Salmo 77 (76)
Espantaypä kaqkunata Tayta Dios ruranqan
(1) Cantaqkunapa mandaqninpämi. Jedutúnpämi. Asaf qellqanqan salmu.
1 (2) Llapan shonqüwanmi Tayta Diosta mañakü.
Wiyamänanpämi payta jinchi rugakü.
2 (3) Llakikunqä hörami Tayta Diosta rugakü.
Paqaspa makïta joqarkur mañakurpis manami ajayätsu.
Tsaynö mañakuykarpis pasaypami llakikü.
3 (4) Llakikurnin ni ima ruraytapis mana kamäpakurmi Tayta Diosta mañakur waqä. Selah
4 (5) Tayta Dios, qampä yarpachakurmi punuytapis tarïtsu.
Imanö yarpachakurpis manami ima niytapis kamäpakütsu.
5 (6) Ñöpata yanapayämanqaykitami yarparaykä.
Unayna kashqa kaptinpis manami qonqätsu.
6 (7) Paqaskuna qamta alabanqätami yarpaskï.
Tsaymi shonqullächo yarpachakur nï:
7 (8) “¿Tsaynöllatsurä Tayta Dios ajashqa kaykanqa?
¿Mananatsurä yapay kuyapämäshun?
8 (9) ¿Kuyakuq kayninpis ushakashqanatsurä?
Awninqanta ¿pasaypatsurä qonqaykushqa?
9 (10) ¿Kuyapäkuq kanqanta qonqaykushqatsurä?
¿Pasaypa ajanaywantsurä kuyapäkuyninpis ushakashqa?” Selah
10 (11) Tsaymi nirqä: “Poderyuq Tayta Diosqa manami unaynönatsu kuyakuq kaykan”.
Tsaynö nirmi pasaypa llakikurqä.
11 (12) Llakikuykanqächömi yarpaskirqä mantsakaypä kaqkunata unay ruranqaykikunata.
12 (13) Llapan ruranqaykitami yarpäshä.
Munaynikiwan ruranqaykikunata manami qonqäshätsu.
13 (14) Tayta Dios, llapan ruranqaykikunaqa allimi kaykan.
Qammanqa manami mayqan diospis tinkuntsu.
14 (15) Qammi mantsariypä kaqkunata ruranki.
Wakin nacionkunatami musyatsishqayki munayyuq kanqaykita.
15 (16) Kuyanqayki runakunatami munaynikiwan jipimurqayki.
Paykunaqa Jacobpita y Josépita aywaraqkunami kaykäyan. Selah
16 (17) Tayta Dios, lamar yakupis rikaskishurnikimi pasaypa mantsarirqan.
Mayläya jondunnincho kaykaq yakupis tsuktsukyarqanmi.
17 (18) Pukutarmi tamyamurqan.
Ciëluchömi maqakuypis wiyakämurqan.
Entërupami illaqukuypis chillapyämurqan.
18 (19) Shukukuy wayrachömi maqakuyniki pashtanqanpis wiyakämurqan.
Illaqukuynikipa atsikyayninwanmi patsapis rikakarqan.
Temblorwanmi patsapis pasaypa kuyurqan.
19 (20) Lamar chawpinpami nänita rurarqayki.
Atska yaku chawpinpami aywarqayki.
Manami pipis rastruykita tarirqantsu.†
20 (21) Üshata pushaqnömi kuyanqayki runakunata pusharqayki.
Moiséswan y Aarónwanmi paykunata pushatsirqayki.†