Salmo 75 (74)
Runakunata Tayta Dios juzgananpä ninqan
(1) Cantaqkunapa mandaqninpämi. Ama ushakätsiytsu niyanqan cantupa tönunwan kay salmuta cantayanki. Asaf qellqanqan salmu. Cantanantsikpämi.
1 (2) Tayta Dios, qamtami imaypis agradëcikuyä.
Qamta imaypis agradëcikuyä.
Yanapayämanqaykipitami jutikita joqarir qamta alabayä.
2 (3) Tayta Diosmi nin:
“Tiemputa jitanqä junaqmi runakunata mana jananpaypa juzgashä.
3 (4) Kay patsa kuyuptin runakuna mantsariyaptinpis noqami patsapa cimientunta tsararaykä. Selah
4 (5) Runa tukuqkunatami nï: ‘Ama runa tukuyaytsu’.
Mana alli runakunatanami nï: ‘Ama orgullösu kayaytsu.
5 (6) Runakuna respitayäshuptiki ama runa tukuyaytsu.
Ama yachaq tukuypa parlayaytsu’ ”.
6 (7) Alli rikashqa kayqa manami rupay yarqamunanläpitatsu,
ni rupay jeqananläpitatsu
ni tsunyaq jirkapitatsu shamun.
7 (8) Tsaypa rantinqa llapantapis juzgaq Tayta Diospitarämi shamun.
Paymi runakunata juzgar wakinta castigan y wakinta alli rikan.
8 (9) Tayta Diosmi castïgun wiñaraykaq cöpata aptaraykan.
Tsay cöpachömi paypa ajanaynin junta kaykan.
Maytsaycho taq mana alli runakunata castigarmi tsay cöpapita ushanqanyaq uputsinqa.†
9 (10) Noqaqa Jacob yärakunqan Tayta Diospitami imaypis willakushä.
Cantukunawanmi imaypis cantapäshä.
10 (11) Mana alli runakunataqa autoridä kayninpitapis qarqunqami.
Alli runatami itsanqa autoridä kananpä churanqa.