Salmo 34 (33)
Yanapakuq kanqanpita Tayta Diosta alabanqan
(1) David qellqanqan salmu. Qellqanqan witsanmi Abimelecpa ñöpancho löcu tukurqan.† Tsaymi Abimelecqa markanpita Davidta qarqurqan.
1 (2) Tayta Diostami imay hörapis agradëcikushä.
Paytami imaypis alabashä.
2 (3) Tayta Diosman yärakur pasaypami kushikü.
Alabaykanqäta wiyamar qollmi shonqu kaqkuna kushikuyätsun.
3 (4) Tayta Diosta llapantsik alabashun.
Juk yarpaylla jutinta joqarishun.
4 (5) Rugakuptïmi Tayta Dios wiyamashqa.
Mantsariptïpis paymi shakyätsimashqa.
5 (6) Tayta Diosman yärakuqkunaqa kushishqami kaykäyan.
Paykunaqa imaypis manami penqakuyman churashqatsu kayanqa.
6 (7) Llakikur qayakuptïmi Tayta Dios wiyamashqa.
Pay yanapamaptinmi llakikünatsu.
7 (8) Tayta Diospita mantsapakuqkunataqa angelninmi ima peligrupitapis tsapan.
8 (9) Kuyakuq kanqanta musyayänaykipä Tayta Diosman yärakuyay.
Payman yärakurqa kushishqami kawayanki.
9 (10) Tayta Dios munanqannö kawaq santu runakuna, paypita mantsapakushun.
Paypita mantsapakuqkunataqa manami ni imapis pishinqatsu.
10 (11) Muchuy kaptinqa leonkunapis mallaqäyanmi.
Tayta Diosta ashiqkunami itsanqa llapan ministiyanqantapis tariyan.
11 (12) Wamräkuna, yachatsinqäta wiyayänaykipä shayämuy.
Tayta Diospita mantsapakuyänaykipämi yachatsiyäshayki.
12 (13) Atska wata kawayta munarqa y kushishqa kawayta munarqa 13 (14) llutankunata ama parlayaytsu.
Tsaynöpis ama llullakuyaytsu.
14 (15) Llutankunata rurayänaykipa trokinqa allillata rurayay.
Rimanakuyänaykipa trokinqa pïmaywanpis alli kawayay.
15 (16) Alli ruraqkunataqa Tayta Diosmi imaypis rikan.
Mañakuyanqantapis wiyanmi.
16 (17) Mana alli ruraqkunatami itsanqa rikaytapis munantsu.†
Ajanarninmi paykunata chipyaq illakätsinqa.
17 (18) Alli runakuna mañakuyaptinqa Tayta Dios wiyanmi.
Ima ñakaycho kayaptinpis paymi yanapan.
18 (19) Jutsankunapita llakikuqkunataqa Tayta Dios kuyapanmi.
Ima ruraytapis mana kamäpakuqkunata paymi yanapan.
19 (20) Diosta cäsukuq runapäqa imallapis llakikunanpä kaykanmi.
Tsaynö kaptinpis Tayta Diosmi imaypis yanapan.
20 (21) Paytaqa shumaqmi rikan.
Manami ni juk tullullanpis pakishqatsu kanqa.†
21 (22) Mana alli runakunaqa llutanta rurayanqanpitami wanuyanqa.
Alli runakunata chikiq kaqqa castigashqami kanqa.
22 (23) Sirviqninkunatami itsanqa wanuypita Tayta Dios salvanqa.
Payman yärakuqkunaqa manami castigashqatsu kayanqa.