Salmo 81 (80)
Fiestacho cantananpä cantu
(1) Cantaqkunapa mandaqninpämi. Üvata jarur cantayanqayki tönuwan kay salmuta cantayanki. Asaf qellqanqan salmu.
1 (2) ¡Tayta Diosta kushishqa alabashun!
Paymi ima desgraciapitapis tsapämantsik.
Jacob yärakunqan Tayta Diosta kushishqa alabashun.
2 (3) Panderëtakunata tukar cantashun.
Waqay waqayta arpatapis salteriutapis tukarnin alabashun.
3 (4) Llullu killachöpis y llena killachöpis cornëtata tukashun.
Tsay junaqkuna jatun fiestata rurashun.†
4 (5) Israel runakuna alabanantsikpämi Jacob yärakunqan Tayta Dios nimarqantsik.
5 (6) Egiptupita jipiskamurmi Josépita aywaraq unay castantsikkunata Tayta Dios nirqan alabayänanpä.
Imaypis mana wiyanqä voztamia wiyarqä. Tsay vozmi nirqan:
6 (7) “Pasaypa ñakaykätsiyäshuptikimi qamkunata jipimurqä.
Pasaypa aruykätsiyäshuptikimi qamkunata pushamurqä.
7 (8) Pasaypa llakikurnin mañakayämaptikimi salvarqä.
Maqakuykaq pukutay rurinpitami wiyamurqä.
Meriba yaku ñöpanchömi qamkunata pruebarqä.† Selah
8 (9) “Kuyanqä runakuna, yätsinqäta shumaq wiyakuyay.
Israel runakuna, ima allirä kanman cäsukayämaptiki.
9 (10) Ima ïdulutapis ama tsararäyaytsu.
Juk nacionkuna adorayanqan dioskunata ama adorayaytsu.†
10 (11) Noqami Egiptupita jipiyämushuqniki Tayta Diosnikikuna kaykä.†
Mañakayämanqaykitaqa imatapis atskatami kamaripäyäshayki.
11 (12) “Tsaynö awniykaptïpis qamkunaqa manami cäsukayämashqaykitsu.
Israel runakuna kaykarpis manami wiyakayämashqaykitsu.
12 (13) Tsaynö kayanqaykipitami shonquykikuna munanqannö kawakuyänaykipä kachariykushqä.
13 (14) Kuyanqä runakuna, ¡ima allirä kanman wiyayämaptiki!
Israel runakuna, ¡ima allirä kanman cäsukayämaptiki!
14 (15) Cäsukayämaptikiqa illaqpitami contraykikunata ushakätsïman.
Chikishuqnikikunata maynami castigäman karqan”.
15 (16) Tayta Diosqa llapan chikiqninkunatami vincinqa.
Paykunataqa imayyaqpis castigashämi.
16 (17) Kuyanqan runakunatami itsanqa allinnin trïguta kamaripanqa.
Abëjapa mishkintapis jimaqpämi kamaripanqa.