Salmo 28 (27)
Tayta Dios yanapananpä mañakunqan
(1a) David qellqanqan salmu.
1 (1b) Tayta Dios, qammi pakakunä qaqa kaykanki.
Taytay, qamllatami mañakamü.
Mañakamunqäta wiyaykallämay.
Mana wiyamaptikiqa ¿imapänatä kawashäpis?
2 Santu templuykilämanpa makïta joqarkurmi mañakamü.
Mañakamuptï wiyaykallämay.
3 Jutsata rurar kawaq runakunata castigarpis noqata ama castigaykallämaytsu.
Paykunaqa janan shonqullami alli tupäkuyan.
Shonqunkunachöqa mana allikunatami yarpaykäyan.
4 Rurayanqanman tupu juzgaykullay.†
Jutsata rurayanqanman tupu castigaykullay.
5 Tsay mana alli runakunaqa alli ruranqaykikunata rikaykarpis manami cäsukuyäshunkitsu.
Paykunataqa illakaykatsillay.
Amana kawayätsunnatsu.
6 Tayta Dios alabashqa kaykullätsun.
Llapan mañakunqätami wiyamashqa.
7 Tayta Diosmi amparakunä y escüdü kaykan.
Llapan shonqüwan yärakuptïmi yanapaman.
Tsaymi shonqüpis kushikun.
Payta agradëcikurmi alabashä.
8 Tayta Diosmi kuyanqan kaqkunata imaypis yanapan.
Akranqan reytapis yanaparmi tsapan.
9 Taytay, qamman yärakamuqkunata salvaykullay.
Kuyanqaykikunaman bendicionnikita churaykullay.
Üsha mitsiqnö imaypis shumaq rikaykullay.
Imaypis marqashqalla puriykatsillay.