Salmo 24 (23)
Tayta Dios llapanpä munayyuq rey kanqan
(1a) David qellqanqan salmu.
1 (1b) Tayta Diospami kay patsapis y kay patsacho kaqkunapis.
Llapan kawaqkunapis paypami.†
2 Tayta Diosmi kay patsata kamashqa.
Lamar y mayukuna rurinman cimientuta ruraykurmi tsay jananman jamatsishqa.
3 Tayta Dios akranqan jirkanman ¿pirä witsanman?
Sagrädu wayinman ¿pirä yaykunman?
4 Tsaymanqa yaykuyanqa allillata ruraqkuna,
shonqunkunacho imaypis allillata yarpaqkuna,†
ïduluta mana adoraqkuna
y awninqanta rasunpa cumpliqkunallami.†
5 Paykunamanmi Tayta Dios bendicionninta churamunqa.
Contrankunapa makinpitapis paymi salvanqa.
6 Tsaynömi kaykäyan Tayta Diosta ashiqkuna.
Tsaynömi kaykäyan Jacob yärakunqan Tayta Diosta mañakuqkuna. Selah
7 Markapa punkunkunata shumaq kichayay.
Unay punkukunatapis kicharätsiyay.
Llapanpä munayyuq reymi yaykamunqa.
8 ¿Pitä kaykan llapanpä munayyuq rey?
Payqa kaykan poderyuq y alli geniuyuq Tayta Diosmi.
Payqa guërracho llapantami vincin.
9 Markapa punkunkunata kichayay.
Unay punkukunatapis kicharätsiyay.
Llapanpä munayyuq reymi yaykamunqa.
10 ¿Pitä kaykan llapanpä munayyuq rey?
Payqa kaykan llapanta mandaq Tayta Diosmi.
Payqa llapanpä munayyuq reymi. Selah