Salmo 78 (77)
Kuyanqan runakunata Tayta Dios alli rikanqan
(1a) Asaf qellqanqan salmumi.
1 (1b) Marka mayikuna, yachatsiptï shumaq wiyayämay.
Parlapaptï shumaq chaskikuyay.
2 Imamanpis tinkutsiypami yachatsiyäshayki.
Unay ima päsanqankunata musyayänaykipämi willayäshayki.†
3 Tsaykunata musyantsik awiluntsikkuna willamanqantsikpitami.
4 Tsaykunataqa wamrantsikkunata willashun.
Tayta Dios munayyuq kanqanta musyatsishun.
Munayninwan mantsakaypä ruranqankunata willashun.
5 Jacobpita aywaraqkunatami leyninkunata Tayta Dios entregarqan.
Tsay leykunachömi tantiyatsirqan Israel runakuna imanöpis kawayänanpä.
Paykunatami ordenarqan wamrankunata yachatsiyänanpä.
6 Tsaynöpami qepa yuriqkunapis musyayanqa.
Tsay qepa yuriqkunapis wamrankunatami yachatsiyanqa.†
7 Tsaynö yachatsishqami wamrantsikkunapis Tayta Diosman yärakuyanqa.
Tayta Dios yanapanqantapis manami qonqäyanqatsu.
Paypa mandamientunkunatapis llapantami cumpliyanqa.
8 Unay kaq castantsikkunanöqa mana cäsukuq y mana wiyakuq manami kayanqatsu.
Unay castantsikkunaqa mana wiyakuq chukru shonqumi kayarqan.
Paykunaqa kullu rinrimi kayarqan.
Tsaynö karmi Tayta Dioswan pactu rurayanqantapis cumpliyarqantsu.
9 Efraín trïbu runakunaqa flëchayta yachaq soldädukunami kayarqan.
Tsaynö karpis guërrapita qeshpirmi aywakuyarqan.
10 Tayta Dioswan pactu rurayanqantapis manami cumpliyarqantsu.
Yachatsinqantapis manami wiyakuyarqantsu.
11 Tayta Dios yanapanqantapis qonqaykuyarqanmi.
Mantsakaypä milagru ruranqantapis pasaypami qonqaykuyarqan.
12 Unay castantsikkuna rikaykaptinmi mantsariypä kaqkunata Tayta Dios rurarqan.
Tsaynö rurarqan Egiptucho kaykaq Zoán partichömi.†
13 Lamarta ishkayman rakiskirmi chawpinpa paykunata päsatsirqan.
Päsayänanpämi lamarta ishkayman rakir murällatanö ichïtsirqan.†
14 Junaqpami pukutaywan pusharqan.†
Paqaspanami lunyaykaq ninawan pusharqan.
15 Tsunyaq jirkachömi qaqatapis kichakätsirqan.
Upuyänanpämi atska yakuta pashtatsimurqan.
16 Qaqapita pashtatsimuptinmi mayunörä yaku aywarqan.†
17 Tsaynö yanapaykaptinpis paykunaqa Tayta Diospa contranmi shäriyarqan.
Tsunyaq jirkachömi poderyuq Tayta Diosta ajanätsiyarqan.
18 Munayanqallanta mikuyta munarmi Tayta Diosta shonqunkunacho tentayarqan.
19 Tayta Diospa contran parlarmi niyarqan:
“Kay tsunyaq jirkachöqa ¿maypitatä mikuyta kamaripämäshun?
20 Musyantsikmi qaqata Tayta Dios kichakätsiptin mayunörä yaku yarqamunqanta.
Tsaynö rurashqa karpis ¿maypitatä mikuyta kamaripämäshun?
Aytsatapis ¿maypitatä kamaripämäshun?”
21 Tsaynö parlayanqanta wiyarmi Tayta Dios ajarqan.
Jacobpita aywaraq runakunapämi pasaypa rabyarqan.
22 Paykunaqa Tayta Diosman manami yärakuyarqantsu.
Yanapananpä kanqantapis manami criyiyarqantsu.
23 Tsaynö kayaptinpis Tayta Diosmi paykunaman pukutayta kachamurqan.
Kikinmi ciëlu punkutapis kicharqan.
24 Kuyanqan runakunapämi tamyatanö manáta shushutsimurqan.
Tsayqa ciëlupita shushumuq mikuymi karqan.
25 Angelkuna mikuyanqan tantatami mikuyarqan.
Pacha junta mikuyänanpämi mikuyta Tayta Dios kamariparqan.†
26 Tsaynöllami rupay yarqamunan kaqläpita y sur kaqläpita wayrata wayrätsimurqan.
27 Tsay wayrawanmi codornizkunata chätsirqan.
Tsaynöpami lamar kuchuncho aqushanörä tsaytsika aytsa karqan.
28 Tsay codornizkunatami Tayta Dios chätsirqan runakuna taykäyanqan campamentuman.
Toldunkuna ñöpanmanmi ishniqtarä chätsirqan.
29 Tsaymi pasaypa melanäyanqanyaq mikuyarqan.
Tsaynöpami Tayta Diosqa mañakuyanqanta kamariparqan.
30 Wakintaqa pachan manarä juntaptinmi y aytsata tsayrä kachuykäyaptinmi 31 Tayta Dios ajarnin ushakätsirqan.
Mas kallpasapa kaq runakunatami wanutsirqan.
Israel runakunacho mas alli chölu kaq runakunatami ushakätsirqan.†
32 Tsayta rikaykarpis kanqallanmi jutsata rurayarqan.
Milagrukunata ruranqanta rikaykarpis manami Tayta Diosman yärakuyarqantsu.
33 Tsaymi Tayta Dios paykunata jamaytanölla desgraciawan ushakätsirqan.
34 Wakinta wanutsinqanta rikarrämi Tayta Diosman yärakuyarqan.
Tsaynöpami llapan shonqunkunawan perdonta mañakuyarqan.
35 Tsaynöpis yarpäyarqan Tayta Dios qaqanö tsapaqnin kanqantami.
Tsaynöllami yarpäyarqan poderyuq Tayta Dios salvaqnin kanqanta.
36 Tsaynö yarpaykarpis paykunaqa Tayta Diosta llullapäyarqanmi.
37 Tayta Diosta cäsukuyänanpä awnirkurpis manami cäsukuyarqantsu.
Tayta Dioswan pactu rurayanqantapis manami cumpliyarqantsu.
38 Tsaynö kayaptinpis paykunata Tayta Dios kuyaparqanmi.
Jutsata rurayanqanta perdonarmi ushakätsirqantsu.
Atska kuti pasaypa ajarpis manami castigarqantsu.
Rabyarninpis pacienciakurqanmi.
39 Runalla kayanqanta musyarmi kuyaparqan.
Wayranö päsaqlla kayaptinmi kuyaparqan.
40 Paykunaqa atska kutimi Tayta Diospa contran shäriyarqan.
Atska kutimi tsunyaq jirkacho payta ajanätsiyarqan.
41 Kutin kutinmi munayanqanta rurananpä Tayta Diosta tentayarqan.
Tsaynöpami santu Diosninta pasaypa ajanätsiyarqan.
42 Tayta Dios munayyuq kanqantapis qonqaykuyarqanmi.
Chikiqninkunapa makinpita salvanqantapis manami yarpäyarqannatsu.
43 Tsaynöpis manami yarpäyarqannatsu Egiptucho kaykaq Zoán particho mantsakaypä milagrukunata ruranqanta.
44 Tsaychömi mayukunatapis yawarman tikratsirqan.
Tsaymi Egiptucho taq runakuna upuyta melanäyarqan.†
45 Upukurukunatapis† y säpukunatapis† ishniqtarämi paykuna täyanqanman juntatsirqan.
46 Chukllushkunatami yuritsirqan chakracho mikuyta ushayänanpä.
Llapan murukuyanqanta wiñamuyllantami chipyaq ushayarqan.†
47 Runtu tamyawanmi üvakunatapis ushakätsirqan.
Qajapawanmi hïguskunatapis chipyaq ushakätsirqan.
48 Runtu tamyawan y maqakuywanmi wäkakunatapis y üshakunatapis wanutsirqan.†
49 Tayta Diosmi ajarnin Egipto runakunata tsaynö castigarqan.
Wanutsikuq angelkunatami paykunaman kachamurqan.
50 Mana kuyapaypami paykunata ushakätsirqan.
Mana perdonarmi wanutsirqan.
51 Tsaymi Egiptucho llapanpa mayor ollqu tsurinkunata ushakätsirqan.†
52 Tsaypitanami kuyanqan Israel runakunata üshata mitsiq runanö Egiptupita jipimurqan.
Tsunyaq jirkapami paykunata pushamurqan.†
53 Mana mantsariyänanpämi shumaq pushamurqan.
Chikiqninkunatami itsanqa lamar ultakurkurqan.†
54 Tsaypitami kuyanqan runakunata awninqan nacionman pushamurqan.†
Paykunata rikatsinanpämi tsaycho taq runakunata kikin vincirqan.
55 Kuyanqan runakunapa ñöpanpitami tsay runakunata qarqurqan.†
Paykunapa chakrankunata y markankunatami Israel runakunatana aypurqan.
56 Tsaynö yanapaykaptinpis poderyuq Tayta Diosta tentarmi pasaypa ajanätsiyarqan.†
Tayta Dios ninqantapis manami cäsukuyarqantsu.
57 Unay castankunanömi paykunapis Diosta awniyanqanta cumpliyarqantsu.
Wiksu aywashqa flëchanömi paykunapis kayarqan.
58 Markakunacho altarkunata rurarmi Tayta Diosta ajanätsiyarqan.
Ïdulukunata adorarninmi ajanätsiyarqan.
59 Tsayta rikarmi Tayta Dios pasaypa rabyakurqan.
Israel runakunata kacharirmi yanaparqannatsu.
60 Kay patsacho täkunan tolduntapis kachariykurqanmi.
Silo markacho kaykaq tolduncho mananami tarqannatsu.†
61 Contran runakuna apakuyänanpämi Pactu Babulta kachaparqan.†
62 Kuyanqan runakunata espädawan wanutsiyänanpämi kachariykurqan.
63 Nina rupar ushaqnörämi chölukunatapis guërracho wanutsir ushayarqan.
Tsaymi jipashkunawan majatsakäyänanpä chölukunapis karqannatsu.
64 Sacerdötikunatapis espädawan wanutsirmi ushayarqan.
Viüdankunapis wanutsiyänanta mantsarirmi lütuyarqannatsu.
65 Tsaypitanami punukashqanö kaykäyanqanta tantiyaskir kuyanqan runakunata Tayta Dios yapay yanaparqan.
Tsaynöpami tsay chikiqninkuna imaypis penqakuycho kayarqan.
67 Tayta Dios manami munarqannatsu Josépita aywaraq Efraín trïbu runakuna täyanqan particho templun kananta.
68 Tsaypa rantinqa Judá trïbu runakuna täyanqan partitami akrarqan.
Tsaychömi kuyanqan Sión jirkanta akrarqan templunta ruratsiyänanpä.
69 Templunta shäritsirmi ciëluyaq altu kananpä shäritsirqan.
Kay patsanö mana ushakaq kananpämi shäritsirqan.
70 Üshan qatishqa puriykaqtami sirviqnin Davidta akrarqan.
71 Jacobpita aywaraq kuyanqan Israel runakunata rikananpämi üshata mitsir puriykaqta akrarqan.†
72 Tsaymi Davidqa llapan shonqunwan paykunata shumaq rikarqan.
Shumaq yarpachakuykurmi paykunata pushararqan.