Salmo 72 (71)
Mandaq reypä Tayta Diosta mañakunqan
(1a) Salomón qellqanqan salmu.
1 (1b) Tayta Dios, munanqaykinö mandananpä reyta yanapaykullay.
Pitapis mana jananpaypa juzgananpä tantiyaykatsillay.
2 Tsaynö yanapaptikimi kuyanqayki runakunata alli mandanqa.
Muchuqkuna quejakuyanqantapis shumaqmi arreglanqa.
3 Tsaymi may jirkacho taqkunapis kushishqa kawayanqa.
4 Yanapaptikimi ministiqkunapä justiciata ruranqa, muchuqkunapa tsurinkunata salvanqa y ñakatsiqkunata ushakätsinqa.
5 Mandaq rey imayyaqpis kawaykullätsun.a
Rupaypis y killapis mana ushakaq kanqannö mandaq kayninpis mana ushakaq kaykullätsun.
6 Murukuypä y qewapä tamyapis shullyapis bendición kanqannö pïmaypäpis bendición kaykullätsun.
7 Alli mandaptin llapanpis añaw kawaykuyätsun.
Ciëlucho killa ushakanqanyaq imayyaqpis mandaykullätsun.
8 Lamarpa kuchunpita jukaq kuchunyaq mandaykullätsun.
Éufrates mayupita entëru munduyaq mandaykullätsun.†
9 Tsunyaq jirkacho taq contrankunapis paypa ñöpanman qonqurikuyätsun.
10 Maytsay nacionpita reykuna shamur qaraykunata apayämutsun.
Tarsis nacionpita, lamar tsimpancho kaykaq nacionkunapita, Sabá nacionpita y Seba nacionpitapis qaraykunata apakurkur shayämutsun.
11 Llapan reykuna ñöpanman qonqurikuyätsun.
Llapan nacioncho taq runakunapis payta sirviyätsun.
12 Reyqa imaynaqkuna mañakuptin yanapanqami.
Pïninpis mana kaqkunapämi janan shärinqa.
13 Qollmi shonqukunatami kuyapanqa.
Wanutsiyänanpä kaykaptinmi imaynaqkunata salvanqa.
14 Ñakatsiq runakunapa makinpitami jipinqa.
Maqakuq runakunapitami salvanqa.
Ñakaycho kaykaq runakunataqa pasaypami kuyan.
15 Reyqa atska wata kawaykullätsun.
Sabá nacionpita qorita apapäyämutsun.
Tayta Diosta imaypis paypä mañakuyätsun.
Pïmaypis payta alabayätsun.
16 Mandanqan nacioncho trïgu shumaq wayuykullätsun.
Entëru jirkakunachöpis kichkiyparä kaykullätsun.
Líbanuchönörä lloqlluypa lloqllur wiñaykullätsun.
Runakunapis lluta jachakunanörä atskaman mirayätsun.
17 Rey allita ruranqankunata imaypis yarparäyätsun.
Alli rey kanqanta ama qonqayätsuntsu.
Llapan nacionkunapis paypita bendicionta chaskiyätsun.
Maytsaychöpis payta alabayätsun.
18 Israel runakunata kuyaq Tayta Dios alabashqa kaykullätsun.
Payllami imaykatapis espantaypä kaqkunata ruran.
19 Imayyaqpis alabashqa kaykullätsun.
Munayyuq kanqanta entëru kay patsacho pïmaypis musyaykuyällätsun.
¡Amén! ¡Tsaynö katsun!
20 Kaychömi ushakan Isaípa tsurin David Tayta Diosta mañakur alabanqan.