Salmo 36 (35)
Tayta Dios kuyakuq kanqan
(1) Cantaqkunapa mandaqninpämi. Tayta Diospa sirviqnin David qellqanqan salmu.
1 (2) Jutsa ruraqkunaqa mana allita rurayänallanpämi yarpachakuykäyan.
Tayta Diospita mantsapakuyänanpä manami ichikllatapis yarpäyantsu.†
2 (3) Paykunaqa yarpäyan pïmaypitapis mas alli kayanqantami.
Jutsata rurarpis manami penqakuyantsu.
3 (4) Imata parlarpis llullakurmi manakaqkunata parlayan.
Upa yarpaytami yarpäyanpis.
Allita rurayanqanpa trokinqa llutankunallatami rurayan.
4 (5) Cämankunachöpis mana allita rurayänallanpämi yarpachakuyan.
Jutsa ruraykunallacho yachakashqa karmi kachariyta munayantsu.
5 (6) Tayta Dios, kuyakuq kanqaykiqa ciëluyaqmi chan.
Awninqaykita cumpliq kanqaykiqa pukutayyaqmi chan.†
6 (7) Alli arreglaq kanqaykiqa jatun jirkakunanömi kaykan.
Yachaq kanqaykiqa lamar jondu kanqannömi kaykan.
Tayta Dios, runatapis uywatapis qammi rikaykanki.
7 (8) Kuyakuynikiqa pasaypa kushikuypämi kaykan.
Älayki rurinmanmi runakunapis amparakuyan.
8 (9) Wayikipita mikuyta kamaripaptikimi pacha junta kaykäyan.
Imayka mayutanörä bendicionnikita chaskirmi kushishqa kawayan.
9 (10) Qammi pïmaytapis kawayta qaranki.
Qamman yärakurrämi alli kawayä.
10 (11) Qamman yärakamuqkunata kuyapaykullay.
Munanqaykinö kawaq runakunata yanapaykullay.
11 (12) Runa tukuqkuna ñakatsiyämänanta ama kachapaykullaytsu.
Mana alli runakuna manakaqman churayämänanta ama munaykullaytsu.
12 (13) Rikayay tsay runakunata ima desgracia päsanqantapis.
Yapayqa manami umanta joqariyanqanatsu.