Salmo 26 (25)
Alli runa Tayta Diosta mañakunqan
(1a) David qellqanqan salmu.
1 (1b) Tayta Dios, jutsaynaq kanqäta conträkunata tantiyaykatsillay.
Noqaqa munanqaykinömi kawä.
Imaypis qamllamanmi yärakü.
2 Imanö kawanqätapis rikaykullay.
Shonqü allita o mana allita yarpanqantapis musyaykullay.†
3 Kuyakuq kanqaykitaqa imaypis yarparaykämi.
Tsaymi munanqaykinö imaypis kawä.
4 Llullakuqkunawanqa manami takukashqätsu.
Allish tukuqkunawanqa manami qorikashqätsu.
5 Mana alli runakuna qorikäyanqanmanqa manami aywätsu.
Llutan yarpayyuq runakunawanqa manami imaypis takukätsu.
6 Jutsaynaq karmi mayllashqanö kaykä.
Tsaymi altarniki ñöpanmanpis yaykü.
7 Tsaychömi agradëcikur qamta alabä.
Kushikuypä ruranqaykikunatami wakintapis willä.
8 Tayta Dios, täkunqayki wayikitapis kuyämi.
Tsay wayikichömi munayyuq kanqaykita tantiyä.
9 Jutsa ruraqtanöqa ama wanuykatsillämaytsu.
Wanutsikuqkunatanöqa ama castigaykallämaytsu.
10 Paykunaqa mana allita rurayänallanpämi yarpachakuyan.
Tsaynöpis chaskipakuyllapami imaykayuq rikakuyashqa.
11 Noqaqa manami jutsata rurartsu kawä.
Taytay, kuyapämarnin salvaykallämay.
12 Yanapamaptikimi mantsakünatsu.
Kuyanqayki runakuna qorikäyanqanchömi qamta alabashayki.