Salmo 39 (38)
Jamaynö ushakaqlla runa kanqan
(1) Cantaqkunapa mandaqninpämi. Jedutúnpämi. David qellqanqan salmu.
1 (2) Noqami yarpachakur nirqä:
“Manami llutankunata rurashätsu.
Manami mana allikunata parlashätsu.
Mana alli runakunapa ñöpanchöpis upällami kakushä”.
2 (3) Yarpanqänöllami allitapis mana allitapis parlakurqätsu.
Tsaynö kaykarpis masrämi llakikurqä.
3 (4) Upällakuyta manami awantarqätsu.
Yarpachakuptïmi shonqüpis pasaypa ruparqan.
Tsaymi Tayta Diosta mañakur nirqä:
4 (5) “Tayta Dios, kay patsacho wallka watalla kawanäpä kanqanta musyaykatsillämay.
Ushakaqlla kanqäta tantiyaykatsillämay.
5 (6) Wallka junaqlla kawanäpämi kawayta qaramashqayki.
Atska wata kawaptïpis qampäqa manakaqnöllami.
Runaqa imayka jamaynö ushakaqllami. Selah
6 (7) “Llantuy päsanqannöllami runakuna kawayan.
Imaykayuq kayta munar wallällami imatapis qoriyan.
Manami musyayantsu qoriyanqan pipä kananpä kanqantapis.†
7 (8) Tayta Dios, tsaynö kaykaptinqa ¿imapätä riquëzakunaman yäraküman?
Tsaypa rantinqa qamllamanmi yärakamü.
8 (9) Jutsa ruraypita salvaykallämay.
Mana tantiyakuq runakuna amana asipäyämätsunnatsu.
9 (10) “Jutsata ruranqäpita kikikimi castigamashqayki.
Tsaymi imatapis parlakütsu.
10 (11) Ama ari castigaykallämaynatsu.
Castigamaptikimi pasaypa ñakaykä.
11 (12) Pitapis castigarqa jutsa rurayta kacharinanpämi castigaykanki.
Imaykatapis puyu ushanqannömi imatapis runa pasaypa kuyanqan kaqta ushakätsinki.
Jamaynö ushakaqllami runaqa kaykan. Selah
12 (13) “Tayta Dios, mañakamunqäta wiyaykallämay.
Waqapaptï ama upa tukuykullaytsu.
Noqaqa kay patsacho qorpanöllami kaykä.
Unay castäkunanöpis manarä unaytami wanukushä.†
13 (14) Ama ajashqa rikapämaynatsu.
Manarä wanur kushishqa kawanäpä yanapaykallämay”.†