Salmo 79 (78)
Jerusalénta juchutsiyanqanpita llakikunqan
(1a) Asaf qellqanqan salmu.
1 (1b) Tayta Dios, contrayki nación runakunami markaykiman yaykayämushqa.
Sagrädu templuykimanpis mana respitaypami yaykuyashqa.
Jerusaléntapis raqällatanami jaqiyashqa.†
2 Sirvishuqnikikunapa ayantapis wiskurkuna y munti uywakuna mikuyänanpämi jitariyashqa.
3 Yakutanörämi yawarnintapis entëru Jerusaléncho jichayashqa.
Ayakunata pampananpä manami pipis kashqatsu.
4 Tsayta musyaykurmi vecïnü nación runakunapis kushipäyämarnin asipäyäman.
Tsaynöpis manakaqmanmi churayäman.
5 Tayta Dios, ¡imayyaqrä noqakunawan ajashqalla kaykanki!
¿Tsaynöllatsurä imayyaqpis ajashqa kaykanki?
6 Ajashqa karqa contrayki nación runakunata castigaykullay.
Paykunaqa manami cäsukuyäshunkitsu ni jutikitapis joqariyantsu.
7 Paykunami Jacobpita aywaraqkunata wanutsir ushayashqa.
Kay nacioncho markakunatapis raqällatami jaqiyashqa.†
8 Unay castäkuna jutsata rurayanqanpita ama castigaykayällämaytsu.
Pasaypa llakishqa kaykäyanqäta rikaykarqa juklla yanapaykayällämay.
9 Salvakuq Tayta Dios, kuyapaykayällämay.
Perdonayämar salvaykayällämay.
Tsaynöpami pïmaypis tantiyakuyanqa awninqaykita cumpliq kanqaykita.
10 Wakin nación runakunami nikäyan:
“¿Maychötä Diosninkuna kaykan?”†
Sirvishuqnikikunata wanutsiyanqanpita paykunatapis ushakaykatsillay.
Paykunatapis castiganqaykita pïmaypis musyayätsun.
11 Prësukuna mañakayämushunqaykita wiyaykullay, ari.
Wanutsishqa kayänanpä kaykaqkunata munaynikiwan salvaykuy, ari.
12 Tayta Dios, vecïnü nación runakuna contrayki parlayanqanpita qanchis kuti castigaykullay.
13 Noqakunaqa kuyanqayki runakunami kaykäyä.
Majädaykicho kaykaq üshaykikunami kaykäyä.
Imaypis agradëcikuyäshaykimi.
Mana kachaypami imaypis alabayäshayki.