Salmo 35 (34)
Yanapananpä Tayta Diosta mañakunqan
(1a) David qellqanqan salmu.
1 (1b) Tayta Dios, chikimaqnïkunapa contran shäriykullay.
Atacamaqkunata atacaykullay.
2 Escüduykita aptakurkur shamurnin yanapaykallämay.
3 Chikimar qatikachämaqnïkunata lanzaykiwan atacaykullay.
Salvamaqnï kanqaykita musyaykatsillämay.
4 Wanutsimayta munaqkuna penqakushqa aywakuyätsun.
Atacamayta munaqkuna penqakushqa qeshpiyätsun.
5 Paykunaqa päjata wayra apanqannö maytsayman mashtakashqa kayätsun.
Tayta Diospa angelnin maytsaypapis qarquykullätsun.
6 Paqaspa purir llutskaqnö imaypis kaykuyällätsun.
Tayta Diospa angelnin qatikachätsun.
7 Chikimaqnïkunata manami wajupashqätsu.
Tsaynö kaykaptïpis desgraciamanmi jitarpamayta munayan.
8 Tsaynö kayanqanpita imayka desgraciapis päsaykullätsun.
Tsay trampa churayanqanmanpis kikinkuna ishkiyätsun.
9 Tayta Dios yanapamaptinmi pasaypa kushikü.
Salvamaptinmi payta kushishqa alabä.
10 Llapan shonqüwanmi nishä:
“Tayta Dios, manami pipis qamnöqa kantsu.
Munayyuq runakunapa makinpitami ñakaqkunata jipinki.
Ñakatsiyanqanpita yarquyänanpämi yanapanki”.
11 Llulla testïgukunami manakaqta tumpamar manapis musyanqäkunata tapuyäman.
12 Paykunata yanapashqa kaykaptïpis conträ shäriyaptinmi pasaypa llakikü.
13 Paykuna qeshyayaptinpis pasaypa llakikurninmi qachqa latsapata jatikurqä.
Alliyänanpä ayunarmi Tayta Diosta shonqullächo imaypis mañakuq kä.
14 Mamä, amïgü o wawqï wanuptin lütur llakikuqnörämi llakikuq kä.
15 Paykunami itsanqa desgracia päsamaptin pasaypa asipäyämarqan.
Jäpa runatanömi imaypis mana alli rikayämarqan.
16 Asipämarmi manakaqman churayämarqan.
Nanaq ñawinparämi rikapäyämarqanpis.
17 Tayta Dios, ¡imayyaqrä tsaynö ñakatsiyämänanpä kachaykamanki!
Tsay qayaraykaq leonkunapita salvaykallämay.
18 Salvamaptikimi qamman yärakamuq runakuna qorikäyanqancho agradëcikushayki.
Atska runakunapa ñöpanchömi alabashayki.
19 Chikimaqnï runakuna ama kushipäyämätsuntsu.
Manakaqpita chikimaqnïkuna ama qemtsipäyämätsuntsu.†
20 Paykunaqa manami munayantsu runakuna alli kawayänanta.
Añaw kawaq runakunata mana alli kawayman churayänanpämi yarpachakuykäyan.
21 Makinkunatapis taqllarrämi asipäyäman “¡allirächi ima päsanqantapis ñawintsikpami rikaykantsik!” nir.
22 Tayta Dios, tsaykunata llapantami rikashqayki.
Janä shäriykullay.
Ama kachaykallämaytsu.
23 Juklla yanapaykallämay.
Tsapämarnin paykunata juzgaykullay.
24 Alli juez kaptikimi rugakullä washaykamänaykipä.
Ama munaykullaytsu asipämarnin manakaqman churayämänanta.
25 Ima päsamanqantapis ama yarpayllapis yarpäyätsuntsu.
Tsaynöpis ama niyätsuntsu: “Munanqantsiknömi imaykapis päsashqa”.
26 Desgracia päsamanqanpita kushikuqkuna pasaypa penqakushqa puriyätsun.
Manakaqman churamar runa tukuqkunata pïmaypis penqakatsiyätsun.
27 Janä shäriqkunaqa pasaypa kushikuyätsun.
Llapanpä munayyuq kanqaykipita imaypis alabaykuyälläshuy.
Yanapamanqaykita imaypis tantiyaykuyällätsun.
28 Chikimaqnïkunapita alli washämanqaykitami pïmaytapis willashä.
Mana ajayaypami imaypis alabashayki.