Salmo 41 (40)
Qeshyaykaq runa Tayta Diosta mañakunqan
(1) Cantaqkunapa mandaqninpämi. David qellqanqan salmu.
1 (2) Muchuqkunata yanapaq runaqa kushishqami kawan.†
Paytaqa ima desgracia shamuptinpis Tayta Diosmi yanapan.
2 (3) Nacionnincho kushishqa kawananpämi cuidan.
Contran shäriqkunapitapis tsapanmi.
3 (4) Qeshyar ujuraptinpis alliyätsinmi.
Ima qeshyawan qeshyaptinpis kachakätsinmi.
4 (5) Tayta Diosta mañakurmi nirqä:
“Kuyapaykallämay, Tayta Dios.
Qamta ajanätsirmi jutsata rurashqä.
Perdonamar alliyaykatsillämay”.
5 (6) Chikimaqnïkunapis wanunäta munarmi nikäyan:
“¡Imayrä payqa wanunqa!”
6 (7) Watukamaq shamurpis alli shimillanpami parlapäyäman.
Shonqunchöqa nanaparaykäyämanmi.
Tsaymi ñöpäpita yarquskirqa conträ parlarna puriykäyan.
7 (8) Qorikaykurmi wasäta rimayan.
Jutsäpita ñakaykanqäta yarparmi niyan:
8 (9) “Supay qeshyatsiptinmi ñakaykan.
Ujuranqanpita imaypis mananami shärinqanatsu”.
9 (10) Kuyanakuyanqä amïgüpis conträmi rikakushqa.
Noqawan mikuykarpis conträmi shärishqa.†
10 (11) Tayta Dios, kuyapaykallämay.
Chikimaqnï runakunata maqakuykunäpä alliyaykatsillämay.
11 (12) Alliyätsimanqaykita rikar chikimaqnïkuna manami kushipäyämanqanatsu.
Tsaynöpami tantiyashä kuyamanqaykita.
12 (13) Noqaqa manami imatapis llutanta rurashqätsu.
Makikiwan imaypis jancharaykallämay.
Ñöpaykicho imaypis tsararaykallämay.
13 (14) Adoranqantsik Tayta Dios kananpis imaypis alabashqa kaykullätsun.
¡Amén! ¡Tsaynö katsun!†