Libru 3
Salmo 73—89
Salmo 73 (72)
Tayta Diosman yärakunqan llapanpitapis mas alli kanqan
(1a) Asaf qellqanqan salmu.
1 (1b) Israel runakunataqa Tayta Diosmi kuyan.
Shonqunkunacho imaypis allillata yarpaqkunataqa shumaqmi yanapan.
2 Tsaynö kaptinpis noqaqa ichikllapami Tayta Diosman yärakuykanqäpita witikushqätsu.
3 Jutsa ruraq runakuna imaykayuqyäyanqanta rikarmi pasaypa envidiakurqä.
4 Paykunataqa qeshyapis manami tsarintsu.
Wanuytapis manami yarpäyantsu.
5 Wakin runakunanöqa manami ñakayantsu.
Ima desgraciapis manami päsantsu.
6 Runa tukurmi puriykäyan.
Runa mayinta atacayänanpäpis kamarikushqami kaykäyan.
7 Imaykankunapis kaptinmi werayaywan ñawinkunapis saltananrä.
Pasaypa llutan rurayllamanmi churakashqa kaykäyan.
8 Pïmaytapis manakaqmanmi churayan.
Pitapis maqayänanpä o wanutsiyänanpämi jurapar puriyan.
9 Tayta Diospa contranmi parlayan.
Runa mayinpapis contranmi shäriyan.
10 Tsaynö kayaptinpis paykunataqa runakuna alabayanmi.
Imata niyanqantapis criyiyanmi.
11 Tsay mana alli runakunaqa nikäyan:
“¿Imanöpatä llapantaqa Dios musyanqa?
¿Imanöpatä ciëlucho kaykarqa rikanman?”†
12 Tsaynömi mana alli runakuna kaykäyan.
Tsaynö karpis paykunaqa mana ñakayllapami imaykayuq rikakuyan.
13 Noqaqa manakaqllapämi jutsata mana ruraypa kawaykä.
Manakaqllapämi allillata rurar kawaykä.
14 Qoyay qoyaymi mana allikuna päsaykäman.
Cada tutami ñakaykä.†
15 Tsaynö kaptinpis tsay yarpanqäkunata manami parlakütsu.
Tsaykunata parlarqa kuyanqayki runakunata ajanätsïmanmi karqan.
16 Mana alli runakuna imanir alli kawayanqanta manami tantiyayta kamäpakütsu.
17 Tayta Diospa templunman aywarrämi tantiyashqä.
Tsaychörämi tsay runakuna imanö ushakäyänanpä kanqanta tantiyashqä.
18 Paykunaqa pasaypa peligruchömi kaykäyan.
Ushakashqa kayänanpämi Tayta Dios destinashqa.
19 Paykunaqa illaqpitami ushakäyanqa.
Mantsariyllami paykunacho kanqa.
20 Suëñunqanta runa qonqanqannömi paykunapis qonqashqa kayanqa.
Tayta Dios, tsaynö kayanqa castigaptikimi.
21 Shonqü pasaypa ajanaptinmi qallayashqa karqä.
22 Pasaypa mana tantiyakuq karmi ñöpaykicho imayka uywanö karqä.
23 Tsaynö kaptïpis qammi yanapamanki.
Derëcha kaq makïpitami jancharämanki.
24 Yätsikuynikiwanmi shumaq tantiyatsimanki.
Nirkurnami gloriaman pushakamanki.
25 Ciëluchöpis qamllami salvamaqnï kaykanki.
Kay patsachöpis makikicho karmi kushishqa kawashä.
26 Kallpä ushakaptinpis y shonqü pasaypa llakikuptinpis qammi imaypis shakyätsimanki.
Kikikimi imayyaqpis herenciä kaykanki.
27 Qampita witikuqkunataqa ushakätsinkimi.
Mana cäsukushuqnikikunataqa illakätsinkimi.
28 Noqami itsanqa imaypis qamllaman yärakamushä.
Qamman yärakamunqäqa llapanpitapis mas allimi kaykan.
Tayta Dios, qammi tsapämaqnï kaykanki.
Yanapamanqaykitami pïmaytapis willashä.