Salmo 33 (32)
Llapantapis kamaq Tayta Diosta alabanqan
1 Alli shonquyuqkuna, Tayta Diosta alabayay.
Payta alabayanqaykiqa kuyayllapämi wiyakan.
2 Chunka cuerdayuq arpawanpis Tayta Diosta alabayay.
Salteriuwanpis alabayay.
3 Mushuq cantuwan alabayay.
Arpata shumaq tukar kushishqa cantayay.
4 Tayta Diosqa rasun kaqllatami llapantapis parlan.
Ruranqankunata rikarmi tantiyantsik awninqanta cumpliq kanqanta.
5 Pay munanqannö kawaqkunataqa Tayta Dios kuyanmi.
Kuyapäkuq karmi maytsaychöpis runakunata yanapan.
6 Tayta Dios niskiptillanmi ciëlupis rurakaskirqan.
Niskiptillanmi rupaypis, killapis y qoyllurkunapis yuriskirqan.
7 Lamartapis juk patsallamanmi qoriskirqan.
Wanwanyaykaq uchkukunamanmi wiñarqan.†
8 Maytsaychöpis taqkuna, Tayta Diospita mantsapakuyay.
Entëru munducho taq runakuna, payta adorayay.
9 Pay niskiptillanmi kay patsapis ciëlupis rurakaskirqan.
Mandaptinmi llapanpis rikakaskirqan.
10 Mana allita rurayänanpä willanakuyaptinpis Tayta Diosmi tsapata churapan.
11 Kikin yarpanqankunatami itsanqa imaypis kamakätsin.
12 Israel runakunatami Tayta Dios akrarqan herencian kananpä.
Payman yärakurmi kushishqa kawayan.†
13 Tayta Diosqa ciëlupita patsami pïmaytapis rikaykämun.
14 Täkunqanpita patsami kay patsacho kaqkunata rikaykämun.
15 Paymi llapan runakunapa shonqunkunatapis kamashqa.
Paymi imata runa ruranqantapis rikaykämun.
16 Reyqa manami atska soldäduyuq kanqanpitatsu guërracho vincin.
Manami alli chölu soldäduyuq kanqanpitatsu contrankunapita salvakun.
17 Manami alli cawalluyuq kanqanpitatsu pelyacho gänan.
Mayjina alli cawalluyuq karpis contrankunapita manami salvakuntsu.†
18 Tayta Diosmi paypita mantsapakuqkunata rikan.
Kuyakuq karmi payman yärakuqkunata yanapan.
19 Paykunatami wanuypita salvan.
Muchuy kaptinpis mikuytami kamaripan.
20 Noqantsikqa Tayta Diosmanmi yärakuntsik.
Paymi yanapamantsik y escüdunö tsapämantsik.
21 Payman yärakushqaqa shonquntsikpis kushikunmi.
22 Tayta Dios, imaypis kuyapaykayällämay.
Qamllamanmi yärakayämü.