Salmo 30 (29)
Tayta Diosta agradëcikur alabanqan
(1) Diospa wayinta bendisarninmi kay salmuta cantayarqan.† David qellqanqan salmu.
1 (2) Tayta Dios, conträkunapita salvamanqaykipitami qamta alabä.
Chikimaqnïkuna kushipäyämänanta manami kachapashqaykitsu.
2 (3) Tayta Dios, rugakur mañakamuptïmi alliyätsimashqayki.
3 (4) Qammi wanuypita salvamashqayki.
Wanunäpä kaykaptïmi libramashqayki.
4 (5) Tayta Dios munanqannö kawaqkuna, payta alabayay.
Salmukunata cantar santu Diosta alabayay.
5 (6) Ajarpis payqa juk rätullami ajaskin.
Kuyakuq kayninqa imaypis manami ushakantsu.
Tsaymi paqaspa waqarpis kushishqana warantsik.†
6 (7) Alli kawanäpä yanapamaptikimi tantiyarqä imapis mana päsamänanpä kanqanta.
7 (8) Tayta Dios, kuyamarmi shumaq rikamarqayki.
Kacharimaptikimi itsanqa pasaypa mantsariy tsarimarqan.
8 (9) Tayta Dios, qamtami mañakamü.
Qamtami rugakamü.
9 (10) Wanuptï ¿ima allitatä qam jipinki?
Pamparaptï ¿imatatä jipinki?
Wanushqakunaqa manami alabayäshunkinatsu.
Ni alli kanqaykitapis manami willakuyanqanatsu.
10 (11) Tayta Dios, wiyamarnï kuyapaykallämay.
Tayta Dios, imaypis yanapaykallämay.
11 (12) Llakishqa kaykaptï kushikatsimaptikimi kushishqana danzä.
Qachqa latsapata jatikunäpa trokinmi fiesta latsapatana jatitsimashqayki.
12 (13) Tsaymi salmukunata cantar qamta alabashayki.
Manami imaypis upällakushätsu.
Qamtami imaypis agradëcikushayki.