Salmo 38 (37)
Qeshyaykaq runa Tayta Diosta mañakunqan
(1a) David qellqanqan salmu. Tayta Diospa altarnincho inciensiuta rupatsir kay salmuta cantayay.
1 (2) Tayta Dios, rabyashqa karpis amana ñakaykatsillämaytsu.
Ajanashqa karpis amana castigaykallämaytsu.†
2 (3) Castigamanqaykiwanmi pasaypa ñakaykä.
Flëchaykiwanmi flëchamashqayki.†
3 (4) Jutsata ruranqäpita castigamaptikimi entëru cuerpüpis nanaykan.
Llapan tullükunapis tumshuykanmi.
4 (5) Jutsata ruranqäpita ñakar manami awantänatsu.
Imayka lasaq qepita apariraqnömi kaykä.
5 (6) Mana cäsukur jutsata ruranqäpitami qerïkunapitapis poqru yarqamur pasaypa asyaykan.
6 (7) Llakishqa, umpukashqa y penqakushqallami qoyarküpis.
7 (8) Fiebriwanmi waqtäpis pasaypa achachan.
Entëru cuerpüpis pasaypami nanapäkun.
8 (9) Kallpäpis manami kannatsu.
Shonqüpis pasaypa ushakaqnömi kaykan.
9 (10) Tayta Dios, imata munaykanqätapis musyaykankimi.
Llakikuykanqätapis musyaykankimi.
10 (11) Shonqüpis utuk utukyaykanllanami.
Kallpäpis ushakashqami.
Ñawïpis tsakaykannami.
11 (12) Qerïkuna antsanqanta rikarmi amïgükunapis y castäkunapis witipäyämannatsu.†
12 (13) Conträkunaqa wanutsiyämänanpämi willanakuykäyan.
Chikimaqnïkunaqa ushakätsiyämänanpämi parlaykäyan.
Paykunaqa imay hörapis atacayämänanpämi yarpachakuykäyan.
13 (14) Wasä rimayaptinpis manami wiyaq tukütsu.
Upa tukurmi imatapis parlakütsu.†
14 (15) Mana wiyaq runanömi y washäkuyta mana puëdiq runanömi kaykä.
15 (16) Tayta Dios, qamllamanmi yärakamü.
Noqapa favornï parlaykullay.
16 (17) Imapis päsamaptin ama kushipäyämätsuntsu.
17 (18) Pasaypanami wanunaykä.
Kay nanayqa manami ni juk rätullapis wiyantsu.
18 (19) Mana allikunata ruranqäpitami perdonta mañakü.
Jutsäkunapita pasaypami penqakü.
19 (20) Chikimaqnïkunaqa atskanami kaykäyan.
Achäquita mana ashipaykaptïmi chikiyäman.
20 (21) Yanapaykaptïmi conträ shäriykäyan.
Allita ruraykaptïpis conträmi kaykäyan.
21 (22) Tayta Dios, japalläta ama kachaykallämaytsu.
Ama qonqaykallämaytsu.
22 (23) Imaypis salvamaq Tayta Dios, juklla salvaykallämay.