penqakurnin umpuykachäyätsun.
Mana alliman ishkinäta munaqkunaqa penqakurnin qeshpiyätsun.
3 (4) Asipämaqkunapis penqakurnin aywakuyätsun.
4 (5) Qamman yärakamuqkunaqa kushikuyätsun.
Salvanqayki kaqkunaqa imaypis niyätsun: “Tayta Dios alabashqa kaykullätsun”.
5 (6) Noqaqa llakishqa karmi ima ruraytapis kamäpakütsu.
Taytay, juklla shamur yanapaykallämay.
Qammi yanapamaqnï y salvamaqnï kaykanki.
Tayta Dios, juklla yanapaykallämay.