Salmo 27 (26)
Aktsintsik y salvamaqnintsik Tayta Dios kanqan
(1a) David qellqanqan salmu.
1 (1b) Tayta Diosqa aktsïmi y salvamaqnïmi.
Tsaynö kaykaptinqa ¿pitarä mantsäman?
Tayta Diosmi imapitapis tsapäman.
Tsaymi pitapis mantsätsu.
2 Conträkuna atacamar wanutsiyämänanpämi qorikaykäyan.
Tsaynö karpis kikinkunami ushakäyanqa.
3 Tsaytsika soldädukuna jirurupäyämaptinpis manami mantsarishätsu.
Wanutsiyämänanpä kamarikuyaptinpis qammanmi yärakamü.
4 Tayta Diosta jukllayllatami mañakü.
Tsaytaqa pasaypami munä.
Paytami mañakü qoyay qoyay wayincho kanäpä,
kuyakuq kanqanta shumaq tantiyanäpä†
y templuncho payta adoranäpä.
5 Ñakaykuna chämuptin paymi wayinman pakamanqa.
Tsaychömi conträkunapita tsapämanqa.
Qaqa jananman qeshpitsiqnömi qeshpitsimanqa.
6 Conträkunata vincinäpämi yanapamanqa.
Tsaymi templunman aywaykur kushikuypita sacrificiukunata rupatsishä.
Tsaychömi Tayta Diosta kushishqa alabashä.
7 Tayta Dios, mañakamunqäta wiyaykallämay.
Kuyapäkuq kaynikiwan rugakamunqäta mayaykallämay.
8 Llapan shonqüwanmi qamta ashiykä.
Imaypis qamtami ashishayki.
9 Noqapita ama pakakuykullaytsu.
Ajarpis ama kachaykallämaytsu.
Qamllami imaypis yanapamanki.
Japallätaqa ama kachaykallämaytsu.
Qamllami salvamaqnï kanki.
10 Tayta Dios, taytäwan mamä kachariyämaptinpis qammi qorikamanki.
11 Tayta Dios, imanö kawanäpäpis nänikita reqiykatsimay.a
Conträkunapa rikanancho alli kawanäpä yanapaykallämay.
12 Chikimaqnïkunapa makincho ama kachaykallämaytsu.
Paykunaqa conträ shärirmi imatapis manakaqkunallata tumpaykäyäman.
13 Noqaqa musyämi Tayta Dios yanapamänanpä kanqanta.
Kay patsacho kawanqäyaqqa tsayta rikashämi.
14 Tayta Diosllaman imaypis yärakuyay.
Mana ajayaypa y mana qelanaypa payllaman yärakuyay.