Salmo 31 (30)
Tayta Diosllaman yärakunqan
(1) Cantaqkunapa mandaqninpämi. David qellqanqan salmu.
1 (2) Tayta Dios, qamllamanmi yärakamü.
Runakuna penqakatsiyämänanta ama munaykullaytsu.
Allillata ruraq kaynikiwan salvaykallämay.
2 (3) Mañakamunqäta wiyaykallämay.
Juklla salvaykallämay.
Jatun ruminö tsapaykallämay.
Pakakuna machaynö salvaykallämay.
3 (4) Qammi kanki tsapämaqnï qaqa.
Qammi kanki amparakunä törri.
Ima peligrupitapis tsapaykallämay.
Awnimanqaykinö salvaykallämay.
4 (5) Conträkuna trampata churapäyämanqanpita salvaykallämay.
Qamllami rikamaqnï kaykanki.
5 (6) Makikimanmi almäta churaykamü.†
Awninqaykita cumpliq Tayta Dios, salvaykallämay.
6 (7) Ïdulukunaman yärakuqkunata chikïmi.
Tayta Dios, qamllamanmi yärakamü.
7 (8) Kuyamanqaykita tantiyarmi pasaypa kushikü.
Kuyamarmi imanö llakikunqätapis rikamashqayki.
Musyankimi imanö ñakanqätapis.
8 (9) Conträkunapa makinmanqa manami kachaykamashqaykitsu.
Añaw kawanäpämi salvamashqayki.
9 (10) Tayta Dios, pasaypa llakikuycho kaptï kuyapaykallämay.
Waqaykaptillämi ñawïpis ñawinatsu.
Shonqüpis manami shonqunatsu.
10 (11) Wata wata waqaykällarmi aywapakaykä.
Llakikuykaptillämi kallpäkunapis ushakaykan.
Entëru cuerpüpis pasaypami qotukaykan.
11 (12) Conträkunapis pasaypami jamuräyäman.
Vecïnükunapis pasaypami asipäyäman.
Reqinakunqäkunapis noqawan tinkuyta manami munayantsu.
Cällicho rikaskamarpis jukläpami tumaskiyan.†
12 (13) Wanushqatanömi pasaypa qonqaykayämashqa.
Imayka pakishqa uyllutanömi rikaykäyäman.
13 (14) Conträ karmi llapanpis wasäta rimar puriykäyan.
Maypa aywaptïpis mantsariyllami kaykan.
Llapanpis wanutsiyämänanpämi willanakuykäyan.†
14 (15) Tayta Dios, qamllamanmi yärakamü.
Qamlla Diosnï kanqaykitami nï.
15 (16) Qampa makikichömi kaykä.
Conträkuna qatikachäyämanqanpita salvaykallämay.
16 (17) Kuyapämar salvaykallämay.
Noqaqa qampa sirviqnikimi kaykä.
17 (18) Tayta Dios, qammanmi qayakamü.
Penqakuycho mana kanäpä ama kachaykallämaytsu.
Mana alli runakunataqa penqakuyman churaykullay.
Paykunataqa llapantapis ushakaykatsillay.
18 (19) Jutsaynaq runata asiparmi contran parlayan.
Tsaynö parlaqkunataqa llapantapis ushakaykatsillay.
19 (20) ¡Tayta Dios, pasaypa kuyakuqmi kanki!
Mantsapakushuqnikikunapämi kuyakuynikita tesörutanö churaraykätsinki.
Tsaytami runakuna rikanancho qamman yärakamuqkunata aypuykanki.
20 (21) Kikiki wallkirmi runakuna contran shäriyaptin salvanki.
Contran shärir willanakuyaptinpis imapis mana päsananpämi tsapaykanki.
21 (22) Tayta Dios alabashqa kaykullätsun.
Pasaypa ñakaycho kanqä hörami kuyapäkuq kar yanapamashqa.
22 (23) Pasaypa llakikuy tsarimaptinmi kacharimanqaykita yarparqä.
Yanapamänaykipä mañakamuptïmi yanapamashqayki.
23 (24) Tayta Diosman yärakuqkuna, llapayki payta kuyayay.
Payta cäsuqkunataqa imaypis rikanmi.
Allish tukuqkunatami itsanqa imanöpis kawayanqanman tupu castigan.
24 (25) Tayta Diosman yärakuqkunaqa, mana kachaypa imaypis payman yärakuyay.