Salmo 29 (28)
Tayta Diospa voznin munayyuq kanqan
(1a) David qellqanqan salmu.
1 (1b) Angelkuna, Tayta Diosta alabayay.
Munayyuq kanqanpita alabayay.
2 Tayta Diospa jutinta joqarir alabayay.
Munayyuq santu Tayta Diosta adorayay.
3 Tayta Diospa vozninqa lamar jananpitami wiyakämun.
Ciëlupitapis Tayta Diosmi bunruruqnö parlamun.
Lamarpitapis mas munayyuqmi kaykan.
4 Tayta Diospa vozninqa mantsariypämi wiyakämun.
Tayta Diospa vozninqa mantsakaypämi kaykan.
5 Tayta Diospa vozninqa cedru jachatapis pakitsinmi.
Líbanucho kaykaq cedru jachakunatapis chipyaqmi ishkitsin.
6 Tayta Diospa vozninqa Líbano jirkatapis imayka becërrutanömi brincatsin.
Sirión jirkatapisa imayka chucaru törutanömi saltatsin.
7 Tayta Dios parlamuptinqa ninami tamyamun.
8 Tsunyaqkunatapis tsuktsukyätsinmi.
Cades jirkatapis siksikyätsinmi.
9 Encina jachakunapa llimllankunatapis wiksukätsinmi.
Muntikunatapis chipyaqmi saqtan.
Templunchömi llapanpis adoraykäyan.†
10 Tayta Diosmi tamyatapis tamyatsimun.
Tayta Diosmi imayyaqpis rey kaykan.
11 Tayta Diosmi payman yärakuq runakunata yanapan.
Bendicionninta churamuptinmi añaw kawayan.