Salmo 37 (36)
Mana alli runakuna y alli runakuna imanö kayanqan
(1a) David qellqanqan salmu.
1 (1b) Mana alli runakunapita ama envidiakuytsu.
Paykunata ama ajanapaytsu.
2 Imayka llullu qewata llukiskishqa tsakinqannömi paykunaqa ushakäyanqa.
3 Tayta Diosman yärakur allikunata ruray.
Kay patsacho kawanqaykiyaq pay munanqannö kaway.
4 Tayta Diosta kushishqa sirviy.
Tsaynö kawaptiki shonquyki munanqantami kamaripäshunki.†
5 Llapan yarpachakunqaykita Tayta Diospa makinman churay.
Payman yärakuptikimi yanapashunki.†
6 Tsaymi alli runa kanqaykita llapanpis tantiyakuyanqa.
Tsaynö tantiyakuyanqa rupay yarqamuptin llapanpis rikakanqannömi.
7 Tayta Diosman yärakur ama llakikuytsu.
Yanapashunaykipä pacienciakur shuyay.
Runa imaykayuqpis kaptin ama ajanaytsu.
Mana allita rurananpä yarpachakuptinpis ama cäsupaytsu.
8 Llutallaqa imapitapis ama rabyakuytsu ni ajanaytsu.
Ajanarqa llutantami ruraykanki.
9 Mana alli runakunataqa Tayta Diosmi ushakätsinqa.
Payman yärakuqkunami itsanqa rikatsinqan nacioncho alli kawayanqa.†
10 Manaräpis unaytami mana alli runakunaqa ushakäyanqa.
Mayjina ashirpis manami tarinkitsu.
11 Alli shonqukunami itsanqa Tayta Dios rikatsinqan nacioncho alli kawayanqa.
Paykunaqa kushishqami kawayanqa.†
12 Mana alli runaqa alli runakunata wanuyparämi chikin.
Imata ruraptinpis nanaq ñawinpami rikapaykan.
13 Tsaynö kawayaptinmi Tayta Dios asikun.
Payqa musyanmi höran chämuptin ushakätsinanpä kanqanta.
14 Mana alli runakunaqa espädankunata jipiskirmi flëchankunatapis kamarikuyan.
Muchuqkunata, qollmi shonqukunata y alli runakunata wanutsiyänanpä kamarikushqami kaykäyan.
15 Tsaynö kaykaqtami kikinkunapa espädanwan shonqunkunapa tuksiyanqa.
Flëchankunatapis chipyaqmi pakir ushayanqa.
16 Imaykayuq kar mana alli runa kanantsikpa trokinqa imaynaq karpis alli runa kanqantsikmi mas alli kaykan.†
17 Mana alli runakunataqa chipyaqmi Tayta Dios ushakätsinqa.
Alli runakunatami itsanqa yanapanqa.
18 Tayta Dios munanqannö kawaqkunataqa mana kachaypami rikan.
Paykuna chaskiyänanpä kaq herencianqa imaypis manami ushakanqatsu.
19 Ñakay witsanpis allimi kawayanqa.
Muchuy witsanpis mikuynin atskami kanqa.
20 Mana alli runakunaqa imayka tsaki qewanömi rupar ushakäyanqa.
Tayta Diospa contran runakunaqa qoshninömi illakäyanqa.
21 Mana alli runakunaqa prestakuskirpis manami kutitsiyantsu.
Alli runakunami itsanqa kuyapäkuq kar pïmaytapis yanapayan.
22 Tayta Diospa bendicionninta chaskiqkunaqa chaskiyanqan nacioncho allimi kawayanqa.
Maldicionanqan kaq runakunami itsanqa ushakäyanqa.
23 Runa imanö kawananpäpis Tayta Diosmi kamakätsin.†
Pay munanqannö kawananpämi tantiyatsin.
24 Makinpita tsarararmi ishkinaptinpis joqarkun.
25 Wamra kanqäpita patsa awkinyanqäyaq manami imaypis rikashqätsu alli runa muchuycho kaykaqta.
Tsaynöpis manami rikashqätsu wamrankunatapis mañakur puriykaqta.
26 Alli runaqa kuyapäkuq karmi muchuqkunata yanapan.
Wamrankunapis yanapakuqmi kayan.
27 Mana allikunata ruranaykipa trokinqa allillata ruray.
Tsaynö kawarqa imaypis añawmi kawanki.
28 Allita ruraptikiqa Tayta Dios kushikunmi.
Pay munanqannö kawaqkunataqa imaypis manami kachantsu.
Mana alli runakunatami itsanqa paypita aywaraqnintinta ushakätsin.†
29 Alli runakunaqa Tayta Dios rikatsinqan nacionchömi imayyaqpis täyanqa.
30 Alli runaqa shumaq tantiyakurmi alli kaqllata parlan.
Rasun kaqllatami imatapis parlan.
31 Tayta Diospa leyninkunatami shonquncho yarparan.
Tsaymi imaypis llutanta rurantsu.
32 Mana alli runaqa alli runata wanutsinan raykuqmi maypa aywanqantapis watqaraykan.
33 Tsaynö kaptinpis wanutsinanta Tayta Dios manami kachapantsu.
Ni jutsata jitapänantapis manami dëjantsu.
34 Tayta Diosman yärakuy.
Pay munanqannö imaypis kaway.
Tsaynö kawaptikiqa paymi yanapashunki rikatsishunqayki nacioncho kushishqa kawanaykipä.
Rikaykaptikimi mana alli runakunata ushakätsinqa.
35 Rikashqämi mana alli runakuna runa mayinta maytsaychöpis munanqanta ruraykätsiqta.
36 Tsaynö kaykäyanqanchömi ushakäyashqa.
Paykunaqa chipyaqmi illakäyashqa.
37 Tayta Dios munanqannö kawaq runata rikar tantiyakuy.
Alli kawaq runaqa kushishqami kawanqa.
38 Mana wiyakuq runakunami itsanqa chipyaq ushakäyanqa.
Paykunaqa ushakäyänanpänami kaykäyan.
39 Alli runakunataqa Tayta Diosmi imachöpis yanapan.
Paykunataqa imayka ñakaykunapitapis cuidanmi.†
40 Mana alli runakunapa makinpita qeshpiyänanpämi yanapan.
Tsaynö yanapan Tayta Diosman yärakuyaptinmi.