Salmo 74 (73)
Kuyanqan runakunata salvananpä mañakunqan
(1a) Asaf qellqanqan salmumi.
1 (1b) Tayta Dios, ¿japanllapatsurä kachariykayämashqayki?
Majädaykicho üshaykinö kaykäyaptïqa ¿imanirtä pasaypa ajakurkushqayki?
2 Unaypita patsa akranqayki runakuna kaykäyaptïqa yarpaykayällämay.
Herenciayki kayänäpämi salvayämarqayki.
Sión jirkancho tanqayki templu raykuq yanapaykayällämay.
3 Templucho kaqkunatapis llapantami contraykikuna ushakätsiyashqa.
Juchutsiyanqanta rikanaykipä shamuykullay.
4 Templuykita juchuskatsirmi kushikur qayaykachäyashqa.
Bandërankunatapis tsaymanmi jawiyashqa.
5 Paykunaqa imayka muntita tsaquqnömi templuykitapis juchutsir ushayashqa.
6 Tablakunacho kuyayllapä llaqllaypa adornayanqantapis jächawan y pïcuwanmi ushakätsiyashqa.
7 Tsaynömi templuykita rupatsir ushayashqa.
Täkunayki templuta manakaqman churarmi llapanta juchutsir ushayashqa.
8 Tsay runakunami chipyaq illakätsiyämayta yarpayan.
Kay nacionchöqa qamta adoranäpä qorikäyänä wayikunatapis llapantami rupatsiyashqa.
9 Bandëräkuna pallpallyaqtapis mananami rikayänatsu.
Profëtakunapis mananami kayannatsu.
Manami musyayätsu imayyaq tsaynö kayänäpä kanqantapis.
10 Tayta Dios, ¡imayyaqrä chikimaqnïkuna wajupäyämanqa!
¡Imayyaqrä wasaykitapis rimaykäyanqa!
11 ¿Imanirtä yanapayämankinatsu?
¿Imanirtä makiki oqllashqa kaykanki?
12 Tayta Dios, unaypita patsami mandamaqnï rey kaykanki.
Kay markacho atska kutimi chikimaqnïkunata vincishqayki.
13 Lamar yakutapis munaynikiwanmi ishkayman rakishqayki.†
Lamarcho mantsaypä uywakunapa umantapis pakirqaykimi.
14 Leviatán† waräkuypa umankunatapis llapirirqaykimi.
Tsaytami tsunyaq jirkacho taq uywakuna mikuyänanpä jitarirqayki.
15 Mayu kananpämi yakutapis pashtatsimurqayki.
Mana tsakiq mayukunatapis tsakitsirqaykimi.
16 Junaqtapis paqastapis kamashqaykimi.
Killatapis rupaytapis kamashqaykimi.
17 Kay patsa maypita y mayyaq kananpäpis qammi señalta churashqayki.
Usya killatapis y tamya killatapis kamashqaykimi.†
18 Tayta Dios, contraykikunami ashlliykäyäshunki.
Mana alli runakuna contrayki parlayanqanta ama perdonaytsu.
19 Noqakunataqa ama qonqaykayämaytsu.
Kullkushnömi pasaypa mantsariyä.
Jirka uywa niraq runakunapa makincho ama kachaykayällämaytsu.
20 Kay nacionchöqa maytsaychöpis llutanllatami ruraykäyan.
Noqakunawan pactu ruranqaykita yarpar yanapaykayällämay.
21 Ñakatsiyämänanta ama munaykullaytsu.
Muchuqkuna y qollmi shonqukuna alabayäshunaykipä yanapaykullay.
22 Tayta Dios, makikicho kaykäyaptïqa juklla yanapaykayällämay.
Tsay mana alli runakunaqa qoyay qoyaymi contrayki shäriykäyan.
23 Chikishuqniki runakunaqa contraykimi imaypis parlaykäyan.
Tsaynö kayanqanta rikaykarqa ras yanapaykayällämay.