Salmo 71 (70)
Awkin runa Tayta Diosta mañakunqan
1 Tayta Dios, qamllamanmi yärakamü.
Runakuna penqakatsiyämänanta ama munaykullaytsu.
2 Allillata ruraq kaynikiwan salvaykallämay.
Mañakamunqäta wiyaykallämay
Juklla salvaykallämay.
3 Pakakunä qaqa kaykullay.
Qammanmi imaypis amparakamü.
Salvamänaykipä kanqanta musyarmi yärakamü.
Qammi tsapämaqnï qaqa y amparakunä törri kaykanki.
4 Tayta Dios, mana alli runakunapita tsapaykallämay.
Jutsasapakunapita y wanutsikuq runakunapita salvaykallämay.
5 Qamman yärakamuptïmi ima desgraciapitapis tsapämanki.
Chölullarä kanqäpita patsami qamman yärakamü.
6 Mamäpa pachallanchörä kaykaptïpis noqawanmi kaykarqayki.
Qammi yurinäta munarqayki.
Tsaymi imaypis alabashayki.
7 Llapanchöpis yanapamaptikimi wakinkunapis noqanö kawayta munayan.
8 Llapanpä munayyuq kaptikimi qoyay qoyay alabä.
9 Awkinna kaptïpis ama qonqaykallämaytsu.
Kallpä mana kaptinpis ama kachaykallämaytsu.
10 Wanutsimayta munaqkunaqa qorikaykurmi willanakuykäyan.
11 Paykunami nikäyan: “Qatikachar tsarimushun.
Diospis kacharishqanami.
Manami pipis salvanqatsu”.
12 Tayta Dios, noqapita ama witikuytsu.
Juklla shamur yanapaykallämay.
13 Chikimaqkunaqa penqakuypä wanutsishqa kayätsun.
Conträ shäriqkunaqa kikinkuna asipashqa kayätsun.
14 Noqaqa imayyaqpis qamllatami shuyaraykäshayki.
Qoyay qoyaymi qamllata alabashayki.
15 Qoyayllanpami kuyapämar salvamanqaykita willakushä.
Ayka kuti salvamanqaykitapis manami yupayta atipätsu.
16 Mantsakaypä ruranqaykitami willakushä.
Japallayki imaypis alli ruraq kanqaykitami pïmaytapis willakushä.
17 Tayta Dios, chölullarä kanqäpita patsami yachatsimashqayki.
Tsaymi mantsakaypä ruranqaykikunata kananyaqpis willakuykä.
18 Kanan witsan runakunata y paykunapita aywaraqkunatapis willanäpä kaykanrämi.
Awkinyar soquyashqa kaptïpis ama kachaykallämaytsu.
19 Tayta Dios, manami pipis qamnö allillata ruraq kantsu.
Mantsakaypäkunatami rurashqayki.
Manami pipis qammanqa tinkuntsu.
20 Pasaypa ñakayman y llakikuyman churarkamarpis yapaymi yanapamanki alli kawanäpä.
Wanunäpäna kaykaptïpis yapaymi shäritsimanki.
21 Munayyuq kanäpämi yanapamanki.
Yapaymi kushikatsimanki.
22 Israel runakunapa santu Diosnin, tsaynö yanapamanqaykipitami arpakunata y salteriukunata tukapayllapa adorashayki.
Cantukunata cantarmi alabashayki.
23 Salvamanqaykipitami llapan shonqüwan kushishqa alabashayki.
24 Desgracia päsamänanta munaqkunaqa pasaypa penqakushqami kaykäyan.
Tsaymi alli ruraq kanqaykita imay hörapis parlaykäshä.