Salmo 76 (75)
Tayta Dios munayyuq kanqan
(1) Cantaqkunapa mandaqninpämi. Cuerdayuq instrumentuta tukar kay salmuta cantayanki. Asaf qellqanqan salmu.
1 (2) Judá nacioncho llapanmi musyayan Tayta Dios kanqanta.
Israel nacionchöpis pïmaymi musyayan Tayta Dios munayyuq kanqanta.
2 (3) Jerusalénchömi templun kaykan.
Sión jirkanchömi payqa tan.
3 (4) Tsaychömi atacaq aywaqkunata vinciskir flëchankunata, escüdunkunata, espädankunata y llapan armankunatapis pakir usharqan. Selah
4 (5) Tayta Dios, llapanpitapis mas munayyuqmi kaykanki.
Atska uywayuq jirkapitapis qamqa mas shumaqmi kaykanki.
5 (6) Alli chölu kaqkunatapis llapantami ushakätsirqayki.
Munayyuq karpis manami ima ruraytapis kamäpakuyarqantsu.
Paykunataqa chipyaqmi wanutsirqayki.
6 (7) Jacob yärakunqan Tayta Dios, qam ollqutupaptikimi carrëta manijaqkunapis y cawallukunapis mantsariywan chiyaskiyarqan.
7 (8) ¡Qamqa pasaypa mantsariypämi kaykanki!
Ajaptikiqa ¿pirä ñöpaykicho kaykanman?
8 (9) Jutsa ruraqkunata castiganaykipä kanqanta ciëlupita patsami musyaykätsinki.
Kay patsacho llapan runakunapis mantsarirmi upällakuyan.
9 (10) Tsaynö mantsariyan kay patsacho juzganaykipä kanqanta musyarmi.
Juzgarmi ñakaykaqkunapa janan shärinki. Selah
10 (11) Tsaynöpami ajashqa kaykaq runakunapis alabayäshunki.
Castïguykipita qeshpiqkunaqa tantiyarmi alabayäshunki.
11 (12) Tayta Diosnintsikta awninqaykita imaypis cumpliyay.
Vecïnuntsik nacionkunapis paypä ofrendakunata apayämutsun.
Payqa mantsariypämi castigan.
12 (13) Paymi mandaq autoridäkunatapis wanutsin.
Kay patsacho kaykaq reykunapis paytaqa mantsayanmi.