Salmo 32 (31)
Tayta Dios perdonanqan kaqkuna kushikuyanqan
(1a) David qellqanqan salmumi.
1 (1b) Kushishqami kawan Tayta Dios perdonanqan runa.
Paypa jutsankunataqa Tayta Dios manami yarparannatsu.
2 Kushishqami kawan jutsaynaqtana Tayta Dios rikanqan runa.
Tsay runaqa jutsa ruranqanta manami pakantsu.†
3 Jutsäpita perdonta mana mañakurmi qoyay qoyay llakikushqä.
Tullükunapis pasaypami qotukashqa.
4 Paqaspa junaqpa castigamaptikimi pasaypa ñakashqä.
Usya witsan wayta shushur ushakanqannömi kallpäpis ushakashqa. Selah
5 Tsaymi jutsäkunata reconöcir perdonta mañakamushqä.
Contrayki ruranqäta manami pakashqänatsu.
Yarpaynïchömi nirqä: “Tayta Diostami jutsäkunata willashä”.
Mañakamuptïmi perdonamashqayki.† Selah
6 Qamman yärakamuqkunaqa ñakayanqan höraa imaypis mañakayämunqami.
Tsaynöpami bunyaypa bunyar yaku aywaqnö ñakaykuna shamurpis paykunata ushakätsinqatsu.
7 Qammi kaykanki pakakunä.
Qammi imayka peligrupitapis tsapämanki.
Tsaymi kushishqa imaypis alabashayki. Selah
8 Tayta Diosmi nin:
“Qamtaqa imaypis allimi rikashayki.
Imanö kawanaykipäpis kikïmi tantiyatsishayki y yachatsishayki.
9 Mulanö y cawallunö mana tantiyakuq ama kaytsu.
Mulata y cawallutaqa bozalwanrämi sujitayan.
Bozal mana kaptinqa manami sujitayta puëdiyantsu”.
10 Mana alli runakunaqa pasaypami ñakayanqa.
Tayta Diosman yärakuq runakunataqa Tayta Diosmi kuyapar yanapanqa.
11 Tayta Dios munanqannö kawaqkuna, pay yanapashunqaykipita kushikuyay.
Alli shonqu runakuna, ¡kushikur alabayay!