Salmo 25 (24)
Tayta Dios yanapananpä mañakunqan
(1a) David qellqanqan salmu.
1 (1b) Tayta Dios, qamtami llapan shonqüwan mañakamü.
2 Tayta Diosllä, qamllamanmi yärakamü.
Runakuna penqakatsiyämänanta ama munaykullaytsu.
Conträkuna asipäyämänanta ama munaykullaytsu.
3 Qamman yärakamuqkunaqa penqakuyman churashqa ama kaykuyällätsuntsu.
Contrayki shäriqkuna itsanqa penqakuyman churashqa kaykuyällätsun.
4 Tayta Dios, imanö kawanäpäpis nänikita reqiykatsillämay.a
Munanqaykinö kawanäpäpis nänikipa pushaykallämay.
5 Jutsata mana ruranäpä willakuynikita tantiyaykatsillämay.
Qamllami salvamaqnï Tayta Dios kaykanki.
Imay hörapis qamllamanmi yärakamü.
6 Tayta Dios, imaypis kuyamashqaykimi.
Kuyamanqaykita ama qonqaykullaytsu.
7 Chölullarä kaykar jutsata ruranqäta ama yarparaykullaytsu.
Tayta Dios, kuyapäkuq kaykarqa yarpaykallämanki.
8 Tayta Diosqa alli ruraqmi.
Jutsa ruraqkuna pay munanqannö kawayänanpämi alli nänita reqitsin
9 Llampu shonqu kaqkunatami tantiyatsin.
Allillata rurayänanpämi yachatsin.
10 Ruranqan pactuta y mandamientunkunata cumpliqkunataqa kuyapanmi.
Awninqannöllami mana kachaypa yanapan.
11 Tayta Dios, pasaypa jutsayuqmi rikakullä.
Kuyakuq kanqayki musyakänanpä perdonaykallämay.
12 Tayta Diospita mantsapakuqkunataqa alli kawayänanpämi kikin tantiyatsin.
13 Paykunamanmi bendicionninta imaypis churan.
Paykunapita aywaraqkunatami herenciatapis aypun.†
14 Tayta Diosqa paypita mantsapakuqkunapa amïgunmi.
Pactuta rurar awninqannöllami bendicionninta churan.
15 Tayta Diosllatami imaypis mañakü.
Ima peligrupitapis paymi tsapäman.
16 Taytay, pïnïpis mana kaptinmi pasaypa llakishqa kaykä.
Ñakanqäta rikar kuyapaykallämay.
17 Qoyay qoyaymi shonqü pasaypa llakinan.
Kay llakikuypita jipiykallämay.
18 Pasaypa ñakaykanqäta y llakikuykanqäta tantiyaykullay.
Jutsäkunapita perdonaykallämay.
19 Taytay, conträkuna atskami kaykäyan.
Wanuyparä chikiyämanqanta rikaykullay.
20 ¡Tsay runakunapita salvaykallämay!
¡Paykunapita tsapaykallämay!
Taytay, qamllamanmi yärakamü.
21 Qamman yärakurmi allillata ruraykä.
Munanqaykinö kawaykaptïqa tsapaykallämay.
22 Tayta Dios, contrankunapita Israel runakunata salvaykullay.