Salmo 80 (79)
Yapay yanapananpä Tayta Diosta mañakunqan
(1) Cantaqkunapa mandaqninpämi. Liriu waytakuna niyanqan cantupa tönunwan kay testimoniu salmuta cantayanki. Asaf qellqanqan salmu.
1 (2) Israel runakunapa mitsiqnin Tayta Dios, wiyaykayällämay.
Üsha mitsiqnömi Josépita aywaraqkunata rikaykanki.
Querubinkuna chawpincho jamaraykanqaykipita patsa wiyaykayällämay.†
2 (3) Efraín, Manasés y Benjamín trïbu runakunata yanapaykullay.
Shamur munaynikiwan salvaykayällämay.
3 (4) Tayta Dios, ñöpata yanapayämanqaykinölla kananpis yanapaykayällämay.
Mana ajayllapa salvaykayällämay.
4 (5) Munayyuq Tayta Dios, kuyanqayki runakuna rugakuykäyäshuptikiqa ¡imayyaqrä ajashqalla kaykanki!
5 (6) Llakikuyaptïmi mallaqaypis kantsu.
Waqaykällarmi weqïkunatapis upuykäyä.
6 (7) Vecïnü nación runakuna kushipäyämänanpämi kachariyämashqayki.
Chikimaqnïkunapis asipaykäyämanmi.
7 (8) Munayyuq Tayta Dios, ñöpata yanapayämanqaykinölla kananpis yanapaykayällämay.
Mana ajayllapa salvaykayällämay.
8 (9) Egiptupitami üva plantataa apamurqayki.
Juk nación runakunata qarquskirmi plantarqayki.
9 (10) Chakrata shumaq kamariskir plantaptikimi ruriyaq michïkurqan.
Alli wiñarmi kay nacionman juntarqan.
10 (11) Llimllasapayarmi jirkakunatapis llantuyninwan tsaparqan.
Llimllankunawanmi jatusaq cedrukunatapis tsapaskirqan.
11 (12) Llimllankunaqa lamaryaqmi ayparqan.
Sheqllimunqanpis Éufrates mayuyaqmi chäyarqan.
12 (13) Kananqa ¿imanirtä murällan tsaparaqta taqurishqayki?b
Nänipa päsaq jäpa runakunapis wayuyninta llutallami pallakuyan.
13 (14) Munti kuchikunapis jarutakurmi ushayan.
Jirka uywakunapis mikurmi ushayan.c †
14 (15) Munayyuq Tayta Dios, kutikallämuy.
Ciëlupita patsa yanapaykayällämay.
Shamur plantanqayki üvata rikaykullay.
15 (16) Kikikimi tsay üvata plantarqayki.
Sheqllimuqkuna shumaq wiñananpä kikikimi uryarqayki.
16 (17) Tsay üva plantaykitami chipyaq rupatsir ushayashqa.
Tsaynö rurayanqanpita castigaykullay.
17 (18) Rey kananpä churanqayki runata yanapaykullay.
18 (19) Noqakunaqa qammanmi imaypis yärakayämushä.
Salvayämaptikimi jutikita joqarir imaypis alabayäshayki.
19 (20) Munayyuq Tayta Dios, ñöpata yanapayämanqaykinölla kananpis yanapaykayällämay.
Mana ajayllapa salvaykayällämay.