Salmo 40 (39)
Tayta Dios yanapaykunanpä mañakunqan
(1) Cantaqkunapa mandaqninpämi. David qellqanqan salmu.
1 (2) Yanapamänanpämi Tayta Diosta shuyarashqä.
Qayakunqäta wiyamarmi yanapamashqa.
2 (3) Wanwanyaykaq pözuman jeqashqanö kaykanqäpitami salvamashqa.
Sinigaman jatikashqanö kaykanqäpitami jipimashqa.
Yapay mana jatikänäpämi rumi jananman ichïtsimashqa.
Tsaymi mana llutskaypa puriqnöna kawaykä.
3 (4) Tsaynö yanapamaptinmi mushuq cantuta cantar Tayta Diosnintsikta alabaykä.
Salvamanqanta rikarmi atska runakuna kushikurnin Tayta Diosman yärakuykäyan.
4 (5) Tayta Diosman yärakuqkunaqa kushishqami kawayan.
Paykunaqa runa tukuqkunaman manami yärakuyantsu.
Ïdulukunatapis manami adorayantsu.
5 (6) Tayta Dios, atska kutimi mantsakaypä kaqkunata rurar yanapayämashqayki.
Yanapayämanqaykita yupaytapis manami atipätsu.
Imaykanöpa yanapayämanqaykita willakurpis llapantaqa manami ushämantsu.
6 (7) Qammi tantiyatsimashqayki sacrificiukunawan y tsaki mikuy ofrendakunawan mana kushikunqaykita.
Tsaynöpis musyatsimashqayki rupatsina sacrificiukunata y purificatsina sacrificiukunata mana munanqaykita.
7 (8) Tsaymi nirqä:
“Röllucho noqapä qellqaranqannömi cäsukunäpä kaycho kaykä.
8 (9) Tayta Dios, munanqaykita ruranäpä listumi kaykä.
Leynikikunatapis llapantami shonqücho yarparaykä”.†
9 (10) Llapan runakuna qorikäyanqanchömi alli ruraq kanqaykita willakushqä.
Mana upällakunqäta musyankimi.
10 (11) Willakurmi nirqä: “Tayta Diosqa allillatami ruran.
Awninqanta cumplirmi salvamantsik.
Kuyapäkuqmi y rasun kaqllatami nimantsik”.
11 (12) Tayta Dios, kuyapaykallämay.
Awnimanqaykinölla kuyapämar imaypis tsapaykallämay.
12 (13) Yupaytapis mana atipaypä desgraciakunawanmi ñakaykä.
Jutsata ruranqäpita pasaypa waqarmi ñawïtapis oqraykä.
Aqtsäpitapis mas atskami jutsäkuna kaykan.
Tsaymi imata ruranäpäpis gänasnï kannatsu.
13 (14) Tayta Dios, salvaykallämay.
Juklla shamur yanapaykallämay.
14 (15) Wanutsimayta yarpaqkunaqa penqakurnin umpuykachäyätsun.
Mana alliman ishkinäta munaqkunaqa penqakurnin qeshpiyätsun.
15 (16) Asipämaqkunapis penqakurnin aywakuyätsun.
16 (17) Qamta ashishuqnikikunaqa kushikuyätsun.
Salvanqaykipita kushikuqkunaqa imaypis niyätsun:
“Tayta Dios alabashqa kaykullätsun”.
17 (18) Noqaqa llakishqa karmi ima ruraytapis kamäpakütsu.
Taytay, juklla shamur yanapaykallämay.
Qammi yanapamaqnï y salvamaqnï kaykanki.
Tayta Diosnillä, juklla yanapaykallämay.